འགྲོ་སའི་རྡོ་གཅལ་ལམ་ཡང་གཅིག་པ་རེད།།

སྡོད་སའི་ཁང་པའི་སྤྱིལ་ཡང་གཅིག་པ་རེད།།

སྔ་ཕྱི་ཟ་མ་བཟའ་སའི་འདུག་སྟེགས་ཀྱང་།།

བར་ཁྱམས་གཅིག་གི་བར་ཐག་མ་གཏོགས་མེད།།

དཔྱིད་འགོའི་མེ་ཏོག་བཞད་དུས་མཉམ་དུ་ཡོད།།

དགུན་འཁྱག་ཁ་རླུང་འདྲེས་དུས་མཉམ་གྲང་རེད།།

ར་བ་གཅིག་གི་ནང་ལ་མཉམ་གནས་པས།

ཕལ་ཆེར་མཐོང་ན་མཉམ་མཐོང་ཡིན་ངེས་ཡོད།།

འོན་ཀྱང་ང་ཡིས་ཁྱེད་རང་ངོ་མི་ཤེས།།

མི་ཤེས་མ་ཚད་མཐོང་ཡང་མ་མྱོང་བ།།

བག་ཆགས་སེམས་ཀྱི་སྒེའུ་ཁུང་ཁྲ་བོ་ལ།།

རྡུལ་གྱི་ཆ་ཡང་མ་བསྐུས་གསལ་པོ་རེད།།

སྲོད་ལ་ཉི་མའི་ཁ་ཞུན་རི་རྩེ་ན།།

དམར་ལ་འོད་ཀྱིས་ཕྱུག་པའི་དགོང་ཀ་དེར།།

བསིལ་བའི་རླུང་ལྡང་ཆར་པས་བརླན་པ་ཡིས།།

ལུས་ཀྱི་གྲང་རེག་སེམས་ཀྱིས་ཐུབ་མ་བྱུང་།།

རེ་ཞིག་རྟོལ་མེད་མགོ་བོ་གུག་བྱས་ཏེ།།

སུན་པའི་སྣང་བ་ས་ཆུ་ཐུར་བཞུར་ཚེ།།

ཁྱེད་ཀྱི་སྐད་རེད་མ་རེད་ཅི་ཞིག་གམ།།

བདག་ཡིད་ཀུ་མུད་འདབ་མ་ཕྱོགས་བཅུར་བཞད།།

རང་བྱུང་ངག་གི་སྒྲ་རྡུལ་རླུང་ལ་ཞོན།།

སྒྱུ་མའི་གར་གྱིས་མཉེན་ལྕུག་རྣ་དབང་དུ།།

འགོག་མེད་ཚོར་བའི་མྱོང་བྱེད་ཤེས་པ་ཡང་།།

སིལ་སིལ་འཐོར་ཞིང་ཕྱོགས་དང་ཕྱོགས་སུ་གྲམ།།

གླུ་ཚིག་གཅིག་ལ་ངག་གིས་སྐྱོར་བ་ཡིན།།

ཚིག་གི་དོན་ཁྲོལ་རྨོངས་པའི་དྲེགས་པ་གཞོམ།།

དབྱངས་ཀྱིས་བསྒྱུར་ཅིང་རིང་དུ་གྱེར་བ་ཡིས།།

སྙན་པ་རུས་གསེང་སྣུམ་ལྟར་ཞེན་ཞིང་སིམ།།

དེ་ལྟར་ཁྱེད་ནི་དབྱངས་ཅན་ལྷ་ཡི་སྲས།།

བདག་འདྲའི་མོས་དད་ཅན་གྱི་བགོ་སྐལ་ལ།།

དངོས་གྲུབ་མཆོག་གི་ཚུལ་དུ་གནངས་བ་ལ།།

དཔྱོད་ཤེས་བདག་ཀྱང་འཕྱང་མོའི་གནས་སུ་ཟགས།།

འགྲོ་སའི་རྡོ་གཅལ་ལམ་ཡང་གཅིག་པ་རེད།།

སྡོད་སའི་ཁང་པའི་སྤྱིལ་ཡང་གཅིག་པ་རེད།།

ང་ཡིས་ཁྱེད་རང་ཤིན་ཏུ་ངོ་ཤེས་པས།།

རྟག་ཏུ་མཐོང་ན་དགའ་བ་དཔག་མེད་འཕེལ།།

དེ་ལྟ་ན་ཡང་ཁྱེད་ནི་ཐང་གའི་ངོགས།།

མཛེས་སྙན་ཞི་བའི་ལྷ་མོའི་ངང་ཚུལ་བཞུགས།།

བདག་ནི་དེ་གའི་ཕྱི་ནང་སྲུང་བ་པོ།།

ལྟ་བ་ཙམ་ལས་རེག་ཐབས་ཡོད་མ་ཡིན།།

རེག་ཀྱང་ཅི་བྱ་རྫོབ་ན་གྱོང་གུད་རེད།།

ཁྱེད་ཉིད་རྟག་ཏུ་ཡོན་ཏན་བྱེ་བའི་དབུས།།

ངག་དབང་ལྷ་མོའི་ཚབ་བྱས་བཞུགས་མཛོད་དང་།།

དེ་བས་ལྷག་ཅིག་བསོད་ནམས་མི་དགོས་ཨང་།།

ང་ཡིས་ཁྱེད་ཀྱི་སྒོ་གསུམ་སྐྱེད་ཚལ་ལས།།

འཁྲུངས་པའི་མཛེས་པ་ཡོད་དོ་ཕྱོགས་གཅིག་ཏུ།།

སྙན་ཚིག་ངག་གི་ལམ་དུ་བཀོད་བྱས་ཏེ།།

བདེ་བའི་ཕུན་ཚོགས་ཟད་མེད་ལམ་དུ་བཏེགས། །

༼ ལྡོང་རོང་བསོད་ཐར། ༽