མཛེས་ཤིང་སྡུག་པའི་མཚམས་སྤྲིན་མཛེས་པོ་དེ་ནི་ཞེན་ཆགས་ཅི་ཡང་མེད་པའི་བཟོ་ལྟ་སྟོན་བཞིན་ཚང་ལ་ལོག་སོང་། རི་ཁ་རུ་ཡོད་པའི་འབྲོག་མོ་དེ་དང་དེའི་འཚོ་བཞིན་པའི་ནོར་ཁྱུ་དག་ཀྱང་གོམ་ཁ་གཅིག་རེ་གཉིས་རེ་བྱས་ཏེ་ཚང་ལ་ལོག་སོང་། ས་སྲོད་ནི་སུ་ཞིག་གིས་ཁྲིད་ཀྱང་འཁྲིད་ཐབས་བྲལ་བའི་ལན་ཆགས་ལྷག་མ་དེ་ཡིན་ནམ། ཡོད་ཚད་ཚང་ལ་ལོག་པའི་རྗེས་ཤུལ་དུ། ས་སྲོད་ནི་ཨ་མ་མེད་པའི་དྭ་ཕྲུག་འཁྱམ་པོ་ཞིག་དང་འདྲ་བར། ཕྱི་ནང་ནག་པོ་ནག་རྐྱང་ཡིན་པའི་རང་ཉིད་ལ་བལྟས་ནས་འདུག། ཁོ་རང་དྲོད་ཁོལ་ལྡན་པའི་གནས་ཚང་གང་ཞིག་ལ་ལོག་ས་ཡེ་ནས་མེད། དེ་ནི་ལན་ཆགས་གང་ཞིག་ལ་ལན་པ་ཡིན་མིན་སུས་ཀྱང་མི་ཤེས་ལ། དེའི་ཕྱོགས་ལ་བསམ་གཞིག་གཏོང་མཁན་ཡང་སུ་ཡང་ཡོད་མི་སྲིད་དོ། །

ས་སྲོད་ལ་མིག་ཟུང་ཆ་གཅིག་ཡོད། མིག་ཟུང་དེ་ཡིས་ལམ་ལམ་འཚེར་བའི་ཉི་འོད་དང་མཛེས་སྡུག་ལྡན་པའི་ནམ་མཁའ་མཐོང་མི་ཐུབ། མིག་ཟུང་དེ་ནི་ཉི་འོད་མཐོང་ཕྱིར་དུ་ཕྱེ་དགོས་པ་ཞིག་མ་ཡིན་པར། ཉི་མ་ནུབ་ཁའི་གྱེས་གདུང་དང་། སྐྱོ་གདུང་གི་འཚོ་བ། འཚོ་བ་དེས་སྐྱེད་པའི་འདུ་འབྲལ་མཐོང་ཕྱིར་དུ་ཕྱེ་དགོས་པ་ཞིག་རེད། ས་སྲོད་ཀྱི་མིག་ཟུང་དེ་ཡིས་རྒྱང་རིང་མཐོང་མི་ཐུབ། རྒྱང་རིང་ན་ཡོད་པའི་ཉི་མ་དེ་བས་མཐོང་མི་ཐུབ། ཁོས་མཐོང་བ་ནི་སུས་ཀྱང་མཐོང་ན་མི་འདོད་པའི་སྐྱོ་སྣང་གི་མུན་པ་ཁོ་ནའོ། །

ས་སྲོད་ནི། འབབ་འཐབ་ཀྱི་འཐབ་ར་ཞིག་དང་འདམ་ག་མང་པོའི་བར་ན་སྡོད་པའི་མི་ཚེ་ཞིག་དང་གཏན་ནས་མི་མཚུངས། ཁོ་ལ་སྐྱེ་འཆི་དང་རྒྱང་རིང་བཀླགས་པའི་འདུན་པ་ཡེ་ནས་མེད། ཁོ་རང་རླུང་བུ་ཞིག་གི་ཟོལ་གྱིས་ལྗོན་པ་ལྷབ་ལྷུབ་ཏུ་སྒུལ་ཆོག སྦྲང་མ་ཞིག་དང་འདྲ་བར་མཛེས་སྡུག་ལྡན་པའི་མེ་ཏོག་གི་དྲི་བསུང་ཅི་དགར་མནམ་ཆོག། ཤིན་ཏུ་ལྷིང་འཇགས་ཡིན་པའི་ས་སྲོས་རེ་རེར། ཁོས་ལྷུང་ལྷུང་དུ་བཞུར་བའི་ཆུ་ཕྲན་ལ་རྣ་བ་བླགས་ནས་ཧ་ཅང་བདེ་སྐྱིད་ལྡན་པའི་ནམ་མཁའ་གཞན་ཞིག་འཚོལ་ཐུབ།

ཉི་མ་ནུབ་རིར་ཡོལ་དུས། ས་སྲོད་ནི་ཞི་འཇམ་གྱིས་ཚུར་ཚུར་འོངས་ཏེ། འབྲོག་མོ་དཀྱུས་མ་ཞིག་གི་སྐྲའི་ལན་བུའི་ནང་དུ་གནས་ཚང་བཅའ་ཆོག། གནས་ཚང་དེ་ནས་ཞོགས་པའི་ཉི་ཟེར་གྱི་འོད་མདངས་མ་འཆར་བར་དུ་བཞུགས་ཆོག། དུས་ཡུན་རིང་རྒྱུ་མེད་ཀྱང་ཉི་ཟེར་ས་ལ་མ་འཕོས་པའི་བར་གླགས་དེར་གནས་དེ་ནས་ཞི་འཇགས་ཀྱིས་སྐུ་ངལ་གསོ་ཆོག། འབྲོག་མོ་དེ་ནི་སུ་ཞིག་ཡིན་ནམ། ལུས་ལ་ལྕི་དྲི་འཐུལ་བའི་འབྲོག་མོ་ཞིག་ཡིན་ནམ། ཡང་ན་སྤོས་ཆུ་སིམ་སིམ་འཐུལ་བའི་འབྲོག་མོ་ཞིག་ཡིན་ངེས། དོན་དུ་དེ་ནི་སྙིང་ལ་ཉེ་བའི་བུ་མོ་ཞིག་ལས་འབྲོག་མོ་ཞིག་ཡིན་མི་སྲིད་ཨང་། ༼ ཚོར་སྦྲང་། ༽