ཞོགས་པའི་ཉི་འོད་ཤར་རི་ལས་འཚེར་བས།
ཆུ་བོའི་འགྲམ་གྱི་སློབ་གླིང་གསེར་གྱིས་བརྒྱན་པ་
ལྟར་མཚར་ཞིང་སྡུག།
བགྲང་མི་ཚར་བའི་ཞོགས་པ་རེ་རེར།
སྒེའུ་ཁུང་ལས་མཐོང་བའི་ཤེས་རིག་གི་ཕ་ས་འདི།
ལྷ་ཡུལ་ལ་འགྲན་བཟོད་ཅིང་མི་ཡུལ་ལ་གཏམས་རི་བས།
ཆུ་བོའི་རྦ་རླབས་དང་འགྲོགས་པའི་དཔེ་ཀློག་གི་
སྒྲ་དབྱངས་རྣ་བར་སྙན།
ཉི་འོད་ཀྱི་བྱིན་རླབས་ཕོག་པའི་སློབ་གླིང་འདིར།
གནའ་བོའི་ཤེས་རབ་ལ་དད་བཀུར་ཆེ་ཞིང་།
དུས་རབས་ཀྱི་དཔལ་ཡོན་ལ་མཁྱེན་པ་རྒྱས་པའི།
དྲིན་ཆེ་ལ་བཀའ་བཙན་པའི་དགེ་རྒན་དག།
སློབ་དཔོན་ཨ་ནུའི་དམ་ཚིག་བསྲུངས་ཏེ།
མདུན་སྐྱོད་ཀྱི་ལམ་སྟོན་མཛད་པར་བྲེལ།
ཨ་མའི་སྨོན་ལམ་དང་འགྲོགས་ཤིང་།
ཨ་ཕའི་བསླབ་བྱ་དང་འདྲིས་ཏེ།
མཁས་པའི་ལེགས་བཤད་ཀྱི་པོ་ཏི་མང་པོ་རྒྱབ་ཏུ་ཁུར་ནས།
རིག་པའི་རྩལ་ལ་འགྲན་ཏེ་དམ་པའི་ཚུལ་བསླབ།
དབྱངས་གསལ་སོ་བཞི་གྲེ་བར་བསྐྱིལ་ནས།
མེས་པོའི་ལོ་རྒྱུས་ཀྱི་དབྱངས་རྟ་གྱེར་ཏེ།
ཤེས་རིག་དང་ཡོན་ཏན་གྱིས་རྒྱུད་ཐུལ་བའི།
ཁོག་པའི་སྙིང་ལྟ་བུའི་གཞོན་ནུ་ཚོ་སློབ་སྦྱོང་ལ་བྲེལ།
མཐར་ཕྱིན་དང་གསར་ཞུགས་ཆུ་བོ་བཞིན་རྒྱུན་རིང་བས།
ཐུན་མོང་གི་རེ་སྨོན་ཡང་ཞོགས་པ་དང་འགྲོགས་ནས་ཡོད།
༼ བཀྲ་ཤིས་གཡང་སྒྲོན།༽