བྲག་ཤེལ་དཀར་གྱི་རྩེ་མོ་དགུང་ལ་ཟུག་པའི།།
གནམ་ཨ་སྔོན་ཀྱི་སྤྲིན་པའི་གར་སྟབས་ཀློང་ནས།།
འབྲུག་ཕོ་ཆུང་གི་སྐད་སྙན་ལྷང་ལྷང་གྲག་ཚེ།།
དབྱར་སྦྲང་ཆུང་གི་སེམས་ངལ་རི་ལ་སིམ་ཡོད།།
ཞེ་འདང་བརྩེ་ཡི་རྨི་ལམ་འཕྲོ་མར་ལུས་པའི།།
ངག་འགྱུར་ཁུག་གི་དགའ་སྐྱོའི་སེམས་གཞས་སྐྱ་བོ།།
སྙིང་དམར་ཆུང་གི་འདབ་མར་ལྷག་མེད་སིམ་ན།།
གཤིས་མི་རྟག་གི་རང་མདངས་སེམས་ལ་འཁྱིལ་ཡོང་།།
གཞོན་དར་ཐོག་གི་སྣང་བ་སྤྲིན་དཀར་ཕྱུག་མོ།།
དགུང་ཨ་སྔོན་ཀྱི་དབྱིངས་རུམ་དཀྲིགས་ནས་ཕེབས་ཀྱང་།།
ནང་སེམས་ཉིད་ཀྱི་གཤོག་པའི་མཁའ་ལམ་མ་ཆོད།།
དོན་རང་སྣང་གི་བདེན་པ་ངག་ལ་འཁྱིལ་བྱུང་།།
ཚེ་འདི་སྣང་གི་བཅོས་མའི་ངོ་གདོང་དོར་བའི།།
གཤིས་མི་རྟག་གི་བརྗོད་པ་དོན་ལ་གྲུབ་པའི།།
སྔོན་མཁས་གྲུབ་ཀྱི་བཞུད་ལམ་སྙིང་ལ་འཁྱིལ་ན།།
སེམས་རེ་དོགས་ཀྱི་སྨུག་པ་གཞི་ནས་ལོས་དྭངས།།
གཤིས་དགའ་སྡུག་གི་ཆུ་མོ་བྲུག་པའི་གནོད་རྐྱེན།།
སེམས་ནང་འཁོར་གྱི་རིག་པ་ཁོ་ནས་སེལ་བ།།
དོན་རང་སྣང་ལ་ལྷོད་ཀྱིས་འབབ་པ་བྱུང་ན།།
གནད་གོ་རིགས་ཀྱི་བདེན་པ་སྙིང་ལ་འབབ་ཡོང་།།
གཞོན་མེ་ཏོག་གི་ཟུར་མིག་འདོད་གདུང་རྩེད་དགའ།།
རྒྱུད་ཤེས་རབ་ཀྱིས་བརྟག་པའི་ལས་ལ་མ་ཞུགས།།
ནང་ཚོར་བ་ཡི་ཨ་ལོང་གཅིག་ལ་བསྒྲིལ་ན།།
ཁ་ཐར་འདོད་ཀྱི་རི་མོ་འཇའ་གཟུགས་འདྲ་ལེ།།
རྒྱུ་དབང་ཐང་གི་དྲེགས་པ་སྙིང་ལ་འདྲིས་པའི།།
རང་དམན་ས་རུ་འཛིན་པའི་ཞེ་བློ་གཏིང་བྲལ།།
གདོན་དུག་གསུམ་གྱིས་བྲོ་གར་ནང་ནས་འཁྲབ་ན།།
བྱམས་སྙིང་རྗེ་ཡི་སེམས་ཁམས་ཇི་ལྟར་བསྐྲུན་ནམ།།
བློ་ཤེས་རབ་ཀྱི་མདུང་སོས་ཇི་ལྟར་སློག་ན།།
ནང་མ་རིག་པའི་རྐྱེན་གདོན་དེ་ལྟར་ཤེས་ཀྱང་།།
དོན་ལག་ལེན་ཀྱི་རེ་བ་རུ་མ་བསམ་ན།།
ཡིད་སྐྱོ་སྡུག་གི་སྨུག་པ་སྙིང་ལ་འཐིབ་ཡོང་།།
ཕྱི་འབྱོར་ཕྱུག་གི་མེ་ཏོག་མཛེས་སྡུག་མཐོང་ཚེ།།
སྙིང་འདོད་སྲེད་ཀྱི་སྦྲང་ཆུང་གར་སྟབས་སྒྱུར་བ།།
གཤིས་མི་རྟག་གི་སྒྱུ་མའི་ལྟད་མོ་རེད་བསམ།།
སེམས་བསམ་པ་འདི་མི་ཚེའི་དཔལ་དུ་སྨིན་ཤོག།
མར་གཙང་ཆབ་ཀྱི་རླབས་དཀར་ཆུ་ཡི་ཟེགས་མ།།
སྟོད་གངས་དཀར་གྱི་ཕྱིང་དཀར་དབུ་ཞྭ་དཀར་ཆུང་།།
སེམས་དྭངས་གཙང་གི་ངོ་མཚར་དཔེ་ལ་བཀོད་ནས།།
གཤིས་རྣམ་དཔྱོད་ཀྱི་རྣོ་སོ་དྲུང་ནས་འབྱིན་ཤོག།
༼ སྣང་བ་རང་གྲོལ། ༽