ཁྱོད་ཀྱི་གླུ་སྐད་་་་་་
དབྱངས་ཅན་མའི་པི་ཝང་གི་རྒྱུད་སྐུད་ལས་འཕྲོས་ཏེ་་་་་་་
བདག་གི་ཡིད་དུ་ལྷུང་།
སྙན་ཞིང་འཇེབས་པ།
ཆེས་ཐོག་མའི་བརྩེ་འདང་མངར་མོ་དེ་ཡང་བསྐྱར་བསླངས།
མྱ་ངན་གྱི་རླབས་སྒྲ་དང་།
སྐྱོ་གདུང་གི་ཟེགས་མ་ཡང་འཐོར།
འཚོ་བའི་རྒྱ་མཚོ་རུ་ཁྱེད་ཀྱི་གླུ་སྐད་འཁྲུངས་པ་ནས་བཟུང་།
ངའི་སེམས་ཀྱི་སྐྱེད་ཚལ་ལ་དགའ་སྤྲོའི་མེ་ཏོག་འབུས།
ངའི་ཚོར་བའི་གཤིས་ཀ་ལ་དྭངས་གསལ་གྱི་ཟླ་བས་བརྒྱན།
ཁྱོད་ཀྱི་གླུ་སྐད་་་་་་་་་་་
ཁུ་བྱུག་གི་གདངས་དབྱངས་ལས་འཕྲོས་ཏེ་་་་་་་་
བདག་གི་ཡིད་དུ་ལྷུང་།
དབྱར་གཞུང་གི་གཙང་པོའི་བཞུར་སྒྲ་བཞིན།
སྨྲ་མི་ཤེས་པའི་ཚོར་བའི་སྤང་ཐང་ལ་འཐིམ།
དགའ་སྤྲོ་དང་བརྩེ་བའི་འཇའ་ཚོན་བཀྲ་བར་བྱས།
མི་ཚེའི་ཆུ་རྒྱུན་དུ་ཁྱེད་ཀྱི་དབྱངས་རྟ་གྲགས་པ་ནས་བཟུང་།
ངའི་ཕུགས་འདུན་གྱི་ལམ་ཁ་ལ་རེ་བའི་འོད་སྣང་བསྩལ།
རེ་སྨོན་གྱི་མྱུ་གུ་ལ་གསོན་སྟོབས་ཀྱི་ཆར་ཆུ་གནང་།
ཁྱོད་ཀྱི་གླུ་སྐད་་་་་་་
དྲི་ཟའི་རྒྱུད་མངས་ལས་འཕྲོས་ཏེ་་་་་་་་་
བདག་ཡིད་དུ་ལྷུང་།
གདངས་དབྱངས་ལ་འཐིམ་པའི་མེས་པོའི་དབྱངས་རྟ་བཞིན།
ཚོར་བའི་རུས་རྐང་དང་འདྲེས།
ངའི་སྙན་ངག་གི་རི་རྩེར་ཁྱེད་ཀྱི་གླུ་སྐད་འཁྲུངས་པ་ནས་བཟུང་།
ངའི་ངག་གི་ཕོ་བྲང་ལ་མེ་ཏོག་གི་འཇའ་ཚོན་འཁྱུག
ཚོར་བའི་དབྱངས་རྟ་ལ་མེས་པོའི་ཟུངས་ཁྲག་འདྲེས།
རེ་བའི་འོད་སྣང་ལ་རྒྱུ་སྐར་གྱི་ཕྲ་ཚོམས་འཁོར།
ཁྱོད་ཀྱི་གླུ་སྐད་་་་་་་་་་་
༼ བདེན་མྱིག། ༽