ཞིན་ཧྭ་གསར་འགྱུར་ཁང་པེ་ཅིང་ནས་སྤྱིཟླ2ཚེས28ཉིན་གློག་འཕྲིན་འབྱོར་གསལ། སྤྱི་ཟླ3པའི་ཚེས1ཉིན་དཔར་དུ་བསྐྲུན་པའི《བདེན་འཚོལ》དུས་དེབ་འདོན་ཐེངས་ལྔ་པའི་ཐོག། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གི་རྩོམ་ཡིག་གལ་ཆེན《འགན་འཁྲི་འཁུར་འདོད་པ་དང་། འགན་འཁྲི་འཁུར་ཕོད་པ། འགན་འཁྲི་འཁུར་མཁས་པ་བཅས་སྲོལ་བཟང་དུ་བསྒྱུར་དགོས》ཞེས་པ་བཀོད་ཡོད་པ་རེད། དེ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི2012ལོའི་ཟླ་བ12པ་ནས2025ལོའི་ཟླ་བ12པའི་བར་གྱི་འབྲེལ་ཡོད་རྣམ་བཤད་གལ་ཆེན་གྱི་གཅེས་བཏུས་ཤིག་རེད། རྩོམ་ཡིག་ནང་ནན་བཤད་བྱས་དོན། དངོས་སྒྲུབ་ཀྱིས་རྒྱལ་ཁབ་དར། སྟོང་བཤད་ཀྱིས་རྒྱལ་དོན་འཕྱུགས། ཏང་གི་ཚོགས་ཆེན་ཉི་ཤུ་པའི་ཐོག་བཀོད་པའི་བརྗིད་ཆེའི་འཆར་གཞི་དེ་མཛེས་སྡུག་ལྡན་པའི་དོན་དངོས་སུ་འགྱུར་བར་རིམ་ཁག་འགོ་ཁྲིད་ལས་བྱེད་པས་རང་འགན་ཐེག་པ་ཁུར་ལེན་བྱེད་དགོས། རྒྱང་ལམ་གསར་པར་བདེ་ཞིང་སྙོམས་པའི་ལམ་ཆེན་ཤ་སྟག་ཡིན་མི་སྲིད། ང་ཚོར་འགྲན་སློང་གལ་ཆེན་དང་། ཉེན་ཁ་གལ་ཆེན། འགོག་རྐྱེན་གལ་ཆེན། འགལ་བ་གལ་ཆེན་བཅས་མང་པོ་འཕྲད་ངེས་པས། འགོ་ཁྲིད་ལས་བྱེད་པར་ངེས་པར་དུ་ཐེག་པ་ཁུར་ལེན་གྱི་སྙིང་སྟོབས་ཆེན་པོ་ལྡན་དགོས། རིམ་ཁག་འགོ་ཁྲིད་ལས་བྱེད་པས་ལུས་པོ་ཏང་ལ་འབུལ་བ་དང་ཉིན་མཚན་མེད་པར་སྤྱི་དོན་དུ་གཞོལ་ནས། དུས་དང་རྣམ་པ་ཀུན་ཏུ་སེམས་ཁྲལ་བྱེད་པའི་འགན་འཁྲིའི་སེམས་པ་དང་རང་འགན་ཐེག་པ་ཁུར་ལེན་ཧུར་ཐག་བྱེད་པའི་སྙིང་སྟོབས་ཀྱིས་ཏང་དང་མི་དམངས་ཀྱི་ཆེད་དུ་འགན་འཁྲི་གཙང་སྒྲུབ་དང་འགན་འཁྲི་ཡག་པོ་འཁུར་དགོས།

རྩོམ་ཡིག་ནང་བསྟན་དོན། ལས་བྱེད་པས་རང་འགན་ཐེག་པ་ཁུར་ལེན་བྱེད་ཕོད་པ་ནི་ཆབ་སྲིད་ཀྱི་གཤིས་རྒྱུད་རེད་ལ་སྲིད་སྐྱོང་གི་འགན་འཁྲི་ཞིག་ཀྱང་རེད། ཐེག་པ་ཁུར་ལེན་ཇི་ཙམ་ཆེ་ན་དེ་ཙམ་གྱིས་བྱ་གཞག་ཆེ་བ་སྒྲུབ་ཐུབ་པ་དང་། འགན་འཁྲི་ཇི་ཙམ་ཁུར་ན་དེ་ཙམ་གྱིས་གྲུབ་འབྲས་གཏོད་ཐུབ། དཔོན་པོ་ཁོ་ན་བྱེད་བསམ་པ་ལས་ལས་ཀ་བྱེད་མི་འདོད་པ་དང་། དབང་ཆ་ཁོ་ན་འཛིན་བསམ་པ་ལས་འགན་འཁྲི་འཁུར་མི་འདོད་པ། གཟི་བརྗིད་ཁོ་ན་བསམ་པ་ལས་ཤུགས་འདོན་མི་འདོད་པ་བཅས་བྱེད་མི་རུང་། ཏང་ལ་ལྷག་བསམ་རྣམ་དག་དང་། ཏང་གི་སེམས་ཁྲལ་སེལ་བ། ཏང་གི་ཆེད་དུ་འགན་འཁྲི་སྒྲུབ་པ། དམངས་ལ་བདེ་སྐྱིད་སྐྲུན་པ་བཅས་ཀྱི་ཆབ་སྲིད་ཀྱི་ཐེག་པ་ཁུར་ལེན་དང་། ས་ཁོངས་སྲུང་བའི་འགན་འཁྲི་ཡོད་པ་དང་། ས་ཁོངས་སྲུང་བའི་འགན་འཁྲི་ཁུར་བ། ས་ཁོངས་སྲུང་བའི་འགན་འཁྲི་སྒྲུབ་པ་བཅས་ཀྱི་རང་འགན་ཐེག་པ་ཁུར་ལེན་ལ་བརྟེན་ནས། ཡིན་མིན་ཆེན་པོའི་མདུན་དུ་རལ་གྲི་འཕྱར་ཕོད་པ་དང་། འགལ་བའི་མདུན་དུ་དཀའ་བར་མི་འཛེམ་པར་མདུན་དུ་སྐྱོད་ཕོད་པ། ཉམས་ཉེན་གྱི་མདུན་དུ་འཛེམ་བག་མེད་པར་དོན་ཕོད་པ། ནོར་འཁྲུལ་གྱི་མདུན་དུ་འགན་འཁྲི་ཁུར་ཕོད་པ། ཚུལ་མིན་སྤྱོད་ཚུལ་གྱི་མདུན་དུ་འཐབ་རྩོད་མཐའ་གཅིག་ཏུ་བྱེད་ཕོད་པ་བཅས་བྱེད་དགོས། （ པར་ངོས་གཉིས་པར་གཟིགས།）