2026ལོའི་སྤྱི་ཟླ2པའི་ཚེས20ཉིན་དང་བོད་རབ་རྒྱན་མེ་ཕོ་རྟ་ལོའི་ལོ་སར་ཚེས3ཉིན། འབའ་ཐང་རྫོང་མདོག་མཚར་གྲོང་སྡེས་སྐྱིད་པོ་འབའ་བ་ལུང་པ། བདེ་ལེགས་འབྱུང་བའི་ས་ཆ། མེ་ཕོ་རྟ་ལོར་གཡང་གི་མཚོ་མོ་འཁྱིལ་སོགས་ཀྱི་བཀྲ་ཤིས་རྟེན་འབྲེལ་ཞུ་བའི་སྲོལ་རྒྱུན་རྟ་རྒྱུག་འདུ་ཚོགས་གཟབ་རྒྱས་ངང་སྤེལ་བ་རེད།

ཕྱོགས་སོ་སོ་ནས་ཡོང་བའི་ལྟད་མོ་བ་རྣམས་ཀྱིས་ལུས་ལ་གཟབ་ཆས་སྤྲས་ཤིང་། བཟའ་བཏུང་ཞིམ་དགུ་འཛོམས་པ་ཁུར་ནས་རྟ་རྒྱུག་འགྲན་ཡུལ་དུ་འཛོམས་ཏེ་གནམ་ལོ་གསར་པའི་དགའ་སྟོན་ལ་རོལ།

ཤེས་རྟོགས་བྱུང་བར་གཞིགས་ན། རྟ་རྒྱུག་གི་རྒྱུག་ཐག་ནི་སྤྱི་ལེ10ཡན་ཡིན་ཞིང་སྐྱ་མིའི་ལྗིད་ཚད་རྒྱ་མ120ལས་རྒལ་མི་ཆོག་ཅིང་། རྟ་ཨང་ཀི་བཅུ་གཅིག་པ་ཡན་ཆད་ལ་བྱ་དགའ་སྤྲད་རྒྱུ་ཡོད་པ་རེད།

ས་གནས་དེ་གའི་དམངས་ཁྲོད་ངག་རྒྱུན་དུ། རྟ་མགོ་ཡིད་བཞིན་ནོར་བུ་དང་རྟ་རྔ་རྡོ་རྗེ་མདུད་པ། རྨིག་བཞི་རླུང་གི་འཁོར་ལོ་རེད། འདོ་བ་རྟ་ཡི་ཡན་ན་རིན་ཆེན་མེད་ཅེས་པ་ལྟར། དུད་ཚང་རེར་ཧ་ལམ་རྟ་རེ་གསོ་ཡོད་དེ་འགྲན་སྡུར་ལ་ཞུགས་མཁན་རྟ་མཆོག་ལོ་རེ་བཞིན་ཇེ་མང་ནས་ཇེ་མང་དུ་འགྲོ་བཞིན་ཡོད།།

（ ཡེ་ཤེས་ཀྱིས་བྲིས་ཤིང་པར་བླངས།）