ལོ་རྙིང་པའི་འགལ་རྐྱེན་མུན་པའི་ཚོགས།།
ལོ་གསར་པའི་ཉི་གཞོན་གྱིས་བཅོམ་སྟེ།།
ཡུལ་འཇིག་རྟེན་འཁོར་བའི་ཐང་ཆེན་དུ།།
སྐྱིད་འཚོ་བའི་ལང་ཚོ་སྨིན་པར་ཤོག།
བཀྲ་ཤིས་པའི་གནམ་ལོ་གསར་པའི་ནང་།།
སྐྱབས་བླ་མའི་མཛད་འཕྲིན་རྒྱས་པར་ཤོག།
དྲིན་ཡབ་ཡུམ་ཚེ་བསོད་འཕེལ་བར་ཤོག།
ནང་ཕུ་ནུའི་ཅི་བསམ་འགྲུབ་པར་ཤོག།
རྒན་ཚེ་ཐག་ཆུ་ལས་རིང་བར་ཤོག།
གཞོན་རིག་པའི་འདབ་ལག་རྒྱས་པར་ཤོག།
ཆུང་བྱིས་པའི་མདུན་ལམ་ཡངས་པར་ཤོག།
ཁྱིམ་བཟའ་མི་ལྷན་འཛོམས་དགོད་སྒྲའི་ཁྲོད།།
ཟས་སྣ་མང་སྡེར་ཁའི་དཔལ་ལ་རོལ།།
ལུས་བདེ་མོའི་གར་སྟབས་ལྡེམ་ལྡེམ་བསྒྱུར།།
ངག་སྙན་མོའི་གླུ་གཞས་སིང་སིང་སྒྲོག།
སྐྱིད་གནམ་ལོ་གསར་པའི་རྟེན་འབྲེལ་རེད།།
ཡུལ་འཛམ་གླིང་གོ་ལའི་ཡངས་སྟེང་དུ།།
རྒྱུ་དཔལ་འབྱོར་འདོད་དགུ་ཆར་དུ་སྙིལ།།
སྒོས་རྒྱལ་ཁབ་མཐུན་པའི་ལག་རྡང་སྦྲེལ།།
ཕྱི་སྣོད་ཀྱི་འབྱུང་བཞིའི་གནོད་པ་བྲལ།།
ནང་བཅུད་ཀྱི་ནད་མུག་མཚོན་འཁྲུག་ཞི།
བཀྲ་ཤིས་པའི་མེ་ཕོ་རྟ་ཡི་ལོར།།
དོན་འགྲུབ་པའི་ཁ་གཡང་འདི་ལྟར་ཕུལ།།
༼ ཨ་བཙུན་གཡུང་དྲུང་བཀྲ་ཤིས། ༽