བཀྲ་ཤིས་གནམ་ནས་ཉི་ཟླའི་ཟེར་བརྒྱ་འཕྲོས།།
བཀྲ་ཤིས་ས་ནས་མེ་ཏོག་སྣ་བརྒྱ་བཞད།།
བཀྲ་ཤིས་རྟེན་འབྲེལ་གངས་རིའི་རྩེ་ནས་ཤར།།
བཀྲ་ཤིས་བོད་ཀྱི་ལོ་སར་རྟེན་འབྲེལ་བཟང་།།
བཀྲ་ཤིས་མཁའ་ལ་བདུད་རྩིའི་ཆུ་འཛིན་འཁྲིགས།།
བཀྲ་ཤིས་ས་ལ་ཕུན་ཚོགས་སྙེ་མ་འཁྲུངས།།
བཀྲ་ཤིས་བོད་ལ་མི་ནོར་ཆོས་གསུམ་འཛོམས།།
བཀྲ་ཤིས་ཚེ་བསོད་རྒྱས་པའི་ལོ་སར་བཟང་།།
བཀྲ་ཤིས་གནམ་ལོ་གསར་པའི་དུས་བཟང་ལ།།
བཀྲ་ཤིས་མཆོད་པ་དཀོན་མཆོག་གསུམ་པོ་ལ།།
བཀྲ་ཤིས་བདེ་ལེགས་ཕུན་སུམ་ཚོགས་འགྱུར་པའི།།
བཀྲ་ཤིས་སྨོན་ལམ་རིགས་དྲུག་ཡོངས་ལ་བཏབ།།
བཀྲ་ཤིས་གནམ་ལོ་གསར་པའི་དུས་བཟང་ལ།།
བཀྲ་ཤིས་རླུང་དར་བཏགས་ཤིང་བསང་ཕུལ་ཏེ།།
བཀྲ་ཤིས་མཆོད་པ་ཡུལ་ལྷ་གཞི་བདག་ཕུལ།།
བཀྲ་ཤིས་བོད་ཀྱི་སྣོད་བཅུད་ལེགས་པར་ཤོག།
བཀྲ་ཤིས་གནམ་ལོ་གསར་པའི་དུས་བཟང་ལ།།
བཀྲ་ཤིས་ཉི་མ་ཨ་སྔོན་དགུང་ནས་ཤར།།
བཀྲ་ཤིས་ཟླ་བ་བར་སྣང་དབྱིངས་ནས་འཚེར།།
བཀྲ་ཤིས་འབྲུ་རིགས་དོག་མོ་ས་ནས་རྒྱས།།
བཀྲ་ཤིས་གནམ་ལོ་གསར་པའི་དུས་བཟང་ལ།།
བཀྲ་ཤིས་ཕྱི་ནང་ཀུན་གྱི་བོད་མི་ལ།།
བཀྲ་ཤིས་ལེགས་ཚོགས་ཀུན་གྱི་དགེ་ལེགས་ཀྱིས།།
བཀྲ་ཤིས་བདེ་ལེགས་ཕུན་སུམ་ཚོགས་གྱུར་ཅིག།
བཀྲ་ཤིས་གནམ་ལོ་གསར་པའི་དུས་བཟང་ལ།།
བཀྲ་ཤིས་གཡང་གིས་ཕྱུག་པའི་ར་བའི་ནང་།།
བཀྲ་ཤིས་དཔལ་གྱི་དགེ་ལེགས་ཀུན་འཛོམས་ཏེ།།
བཀྲ་ཤིས་ཕུན་སུམ་ཚོགས་པའི་སྨོན་ལམ་ཞུ།།
བཀྲ་ཤིས་གནམ་ལོ་གསར་པའི་དུས་བཟང་ལ།།
བཀྲ་ཤིས་ཚེ་རིང་ནད་མེད་ཡོང་བ་དང་།།
བཀྲ་ཤིས་དོན་འགྲུབ་རྒྱུ་ནོར་ལོངས་སྤྱོད་འཕེལ།།
བཀྲ་ཤིས་བརྩོན་འགྲུས་བློ་རིག་འཕེལ་བར་ཤོག།
བཀྲ་ཤིས་གནམ་ལོ་གསར་པའི་དུས་བཟང་ལ།།
བཀྲ་ཤིས་ཀུན་འཛོམས་གངས་ལྗོངས་ཕྱུག་མོ་ལ།།
བཀྲ་ཤིས་སྲིད་འབྱོར་རིག་གསུམ་འཕེལ་གྱུར་ནས།།
བཀྲ་ཤིས་ཡང་ནས་བཀྲ་ཤིས་བདེ་ལེགས་ཞུ།།
བཀྲ་ཤིས་གནམ་ལོ་གསར་པའི་དུས་བཟང་ལ།།
བཀྲ་ཤིས་བོད་ལ་བདེ་སྐྱིད་འོད་སྣང་འཚེར།།
བཀྲ་ཤིས་སྒྲ་དབྱངས་འཛམ་གླིང་ཡོངས་ལ་ཁྱབ།།
བཀྲ་ཤིས་དགེ་མཚན་འགྲོ་ཀུན་ཁྱབ་གྱུར་ཅིག།
༼ མིག་དམར།༽