མཚན་དཔེའི་རི་མོ་ངོ་མཚར་བཀོད་པ་ལྷད་
མེད་རང་བྱུང་ཆུ་སྐྱེས་ཚོགས་བཞིན་མཐོང་
ན་མི་མཐུན་མེད་པའི་སྐུ།།
བསླུ་མེད་སྙན་འཇེབས་ཚིག་དོན་སྒྱུ་འཕྲུལ་
གཏན་མེད་སྨྲས་པ་གཅིག་གིས་སྣ་ཚོགས་
འགྲོ་བའི་དབང་པོར་འཕྲོག་
པའི་གསུང་།།
ཇི་ལྟ་ཇི་སྙེད་ཤེས་བྱའི་གནས་ལ་མངོན་ལྐོག་
རྣམས་ལ་ཅུང་ཟད་མི་མངའ་རྣམ་པ་
ཐམས་ཅད་མཁྱེན་པའི་ཐུགས།།
རྐང་གཉིས་གཙོ་བོ་མཆོག་གི་དམ་པ་ཁྱབ་བདག་
འགྲོ་མགོན་བི་མའི་གར་རོལ་དུས་ཀུན་
དགེ་ལེགས་ཆར་དུ་བསྙིལ།།
ཡིད་འཕྲོག་སྟོང་གི་རྩེ་མོར་སོན་པའི་
ལུས་ཕྲའི་ཕྱག་སོར་རྩེ་མོས་བསྐུལ་བའི་
རྒྱུད་མངས་སྒྲར།།
སྲིད་གསུམ་ཆོས་ཀུན་ཉམས་འགྱུར་ངག་གི་
གླུ་རུ་ལེན་པའི་དྲི་ཟའི་ན་ཆུང་དབྱངས་ཅན་མ།།
མི་ཕྱེད་དད་པའི་སྙིང་གི་ཐིག་ལེ་ཐུགས་རྗེའི་
འཇོ་སྒེག་གར་གྱིས་རྟག་ཏུ་ལེགས་བཞུགས་ནས།།
སྙན་ངག་ཚིག་དོན་སྒྱུ་མའི་བང་མཛོད་
འཛད་མེད་ངག་གི་འདོད་པ་
འཇོ་བའི་ཤིས་པ་སྩོལ།།
མཆོད་བརྗོད་སེམས་ཀྱི་རི་མོ་སྔོན་དུ་བྲིས་ནས།།
ཁ་གཡང་ཚིག་གི་མེ་ཏོག་རགས་ཙམ་གཏོར་ན།།
རྟ་མཆོག་མེ་ཕོའི་གཡང་གི་ལོ་གཡང་གསར་པ།།
བདག་གིས་སེམས་མཚོན་ངག་གི་ཁ་གཡང་སྦྲེངས་ན། །
སྙན་འཇེབས་མགྲིན་པའི་དལ་ལེན་
ཚིག་གི་མཆོད་དབྱངས།།
ལོ་སར་ཁ་གཡང་ཐོག་མས་རོལ་དབྱངས་དཀྲོལ་ན། །
མཛའ་འདུན་བརྩེ་བའི་ཐུ་བྷོད་ཆོས་ཀྱི་ཞིང་ནས། །
རྒན་དར་གཞོན་གསུམ་སྐུ་གཟུགས་
བདེ་ཐང་ངས་འབོད། །
བདེ་སྐྱིད་ལུས་ཀྱི་ཉི་མ་གཏན་དུ་
ཤར་བར་ནས།།
དོན་འགྲུབ་ཉ་གང་ཟླ་བའི་
འོད་མདངས་འཚེར་ནས།།
ཕུན་སུམ་ཚོགས་པའི་
དག་ཞིང་གནས་མཆོག་འདི་ལ།།
བཀྲ་ཤིས་བདེ་ལེགས་ཡོང་བའི་
རྟགས་མཚན་རྒྱས་སོང་།།
ཕྱོགས་བཞི་གངས་དཀར་འོད་མདངས་
རྒྱས་པའི་ཆོས་ལྡན་མདོ་དབུས་ཁམས་གསུམ་
སྲིད་པའི་ཞིང་།།
འབྲུ་ལྔ་སྣ་ཚོགས་རྒྱུ་སྐར་བཀྲ་བའི་བོད་ལྗོངས་
ལག་ཕྲེང་གོ་བའི་ཚོགས་རྣམས་ལ།།
ཚེ་རིང་ནད་མེད་ཞི་བདེ་ཡོང་བའི་
གཏན་དུ་དགེ་མཚན་ཉི་མ་འཆར་བ་དང་།།
ཆོས་སྲིད་བསྟན་པ་ཡར་ཚེས་འཆར་བཞིན་
རྫོགས་མེད་སྙན་གྲགས་མཁའ་དབྱིངས་སྦྲེང་།།
ལང་ཚོ་གཞོན་པའི་བུང་བའི་ཚོགས་རྣམས་
སྣང་བ་གངས་ཀྱི་དབུ་རྩེ་མཐོ་བའི་ལོ།།
ཆུ་གཏེར་འཁྱིལ་བཞིན་སྒོ་ཕྱུགས་མ་ཉམས་གཡང་
གི་མཚོ་མོ་འཁྱིལ་བའི་ལོ།།
ཉི་གཞོན་གསར་པའི་འོད་མདངས་རྒྱས་
བཞིན་གཡང་རྫས་འདོད་འཇོ་རྟགས་མཚན་རྒྱས།།
གོས་ཚོན་དམར་སེར་ཐང་མ་རྡལ་བཞིན་
ཕྱོགས་ཀུན་ཁྱབ་པའི་ལོ་གཡང་བསུ།།
ཚིག་གི་ཚིག་སྙན་སྟོང་གིས་ལོ་གཡང་བསུ།།
མཛེས་ལ་མཛེས་སྡུག་འབུམ་གྱིས་ལོ་གཡང་བསུ།།
བཟང་ལ་བཟང་གསུམ་འཛོམས་པའི་ལོ་གཡང་བསུ། །
བདེ་ལ་བདེ་མཆོག་རོལ་བའི་ལོ་གཡང་བསུ།།
གཞོན་པ་བློ་བརྒྱ་རྒྱས་པའི་ལོ་གཡང་བསུ།།
རྒན་པ་ཚེ་ཐག་རིང་བའི་ལོ་གཡང་བསུ།།
དར་མ་ལང་ཚོ་མཛེས་པའི་ལོ་གཡང་བསུ།།
མི་ནོར་ཟས་གསུམ་འཛོམས་པའི་ལོ་གཡང་བསུ།།
རྒྱལ་པོ་དབང་ཐང་རྒྱས་པའི་ལོ་གཡང་བསུ།།
ཞིང་ལ་ལོ་ལེགས་རྒྱས་པའི་ལོ་གཡང་བསུ།།
བསམ་དོན་ཆོས་བཞིན་འགྲུབ་པའི་ལོ་གཡང་བསུ།།
འབད་མེད་ལྷུན་འགྲུབ་ཡོང་པའི་བཀྲ་ཤིས་ཤོག།
༼ དགེ་གྲྭ་རྒྱལ། ༽