སྤྱི་ཟླ3པའི་ཚེས3ཉིན། དཀར་མཛེས་ཁུལ་གྱིས“མྱུར་སྒྲུབ་ལ་བརྩི་མཐོང་། དངོས་སྒྲུབ་ལ་ཧུར་བརྩོན། དཀའ་སྒྲུབ་ལ་མི་སྐྲག། ཐབས་སྒྲུབ་ལ་མཁས་པ།”ཡི་གཙོ་དོན་ལག་ལེན་བྱེད་སྒོའི་སྐུལ་སློང་བཀོད་སྒྲིག་ཚོགས་འདུ་འཚོགས་ཤིང་། ཁུལ་ཨུའི་ཧྲུའུ་ཅི་ཀྲའོ་པོ་ཚོགས་འདུར་ཞུགས་ཤིང་གསུང་བཤད་གནང་བ་རེད། ཁོང་གིས་ཏང་གི་སྤྱོད་ཚུལ་འཛུགས་སྐྱོང་ལ་ཤུགས་སྣོན་པ་དང་སྲིད་འགན་ལག་རྗེས་ཡང་དག་པ་འཆང་བ་དང་ལག་ལེན་བསྟར་བའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྒྱས་བཤད་གལ་ཆེན་སློབ་སྦྱོང་དང་ལག་ལེན་མཐར་ཕྱིན་བསྟར་བ་དང་། ཏང་ཀྲུང་དབྱང་དང་ཞིང་ཆེན་ཏང་ཨུའི་ཐབས་ཇུས་བཀོད་སྒྲིག་ཁྱོན་ཡོངས་ནས་དོན་ཐོག་འཁྱོལ་བ། ཁུལ་ཡོངས་ཀྱི་ཏང་མི་ལས་བྱེད་པར་སྤྱོད་ཚུལ་བསྒྱུར་ནས་ཧུར་སྐྱོད་སྟོབས་ཤུགས་སློང་བ་དང་འགན་ཁུར་ལས་སྒྲུབ་ཀྱིས་འཕེལ་ཤུགས་སྡུད་པ་སྐུལ་ལྕག་དང་ཁྲིད་སྟོན་བྱེད་པ། “ལོ་ལྔའི་འཆར་འགོད་བཅོ་ལྔ་པ”འགོ་ཡག་མོ་རྩོམ་པའི་མཉམ་ཤུགས་སྟོབས་ཆེན་གཅིག་ཏུ་སྒྲིལ་ཅིང་། བབ་བསྟུན་འཕྲལ་སྒྲུབ་དང་རྗེས་སྙེག་མཆོང་བརྒལ་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་དཀར་མཛེས་ཁུལ་གྱི་ལེའུ་གསར་པ་འབྲི་ཆེད་བྱས་རྗེས་དེ་བས་ཆེན་པོ་གཞག་དགོས་ཞེས་ནན་གསུང་གནང་བ་རེད།

ཁུལ་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་ཧྲུའུ་ཏ་ཁྲུན་གྲོས་ཚོགས་སུ་ཞུགས་པ་དང་། ཁུལ་ཨུའི་ཧྲུའུ་ཅི་གཞོན་པ། ཁུལ་སྲིད་གྲོས་ཀྱི་ཀྲུའུ་ཞི་ཝང་ཡུས་ཆུང་གིས་ཚོགས་འདུ་གཙོ་སྐྱོང་གནང་བ་རེད།

ཀྲའོ་པོ་ཡིས་བསྟན་དོན། ད་ཐེངས་ཀྱི་གཙོ་དོན་ལག་ལེན་བྱེད་སྒོ་སྤེལ་རྒྱུ་དེ་ནི་སྲིད་འགན་ལག་རྗེས་ཡང་དག་པ་འཆང་བ་དང་ལག་ལེན་བསྟར་བའི་སྐོར་གྱི་ཏང་ཀྲུང་དབྱང་དང་ཞིང་ཆེན་ཏང་ཨུའི་སློབ་སྦྱོང་སློབ་གསོའི་བཀོད་སྒྲིག་དོན་འཁྱོལ་ནན་ཏན་བྱེད་པའི་ཞིབ་ཕྲའི་ལག་ལེན་ཞིག་ཡིན་ལ། ཁུལ་ཨུས་དཀར་མཛེས་ཁུལ་གྱི་གནས་ཚུལ་དངོས་ལ་དམིགས་ཤིང་། ལོ་རྒྱུས་ཀྱི་རང་སྐུལ་ཁོང་དུ་ཆུད་ཅིང་འཕེལ་རྒྱས་ཀྱི་འགྲོ་ཕྱོགས་དང་བསྟུན་ནས་བཏོན་པའི་བསམ་གཞིག་གལ་ཆེན་ཞིག་ཀྱང་ཡིན་ལ། དཀར་མཛེས་ཁུལ་གྱི“ལོ་ལྔའི་འཆར་འགོད་བཅོ་ལྔ་པ”དང་ཐ་ན་དུས་ཡུན་དེ་བས་རིང་བའི་ནང་འཕེལ་རྒྱས་སྤུས་ཚད་མཐོན་པོ་དང་བདེ་འཇགས་ཆུ་ཚད་དེ་བས་མཐོ་བར་སྐུལ་བའི་ངོས་ནས་བརྗོད་ན་དངོས་ཡོད་ཀྱི་དོན་སྙིང་དང་འཐབ་ཇུས་ཀྱི་དོན་སྙིང་གལ་ཆེན་ལྡན་ཡོད། གཙོ་དོན་ལག་ལེན་བྱེད་སྒོའི་བླང་བྱ་དང་དཔེར་སྡུར་གཞི་སྡུར་བྱས་ནས་ད་སྔའི་ལས་བྱེད་པའི་དཔུང་ཁག་ལ་གནས་པའི་རྗེས་ལུས་འདོད་ནས་སྒྲུབ་མི་བསམ་པ་དང་། བྱ་སྤྱོད་དལ་འགོར་མྱུར་དུ་མི་སྒྲུབ་པ། ཕྱི་ཚུལ་ཙམ་ལས་དངོས་སུ་མི་སྒྲུབ་པ། ལྗིད་དོར་ཡང་ལེན་སྒྲུབ་མི་ཕོད་པ། རྙིང་ཞེན་བག་འཁུམས་སྒྲུབ་མི་ཤེས་པ། གུས་སྐྲག་མི་ཤེས་གང་བྱུང་སྒྲུབ་པ་བཅས་ཕྱོགས་དྲུག་གི་གནད་དོན་ལ་ཞིབ་དཔྱད་ཡང་དག་པ་བྱ་དགོས། “མྱུར་སྒྲུབ་དང་། དངོས་སྒྲུབ། དཀའ་སྒྲུབ། ཐབས་སྒྲུབ”བཅས་ནི་ཁ་འབྲལ་ཐབས་མེད་པའི་བྱེད་ཐབས་ལྷན་སྦྱར་མ་ཡིན་ཞིང་། དེ་བཞི་པོ་རྩོད་སྒྲུབ་གཅིག་གྱུར་དང་གཅིག་ལ་གཅིག་བརྟེན་ཡིན་པས་ངེས་པར་དུ་གཅིག་ཤེས་ཀུན་གྲོལ་དང་གཞི་གཅིག་ཏུ་བསྐུལ་དགོས།

ཀྲའོ་པོ་ཡིས་ཁུལ་ཡོངས་ཀྱི་གོང་འོག་ཚང་མས་གཙོ་དོན་ལག་ལེན་བྱེད་སྒོ་དེ་སྲིད་འགན་ལག་རྗེས་ཡང་དག་པ་འཆང་བ་དང་ལག་ལེན་བསྟར་བའི་སློབ་སྦྱོང་དང་སློབ་གསོ་སྤེལ་བ་དང་ཟུང་འབྲེལ་བྱས་ནས་རང་ངོས་གསར་བརྗེའི་སྙིང་སྟོབས་ལ་བརྟེན་ནས་སྤྱོད་ཚུལ་གསར་བརྗེ་དང་ཕན་འབྲས་གསར་བརྗེར་ཡོང་བ་རྒྱུན་འཁྱོངས་ཏེ། མྱུར་སྒྲུབ་ལ་བརྩི་མཐོང་དང་། དངོས་སྒྲུབ་ལ་ཧུར་བརྩོན། དཀའ་སྒྲུབ་ལ་མི་སྐྲག། ཐབས་སྒྲུབ་ལ་མཁས་པ་བཅས་ཀྲུང་གོའི་ལུགས་ཀྱི་དེང་རབས་ཅན་གྱི་དཀར་མཛེས་ཁུལ་འཛུགས་སྐྲུན་གྱི་ལག་ལེན་ཁྲོད་དུ་ཁྱབ་པར་བྱས་ཏེ་དཀར་མཛེས་ཁུལ་གྱི་བྱ་གཞག་ཁག་ལོ་རྒྱུས་ཀྱི་འགོ་འཛུགས་ས་གསར་པའི་ཐོག་ཆེ་སྒྲུབ་འཕྲལ་སླེབས་དང་། གདོང་གཏད་རྗེས་སྙེག། རྗེས་ཡོང་སྔོན་སླེབས་བཅས་ཡོང་བར་སྐུལ་འདེད་ཧུར་ཐག་གཏང་དགོས་པའི་ནན་གསུང་གནང་།

ཚོགས་འདུར་ཁུལ་ཨུའི་རྒྱུན་ཨུ། རྩ་འཛུགས་པུའི་པུའུ་ཀྲང་ཝང་ཞིང་ཆོན་གྱིས་གཙོ་དོན་ལག་ལེན་བྱེད་སྒོ་གསལ་བཤད་གནང་བ་་དང་། རྫོང་དང་གྲོང་ཁྱེར། ཁུལ་རིམ་པའི་སྡེ་ཚན་ཁ་ཤས་ཀྱིས་འགན་ཁུར་བས་སྐད་ཆ་བཤད་པ་རེད།།（ ལྷ་འཛོམས་ཀྱིས་བསྒྱུར།）