སྤྱི་ཟླ3པའི་ཚེས3ཉིན་གྱི་ཕྱི་དྲོར་པེ་ཅིང་དུ་སྐབས་བཅུ་བཞི་པའི་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་གྲོས་ཚོགས་ཐེངས་བཞི་པར་ཞུགས་མཁན་སི་ཁྲོན་འཐུས་མི་ཚོགས་པས་བཅའ་སྡོད་བྱ་ཡུལ་དུ་ཚང་འཛོམས་གྲོས་ཚོགས་འཚོགས། ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཝང་ཞའོ་ཧུའེ་ཡིས་ཚོགས་འདུ་གཙོ་སྐྱོང་གནང་ཞིང་གསུང་བཤད་གནང་། ཚོགས་འདུར་ཝང་ཞའོ་ཧུའེ་སི་ཁྲོན་འཐུས་མི་ཚོགས་པའི་ཚོགས་གཙོ་དང་ཧྲི་ཞའོ་ལིན་དང་ལེའོ་ཅན་ཡུས། ཏུང་ཝེ་མིན། ཝང་ཡན་ཧྥེ། ལུའོ་ཆང་། དབྱང་ཞིང་ཕིང་། ཧོ་ཡན་ཀྲེང་བཅས་ཚོགས་གཙོ་གཞོན་པ་བདམས། ཚོགས་འདུར་སྐབས་བཅུ་བཞི་པའི་རྒྱལ་ཡོངས་མི་དམངས་འཐུས་ཚོགས་ཀྱི་གྲོས་ཚོགས་ཐེངས་བཞི་པའི་ཚོགས་ཆེན་གྱི་ཀྲུའུ་ཞི་ཚོགས་པ་དང་དྲུང་ཡིག་ཆེན་མོའི་མིང་ཐོའི་འཆར་ཟིན་དང་ཚོགས་ཆེན་གྱི་གྲོས་རིམ་འཆར་ཟིན་ལ་གྲོས་ཞིབ་བྱས་པ་དང་། ཚོགས་ཆེན་གྱི་འབྲེལ་ཡོད་བླང་བྱ་བརྒྱུད་བསྒྲགས་བྱས་པ་རེད།

ཝང་ཞའོ་ཧུའེ་ཡིས་གསུང་བཤད་ནང་བསྟན་དོན། སྐབས་བཅུ་བཞི་པའི་རྒྱལ་ཡོངས་མི་དམངས་འཐུས་ཚོགས་ཀྱི་གྲོས་ཚོགས་ཐེངས་བཞི་པ་ནི“ལོ་ལྔའི་འཆར་འགོད་བཅོ་ལྔ་པ”འགོ་ཚུགས་པ་དང་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཁྱོན་ཡོངས་ནས་སྐྲུན་པའི་འགག་རྩའི་དུས་མཚམས་སུ་སླེབས་སྐབས་འཚོག་པའི་ཚོགས་ཆེན་འགངས་ཆེན་ཞིག་ཡིན་ལ། ཏང་དང་རྒྱལ་ཁབ་ཀྱི་ཆབ་སྲིད་འཚོ་བའི་ཁྲོད་ཀྱི་དོན་ཆེན་ཞིག་ཀྱང་རེད། ཐེངས་འདིའི་ཚོགས་ཆེན་ལེགས་པར་འཚོག་པར། རྒྱལ་ཡོངས་མི་རིགས་ཁག་གི་མི་དམངས་རྣམས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་སྔར་ལས་དམ་ཟབ་བྱེད་པར་བསྐུལ་ཏེ། ཡིད་ཆེས་བརྟན་དུ་གཏོང་བ་དང་སྙིང་སྟོབས་སློང་བ། མ་འོངས་པའི་ལོ་ལྔའི་དཔལ་འབྱོར་དང་སྤྱི་ཚོགས་གོང་དུ་སྤེལ་བའི་འཆར་གཞི་མཉམ་དུ་ཇུས་འགོད་ལེགས་པར་བྱེད་པ། ད་ལོའི་ལས་དོན་ཁག་ཡག་མོ་ཏན་ཏིག་བསྒྲུབ་པ། “ལོ་ལྔའི་འཆར་འགོད་བཅོ་ལྔ་པའི”འགོ་ཡག་པོ་འཛུགས་པ་དང་གོམ་ཁ་ལེགས་ཕྱོགས་སུ་བསྒྱུར་བར་ཁག་ཐེག་བྱེད་པ་བཅས་ལ་དོན་སྙིང་ཧ་ཅང་གལ་ཆེན་ལྡན་པ་རེད།

ཝང་ཞའོ་ཧུའེ་ཡིས་ནན་གསུང་གནང་དོན། ད་ཐེངས་ཀྱི་ཚོགས་ཆེན་དུས་ཚོད་ཐུང་ཞིང་ལས་འགན་ལྕི་བས་སི་ཁྲོན་འཐུས་མི་ཚོགས་པའི་འཐུས་མི་ཚོར་འགན་སྒྲུབ་བླང་བྱ་དེ་བས་ནན་པོར་བཏོན་ཡོད། ཚང་མས་ཆབ་སྲིད་ཀྱི་ཚུགས་གནས་ནན་སྤར་དང་། འགན་འཁྲི་འཁུར་སེམས་སྔར་བས་ཆེ་རུ་གཏང་དགོས། ཁྲིམས་ལྟར་འགན་སྒྲུབ་བྱེད་ཤུགས་ཆེ་རུ་བཏང་ནས་ཞིང་ཆེན་ཡོངས་ཀྱི་མི་དམངས་ཀྱི་མངགས་བཅོལ་གལ་ཆེན་ཕྲག་ཏུ་ཏན་ཏིག་འཁུར་དགོས། སྒྲིག་ཁྲིམས་སྲུང་བའི་འདུ་ཤེས་ཆེ་རུ་བཏང་ནས་བླང་བྱ་ནན་རྣལ་ཚོགས་ཆེན་གྱི་བརྒྱུད་རིམ་ཧྲིལ་པོར་ཁྱབ་པ་བྱ་དགོས། སི་ཁྲོན་དྲིལ་བསྒྲགས་དང་འོས་སྦྱོར་ཧུར་ཐག་བྱས་ནས་འཐུས་མི་ཚོགས་པའི་ཁ་མགོ་རྣ་བཟང་པོ་སྔར་བས་མངོན་པ་བྱ་དགོས། སི་ཁྲོན་གྱིས་སེམས་ཤུགས་གཅིག་སྒྲིལ་གྱིས་འཕེལ་རྒྱས་སྤུས་ཚད་མཐོན་པོར་སྐུལ་བའི་ཕན་འབྲས་དངོས་གང་ལེགས་མངོན་ཞིང་། ཕྱོགས་ཡོངས་ནས་སི་ཁྲོན་འཕེལ་རྒྱས་ཀྱི་རྨང་གཞི་བརྟན་པོ་དང་མདུན་ལམ་ཡངས་པོ་ངོ་སྤྲོད་བྱས་ཏེ། སི་ཁྲོན་དེང་རབས་ཅན་འཛུགས་སྐྲུན་ལ་གླེང་ཕྱོགས་ཀྱི་སྣང་ཉམས་བཟང་པོ་བསྐྲུན་དགོས།（ལྷ་འཛོམས་ཀྱིས་བསྒྱུར།）