རྒྱང་བཞུད་ཟླ་བ་དཀར་པོའི་བསིལ་ཟེར་གྱིས། །
བོད་ཁམས་བསམ་དོན་འགྲུབ་པའི་ལོ་གཡང་བསུ། །
གངས་སྟོད་གངས་ཀྱི་རྒྱལ་པོའི་གཡུ་རལ་གྱིས། །
ཁམས་གསུམ་ཟིལ་གྱིས་ནོན་པའི་ལོ་གཡང་བསུ། །
དབུས་ཀྱི་ཕ་མཁར་དམར་པོའི་བརྗིད་ཉམས་ཀྱིས། །
སྐྱེ་འགྲོ་དབང་དུ་བསྡུས་པའི་ལོ་གཡང་བསུ། །
སྨད་ཀྱི་དྭངས་གསལ་མཚོ་མོའི་རླབས་ཕྲེང་གིས། །
འགྲོ་ཀུན་གདུང་བ་སེལ་བའི་ལོ་གཡང་བསུ། །
ཕ་ནོར་དབྱངས་གསལ་སོ་བཞིའི་རང་མདངས་ཀྱིས། །
ཤེས་རིག་ལོ་འདབ་རྒྱས་པའི་ལོ་གཡང་བསུ། །
ཆོས་སྲིད་དྲི་མེད་འོད་ཀྱི་སྣང་བ་ཡིས། །
ཞི་བདེའི་དཔལ་ལ་རོལ་བའི་ལོ་གཡང་བསུ། །
དཀར་གསུམ་ཟས་སྣ་འཛོམས་པའི་སྟ་གོན་གྱིས། །
ཕུ་ནུ་སྐྱིད་ལ་རོལ་བའི་ལོ་གཡང་བསུ། །
མངར་གསུམ་དྲི་ཞིམ་ལྡན་པའི་སྐྱེམས་ཆང་གིས། །
སྟག་ཤར་ཚེ་བསོད་རྒྱས་པའི་ལོ་གཡང་བསུ། །
འཇོ་སྒེག་སྟངས་སྟབས་མངོན་པའི་ཞབས་བྲོ་ཡིས། །
སྨན་ཤར་མཛེས་པ་ལྡན་པའི་ལོ་གཡང་བསུ། །
བཀྲ་ཤིས་ཁ་གཡང་འབོད་པའི་རྟེན་འབྲེལ་གྱིས། །
གཉེན་ཉེ་ལྷན་འཛོམས་ཡོང་བའི་ལོ་གཡང་བསུ། །
གངས་ཅན་ཁ་བ་རི་བོའི་མཚན་སྙན་གྱིས། །
རྒྱལ་ཁམས་ཆོས་ཀྱིས་ཁྱབ་པའི་ལོ་གཡང་བསུ། །
༼ རུས་རྐང་དྭངས་མ། ༽