དབེན་པའི་གནས་ལ་ལྡན་པའི་ཞི་བའི་ལྷིང་འཇགས། །

རོལ་མོའི་རམ་འདེགས་མེད་ཀྱང་ནང་སེམས་འཕྲོག་མཁན། །

ལོ་སར་ཁ་གཡང་འདྲ་བའི་རྟེན་འབྲེལ་དབྱངས་རྟ། །

སྙན་འཇེབས་མགྲིན་པའི་རྩེ་ནས་དལ་གྱིས་བླང་ཆོག །

བསོད་ནམས་ལས་ཀྱི་ཉི་མ་དགུང་ནས་ཤར་ཞིང་། །

དོན་གྲུབ་ཟླ་བ་དཀར་པོའི་འོད་མདངས་ཚེས་དུས། །

བསམ་དོན་ལྷུན་གྱིས་གྲུབ་པའི་དན་རྟགས་བཟང་ངོ་། །

གནས་འདིར་ཡང་ཡང་འཆར་བའི་སྙན་པ་ཐོར་སོང་། །

ནོར་འཛིན་སྒེག་མོའི་ཁྲོད་དུ་ཁ་བ་བབས་བྱུང་། །

ཁ་བའི་འོད་མདངས་སེམས་ཀྱི་དྲོད་ཁོལ་ཡིན་སྲིད། །

ཁ་བའི་ལྗོངས་ཀྱི་རིགས་མཐུན་གཞོན་ནུའི་སྡེ་ལ། །

ཁ་སེམས་མཐུན་པའི་སྨོན་ཚིག་ཐོལ་གྱིས་རྡོལ་བྱུང་། །

རང་སེམས་སྣང་བ་མཐོ་བའི་སྤྲིན་དཀར་ཕོན་པོ། །

རང་ལུས་བདེ་ཐང་ཡིན་པས་ཡིད་སེམས་བདེ་མོ། །

རང་གཞན་ཁ་ལས་དགེ་བའི་ཤིས་ཚིག་སྙན་མོས། །

རང་སེམས་ལྷོད་ལ་བཞག་སྟེ་ངང་གིས་བྲིས་ཡོད། །

དབང་ཐང་དགུང་ལས་མཐོ་བའི་རྟགས་མཚན་ཞིག་ལ། །

ལོ་སར་ལོ་འགོ་ཚེས་བཟང་དུས་ཀྱིས་བསུས་འདུག །

ལོ་གཡང་སྙན་མོས་མི་སེམས་དབང་མེད་འཕྲོགས་འདུག །

ལོ་འདིར་བསམ་དོན་འགྲུབ་པའི་ལོ་ཚིགས་རེད་གདའ། །

རླུང་རྟ་དཀར་པོ་གངས་ལས་དཀར་བ་རེད་འདུག །

གངས་རིའི་རང་མདངས་སྔར་ལས་ལྷག་པར་རྒྱས་འདྲ། །

གངས་ཅན་གཞོན་ནུའི་བསམ་དོན་འགྲུབ་པའི་རྟགས་རེད། །

རྟགས་བརྒྱད་གྲངས་དང་མཐུན་པའི་ཤིས་ཚིག་བྲིས་ཡོད། །

སྙན་གྲགས་ཕྱོགས་ཀུན་ཁྱབ་པའི་མཚོན་དོན་ཞིག་ལ། །

སྙན་འཇེབས་ཚིག་གི་དབྱངས་རྟ་ངག་ལ་དྲངས་འདུག །

སྙན་པའི་ངག་ལ་ངག་གཡང་རང་འཁོར་རེད་ཅེས། །

སྙན་འགྱུར་བདེན་པའི་རང་སྒྲ་གང་སར་གྲགས་སོང་། །

གཞོན་ནུའི་བློ་རིག་བཀྲ་བའི་ཤེས་གཡང་རྒྱས་སོང་། །

རྒན་པའི་ཚེ་ཐག་རིང་བའི་ཚེ་གཡང་འཕེལ་སོང་། །

དར་མའི་ལང་ཚོ་རྒྱས་པའི་མདངས་གཡང་སྨིན་སོང་། །

དགེ་ལེགས་ཕུན་སུམ་ཚོགས་པའི་རྟེན་འབྲེལ་ལེགས་སོང་། །

གཡང་ལྡན་དུས་ཚིགས་བཟང་པོ་དུས་ཀྱི་མེ་ཏོག །

གཡང་གཟའ་གཡང་གི་ར་བ་རྟག་ཏུ་ཚེས་ནས། །

གཡང་མོ་སྒོ་གཞི་གཡང་གི་བཅུད་དུ་ཕེབས་ཤོག།

གཡང་འདིར་ཕོབས་ལ་ཚེ་གཡང་ནོར་གཡང་རྒྱས་ཤོག །

གཡང་རྫས་འདོད་དགུ་འཇོ་བའི་རྟགས་མཚན་བཟང་པོ། །

གཡང་མདའ་ལྷུན་གྱིས་གྲུབ་པའི་བཀྲ་ཤིས་མཚོན་དོན། །

གཡང་ཆགས་བཅུད་ལྡན་བདུད་རྩིའི་རོ་དང་གནས་པ། །

གཡང་བརྒྱ་ལོ་འདིར་བཞད་པའི་རྟེན་འབྲེལ་འགྲིགས་སོང་། །

༼ རྫ་ཤུལ་བློ་བཟང་། ༽