མི་རྟག་འགྲོས་ཀྱང་མ་ལྷོད་དལ་བུར་བྱུང་། །
དར་རྒུད་འཚོ་བའི་གཏིང་མཐའ་རིང་མོ་ནི། །
ལས་ཀྱི་བགོ་སྐལ་ཞིག་གི་མཐུན་ལམ་ལས། །
མཚོན་ཐབས་རྙེད་པ་མེད་ཅིང་བཙལ་བ་ལ། །
ལོ་ཡི་འཁོར་མོ་གཅིག་གི་མཇུག་ཏུ་སླེབས། །
འཚོ་བ་སྐྱིད་ཀྱང་སྡུག་རུང་སེམས་ཚོར་ཞིག །
སེམས་ཀྱི་འགྱུར་ལྡོག་འོག་གི་ན་ཚོད་ཀྱང་། །
སྔོན་བྱས་ལས་དབང་ཞིག་གི་བར་སྐབས་སུ། །
བརྩེ་བའི་ལོ་ཟླ་ཚོགས་ཀྱིས་འཁྱུད་པ་ལས། །
ལོ་འཁོར་གཅིག་གི་མཇུག་ཏུ་སྔར་བཞིན་སླེབས། །
ཡུན་རིང་དུས་ཀྱི་རྨི་ལམ་ཚོར་བས་རུམ། །
ཚོར་བའི་རླབས་ཕྲེང་གཡོ་ཞིང་འགུལ་བ་ནི། །
ན་ཚོད་གཅིག་པའི་ལས་ཀྱི་གྲོགས་དག་ལ། །
མཐུན་པའི་ཉིན་ཞག་དབུས་སུ་མཇལ་བ་རེ། །
ལོ་མཇུག་གཅིག་གི་མཚམས་སུ་ཞེ་རུ་དྲན། །
འདས་པའི་ལོ་ཟླའི་མཐའ་ནི་མི་མངོན་ཡང་། །
ལོ་འདིའི་ཁྲོད་ཀྱི་མཐོང་བ་ཇི་སྙེད་ཀུན། །
རེས་གསལ་རེས་མོག་ཚུལ་དུ་ད་ལྟ་བསམ། །
བསམ་པའི་སྙིང་པོ་ཡོངས་ལ་ཡིད་དུ་འོང་། །
ཡིད་འོང་ལོ་ཟླ་གཅིག་ལ་སྐྱེལ་མ་བྱེད། །
ལས་སྐལ་མཐུན་པའི་བྱ་བ་སྣ་ཚོགས་ཀྱང་། །
ལས་སྨོན་འོག་ནས་འགྲུབ་པའི་རེ་བ་འཆང། །
ལས་ཀྱིས་གནང་བའི་གློ་སྙིང་ཉེ་བ་ཡོངས། །
ལས་མཐུན་གཅིག་གི་ཚོར་བ་མྱོང་བ་ཡིས། །
ལས་དབང་ནང་གི་ལོ་གཅིག་རྒྱང་དུ་བསྐྱལ། །
སྨོན་པ་ཇི་སྙེད་སེམས་ཀྱི་དབུས་སུ་འཚང། །
སྨོན་འདུན་རིང་མོ་བརྩེ་བའི་ལྷ་ལ་བཅོལ། །
སྨོན་ལམ་བཟང་པོ་རང་གི་ངག་ཏུ་བླངས། །
སྨོན་ཞིང་གསོལ་ཏེ་རང་དང་འདྲིས་པ་ཀུན། །
ལོ་སར་ནང་དུ་སྐྱིད་ཀྱིས་ཁྱབ་པར་སྨོན། །
༼ ཁམས་འོད་གསལ། ༽