ཀ་ར་ཀུ་ཤུ་སྡེར་ཁ་བཤམས་ནས།།
ཁ་གཡང་ཚིག་གི་སྨོན་འདུན་ཞུ་བཞིན།།
ག་ས་གང་ལ་དགོད་སྒྲ་ཁྱབ་པའི།།
ང་ཚོའི་ལོ་སར་བཀྲ་ཤིས་དུས་བཟང་།།
ཅ་ག་དག་པོ་གཙང་སྦྲ་བྱས་ནས།།
ཆ་ལུགས་གནའ་སྲོལ་གོམས་གཤིས་ངང་ནས།།
ཇ་མར་ཤ་ཐུད་རི་ལྟར་སྤུང་བཞིན།།
མཉམ་ཟ་མཉམ་འཐུང་ལོ་སར་བསུ་འོ།།
རྟགས་བརྒྱད་རི་མོ་མཛེས་པའི་དཀར་ཡོལ།།
ཐུལ་དཀར་འབྲི་ཡི་འོ་མས་བཀང་ནས།།
ད་ལྟའི་ཚེས་བཟང་དུས་བཟང་འདི་ནས།།
ན་མོ་བླ་མར་ཡི་དམ་མཆོད་དོ།།
པ་སངས་བཞིན་དུ་དཀར་བའི་སེམས་ཀྱིས།།
ཕ་མར་འགྲོ་དྲུག་སེམས་ཅན་ཀུན་ལ།།
བག་ཕེབས་བདེ་སྐྱིད་ཡོང་བར་སྨོན་ནས།།
མ་རུང་ནད་མུག་ཞི་བར་ཤོག་ཅིག།
རྩ་གསུམ་ཡི་དམ་ལྷ་ཡི་བཀྲ་ཤིས།།
འཚེ་མེད་རྫོགས་ལྡན་འཆར་བའི་བཀྲ་ཤིས།།
འཛམ་གླིང་ཞི་བདེ་ཡོང་བའི་བཀྲ་ཤིས།།
ཝ་ལེར་བདག་གི་རེ་སྨོན་གྲུབ་ཤོག།
ཞྭ་གོས་གསར་བའི་རི་མོ་མཛེས་པ།།
ཟ་འཐུང་ལོངས་སྤྱོད་མཚོ་མོ་འཁྱིལ་ལེར།།
འ་འུར་མགྲོན་པོར་ཕར་ཚུར་འདུ་བ།།
ཡག་གསུམ་འཛོམས་པའི་བཀྲ་ཤིས་བདེ་ལེགས།།
རབ་དཀར་གངས་ཀྱི་མདངས་ལ་འཁུ་བའི།།
ལས་སྨོན་རྟེན་འབྲེལ་ཞུ་བའི་ལོ་འགོར།།
ཤ་རུས་སྤུན་ཟླའི་ཅི་བསམ་འགྲུབ་པའི།།
ས་སྟེང་འདི་ནས་བཀྲ་ཤིས་བདེ་ལེགས།།
ཧ་ཧ་དགོད་སྒྲ་གླུ་དང་གར་སོགས།།
ཨ་རོགས་སྤུན་ཟླའི་དགའ་སྤྲོ་རོལ་ནས།།
གནམ་ལོ་གསར་པའི་བདེ་སྐྱིད་བསུ་མ།
བཀྲ་ཤིས་ཕུན་སུམ་ཚོགས་པའི་བཀྲ་ཤིས།།
༼ རྡོ་རྗེ་ཐར་ལམ། ༽