（ པར་ངོས་དང་པོར་མཐུད།）

ཞི་ཅིན་ཕིང་གིས་བསྟན་དོན། སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བ་དེ་སྤུས་མཐོའི་གོང་འཕེལ་ལ་སྐུལ་འདེད་གཏོང་བ་དང་དཔལ་འབྱོར་གྱི་འགྲན་རྩོད་ནུས་པ་ཆེ་རུ་གཏོང་བའི་ཐད་གལ་འགངས་ཧ་ཅང་ཆེན་པོ་ཡོད། དེའི་ཐད་ཅང་སུའུ་ཡི་རྨང་གཞི་ལེགས་ཙམ་ཡོད་པས། འབད་བརྩོན་ཆེན་པོས་མདུན་གྲལ་དུ་བསྐྱོད་དགོས། སློབ་གསོ་ཚན་རྩལ་གྱི་ཤེས་ལྡན་མི་སྣ་གོང་འཕེལ་ཡོང་བར་གཞི་གཅིག་ཏུ་སྐུལ་འདེད་གཏོང་བ་དང་། ཐོག་མའི་གསར་གཏོད་དང་འགག་རྩའི་ལྟེ་བའི་ལག་རྩལ་གྱི་འགག་གཏོར་ལ་ཤུགས་རྒྱག་པ་དང་ཚན་རྩལ་གྱི་མཐོ་སར་དམ་འཛིན་བྱེད་པའི་ཐད་ཚད་བརྒལ་གསར་པ་ཡོང་བར་བྱེད་པ། གསར་གཏོད་འབྲེལ་ཐག་དང་ཐོན་ལས་འབྲེལ་ཐག། མ་དངུལ་འབྲེལ་ཐག ཤེས་ལྡན་མི་སྣའི་འབྲེལ་ཐག་བཅས་མཉམ་འདྲེས་གཏིང་ཟབ་བྱ་རྒྱུར་སྐུལ་བ། ཚན་རྩལ་གྲུབ་འབྲས་ནུས་ཆེའི་བརྗེ་སྒྱུར་བེད་སྤྱོད་ལ་སྐུལ་བའི་ཐད་ཐབས་ལམ་གསར་པ་འཚོལ་ཞིབ་བྱེད་པ། སྲོལ་རྒྱུན་ཐོན་ལས་ལེགས་འགྱུར་རིམ་སྤོར་དང་། གསར་དར་ཐོན་ལས་སྐྱེད་སྲིང་སྟོབས་ཆེར་གཏོང་བ། འབྱུང་འགྱུར་ཐོན་ལས་ཚད་བརྒལ་བཀོད་སྒྲིག་བྱེད་པ་བཅས་ཀྱི་ཐད་རྣམ་པ་གསར་པ་གཏོད་པ། བསྒྱུར་བཅོས་སྔར་བས་གཏིང་ཟབ་ཏུ་གཏོང་བ་དང་སྤུས་གསར་ཐོན་སྐྱེད་ནུས་ཤུགས་གོང་འཕེལ་ལ་ཚོད་འཛིན་ཐེབས་པའི་སྒྲིག་གཞི་ལམ་སྲོལ་གྱི་འགོག་རྐྱེན་མེད་པ་བཟོ་རྒྱུའི་ཐད་གྲུབ་འབྲས་གསར་པ་ཐོབ་རྒྱུར་བརྩོན་ལེན་བྱ་དགོས།

ཞི་ཅིན་ཕིང་གིས་ནན་གསུང་གནང་དོན། དཔལ་འབྱོར་ཞིང་ཆེན་ཆེན་པོའི་གོང་འཕེལ་གྱི་རྨང་གཞི་བརྟན་པོ་དང་ཕྱི་ཕྱོགས་ཀྱི་བརྡབ་གསིག་འགོག་པའི་འཇོན་ནུས་ཆེན་པོ་ཡོད་ཚེ། གཞི་ནས་རྒྱལ་ཡོངས་ཀྱི་དཔལ་འབྱོར་བརྟན་པོ་ཡོང་བར་རམ་འདེགས་བྱེད་ཐུབ། ཅང་སུའུ་ཡིས་དཔལ་འབྱོར་གྱི་ལྡེམ་ཤུགས་ཆེ་རུ་གཏོང་བའི་ཐད་མུ་མཐུད་ཤུགས་རྒྱག་དགོས། ནང་ནང་རྐྱེན་སྟོབས་ཤུགས་དང་རང་ངོས་སྟོབས་ཆེར་གཏོང་བ་དང་། རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོའི་ནང་ཁྱོན་ཡོངས་ནས་མཉམ་འདྲེས་བྱས་ཏེ། རྒྱལ་ནང་གི་འཁོར་རྒྱུག་ཆེན་པོ་ཤར་གཏོང་ཐུབ་རྒྱུར་རམ་འདེགས་བྱ་དགོས། ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་རྒྱ་ཆེར་གཏོང་བ་དང་གོ་ལ་ཧྲིལ་པོའི་ཁྲོམ་ར་རྒྱ་ཁྱབ་ངང་གསར་འབྱེད་བྱས་ཏེ། རྒྱལ་སྤྱིའི་འཁོར་རྒྱུག་དང་མཉམ་འབྲེལ་སྔར་ལས་ཡག་པ་བྱ་དགོས། མ་མཐའི་མཐིལ་ཚད་བསམ་བློར་བརྟེན་ནས་ཉེན་ཁ་སྣ་ཚོགས་སྔོན་འགོག་བྱ་དགོས།

ཞི་ཅིན་ཕིང་གིས་བསྟན་དོན། ཀྲུང་གོའི་ལུགས་ཀྱི་དེང་རབས་ཅན་ནི་མི་དམངས་ཡོངས་མཉམ་དུ་ཕྱུག་འབྱོར་གྱི་དེང་རབས་ཅན་ཞིག་རེད། ཅང་སུའུ་ཡིས་དུས་བབ་གསར་པའི་འོག་མི་དམངས་མང་ཚོགས་ཀྱིས་བདེ་སྐྱིད་ལྡན་པའི་འཚོ་བར་བཅངས་པའི་རེ་སྒུག་གསར་པ་དང་དམངས་འཚོའི་ལས་དོན་གྱི་ཁྱད་ཆོས་གསར་པ་ཁོང་དུ་ཆུད་པར་བྱས་ཐོག། ཇི་ལྟར་བྱས་ནས་སྤུས་ཚད་མཐོ་བའི་ལས་ཞུགས་གང་ལེགས་མངོན་འགྱུར་དང་། ཇི་ལྟར་བྱས་ནས་གྲོང་ཁྱེར་དང་གྲོང་གསེབ་ཀྱི་གྲོང་མིའི་ཡོང་འབབ་མང་དུ་གཏོང་བ། ཇི་ལྟར་བྱས་ནས་གཞི་རྩའི་སྤྱི་པའི་ཞབས་ཞུ་དང་སྤྱི་ཚོགས་འགན་སྲུང་ཆུ་ཚད་སྔར་བས་མཐོ་རུ་གཏོང་བ་སོགས་ཀྱི་ཞིབ་འཇུག་བྱ་གཞིར་རང་འགུལ་ངང་ལན་ཧུར་ཐག་བཏབ་ནས། མི་དམངས་ཡོངས་མཉམ་དུ་ཕྱུག་འབྱོར་ལ་སྐུལ་བའི་ཐབས་ལམ་ནུས་ལྡན་འཚོལ་ཞིབ་བྱ་དགོས།

ཞི་ཅིན་ཕིང་གིས་ནན་གསུང་གནང་དོན། ཏང་དོ་དམ་དང་ཏང་བཅོས་སྐྱོང་ལ་ཕན་ནུས་ཇི་ཙམ་ལྡན་ན། དཔལ་འབྱོར་དང་སྤྱི་ཚོགས་གོང་འཕེལ་གྱི་འགན་ལེན་དེ་ཙམ་གྱིས་ནུས་ལྡན་ཡོང་རྒྱུ་རེད། སྲིད་འགན་ལག་རྗེས་ཡང་དག་པ་འཆང་བ་དང་ལག་ལེན་བསྟར་བའི་སློབ་སྦྱོང་སློབ་གསོ་ནན་ཏན་ངང་སྒྲིག་འཛུགས་བྱས་ནས་སྤེལ་བ་དང་། ཏང་མི་ལས་བྱེད་རྒྱ་ཆེན་གྱིས་“སྤྱི་དོན་དུ་ཏང་འཛུགས་པ་དང་། དམངས་ལ་བདེ་སྐྱིད་བསྐྲུན་པ། ཚན་རིག་དང་མཐུན་པའི་ཐབས་ཇུས་འདོན་པ། དངོས་འཛིན་དངོས་སྒྲུབ་”བཅས་ཀྱི་སྤྱིའི་བླང་བྱ་དོན་ལ་འཁྱོལ་པར་ཁྲིད་སྟོན་བྱས་ཏེ། ལག་ལེན་དང་མི་དམངས། ལོ་རྒྱུས་བཅས་ཀྱི་ཞིབ་དཔྱད་དང་ལེན་ཐུབ་པའི་བྱས་འབྲས་དངོས་གཏོད་དགོས། ཏང་གཤིས་དང་ཏང་སྲོལ། ཏང་གི་སྒྲིག་ལམ་བཅས་ལ་མཉམ་དུ་དམ་འཛིན་དང་། སྤྱོད་བཟང་སྒྲིག་ནན་དང་རུལ་སུངས་ལ་ངོ་རྒོལ་བྱ་རྒྱུ་གཉིས་ཟུང་དུ་འབྲེལ་བ་མཐའ་འཁྱོངས་ཏེ། ཕྱོགས་ཡོངས་ནས་ཏང་ནན་སྐྱོང་བྱེད་པའི་ཕན་འབྲས་དངོས་ལ་བརྟེན་ནས་དམངས་ཀྱི་ཡིད་ཆེས་ཐོབ་པ་དང་། བྱ་གཞག་གོང་འཕེལ་ལ་སྐུལ་བའི་སྟོབས་ཤུགས་ཆེན་པོ་གཅིག་ཏུ་བསྒྲིལ་དགོས།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། ཀྲུང་དབྱང་གཞུང་དོན་ཐིང་གི་ཀྲུའུ་རེན་ཚའེ་ཆི་ཞུགས་ཡོད།།

（ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ཁང་བོད་སྐད་རླུང་འཕྲིན་ལས་དྲངས།）