མུན་པའི་ཀློང་དུ།
མཆོད་མེ་རྐོང་བུ་ཞིག་བསྒྲོན་ཏེ།
ཁུ་སིམ་མེར་སྡོད་དུས།
ཞེ་རུ་འཁྱིལ་ཡོང་བ་ནི་ཆུང་མ་ཁོ་ན་རེད།
འུ་གཉིས་ཀྱི།
འབྲེལ་གཏུགས་ཀྱི་ཟམ་པ་ཆུང་ཆུང་།
གློ་རྡེག་མུ་ཏིག་བཞིན་ཕྱོགས་བཞིར་ཐོར་ཡང་།
རི་བོ་འདིའི་ཚུ་རོལ་ཏུ།
ཕྱིར་མིག་གི་ཁྲུས་ལ་རོལ་བའི།
ཁྱོད་རང་དྲན་བཞིན་པའི་ང་ཡིས།
མཛེས་སྡུག་གི་དབྱར་གཞུང་ཞིག་སེམས་ཀྱིས་འཚོས་ཡོད།
མཁའ་ལ་ཡང་ཡང་འཕྱོ་བའི།
མཚན་ལམ་རིང་མོ་རླུང་བུས་ཤིག་ཤིག་བསྒུལ་ཏེ།
ཡུན་རིང་གི་དྲན་གདུང་དང་རེ་སྒུག་ཡུག་གཅིག་ཏུ་བསྲེས་པའི།
མོའི་རྨི་ལམ་གྱི་སྐྱེད་ཚལ་རྨེག་མེད་གཏོང་ཨེ་ནུས་སྙམ།
དེ་ལྟར་སྙམ་དུས།
སྙིང་ལ་བྲེད་ཤ་ཞིག་ཀྱང་ཆུ་མིག་བཞིན་བསྟུད་མར་རྡོལ་ཡོང་།
སུ་ཡི་མགོ་ཐོག་ཏུ་ལྷུང་བར་མངོན་པའི་བྲེད་ཤ་འདི་ཡང་།
ཞིབ་ཏུ་བསམས་ན།
ལོ་ཟླའི་ཞགས་སྣེ་རུ་ལྗིད་ཏིག་གེར་འདྲུད་ཀྱིན་པའི།
མོའི་བྲེད་ཤ་མ་ཡིན་ནམ།
༼ ཞོ་ར་བསམ་འགྲུབ་རྒྱལ། ༽