བུད་མེད་མི་རིགས་ཤིག་གི་རྩ་བ་ཡིན།།
བུད་མེད་ཚེ་སྲོག་ཅིག་གི་བདག་མོ་ཡིན།།
བུད་མེད་འཇིག་རྟེན་ཞིག་གི་བྱེད་པོ་ཡིན།།
བུད་མེད་གནམ་སའི་བར་གྱི་སྦྲེལ་ཐག་ཡིན།།
བུད་མེད་ཤེས་ལྡན་དགེ་རྒན་དམ་པ་ཡིན།།
བུད་མེད་བྱམས་ལྡན་བརྩེ་བའི་ཨ་མ་ཡིན།།
བུད་མེད་ཚུལ་ལྡན་རིགས་ཀྱི་སྲུང་མ་ཡིན།།
བུད་མེད་བློ་ལྡན་ཁྱིམ་གྱི་ཀ་རྟེན་ཡིན།།
བུད་མེད་སྒྱུ་འཕྲུལ་ནང་གི་གར་མ་ཡིན།།
བུད་མེད་སྤང་ལྗོངས་སྟེང་གི་མེ་ཏོག་ཡིན།།
བུད་མེད་ཤོག་ཐང་ངོས་ཀྱི་མཛེས་རིས་ཡིན།།
བུད་མེད་རླབས་ཆེན་སྙིང་གི་མ་ཡུམ་ཡིན།།
བུད་མེད་མ་བཅོས་མདང་གི་ཁ་བ་ཡིན།།
བུད་མེད་ལྷད་མེད་ཉི་མའི་འོད་ཟེར་ཡིན།།
བུད་མེད་ཟླ་མེད་མཛེས་པའི་དཔེ་མཚོན་ཡིན།།
བུད་མེད་མཚར་སྡུག་སྟོང་གི་རྨི་ལམ་ཡིན།།
བུད་མེད་ལས་ནི་བྱང་ཆུབ་སེམས་དཔའ་བྱུང་།།
བུད་མེད་ལས་ནི་རྒྱལ་ཁབ་གཙོ་འཛིན་བྱུང་།།
བུད་མེད་ལས་ནི་མི་ཡི་རིགས་འདི་བྱུང་།།
བུད་མེད་ལས་ནི་ཁྱོད་དང་ང་ཡང་བྱུང་།།
བུད་མེད་ཤེས་རིག་རྒྱན་གྱིས་སྤྲས་པར་ཤོག།
བུད་མེད་བདེ་ཐང་ངང་གིས་འཚོ་བར་ཤོག།
བུད་མེད་ཁེ་དབང་རང་གིས་བསྐྲུན་པར་ཤོག།
བུད་མེད་སྙིང་རུས་སྟོབས་ཀྱིས་ཡར་ལོངས་ཤོག།
བུད་མེད་འཇོན་མེད་མིན་པས་སློབ་སྦྱོང་བྱོས།།
བུད་མེད་རིགས་དམན་མིན་པས་མགོ་བོ་ཁྱོགས།།
བུད་མེད་མདོ་མེད་མིན་པས་དོན་བཟང་སྒྲུབས།།
བུད་མེད་ཡོད་དོས་རང་ཉིད་རྒྱལ་བར་བརྩོན།།
བུད་མེད་དུས་ཆེན་ལྷག་བསམ་དྲོན་མོས་བསུ།།
བུད་མེད་དུས་ཆེན་ཁ་གཡང་གཙང་མས་བསུ།།
བུད་མེད་དུས་ཆེན་སྙན་ངག་བཅུད་ཀྱིས་བསུ།།
བུད་མེད་དུས་ཆེན་ཁ་མིན་དོན་གྱིས་བསུ།།
༼ གངས་ཆབ་ལྷ་སྲས། ༽