ཉིན་ཞག་ཁྲི་ཕྲག་ནང་གི་རྨི་ལམ་དེ། །
སྣ་མང་འཚོ་བའི་གམ་གྱི་རླབས་རིས་ཡིན། །
དགའ་སྐྱོ་ཡོ་ལང་བྱོ་སའི་ཚོར་བའི་ཁམས། །
ལན་ཆགས་ཆོ་འཕྲུལ་སྟོང་གི་འཁོར་བ་ཡིན། །
མཐའ་མེད་རྟོག་པའི་དབྱིངས་སུ་ཉུལ་བ་དེ། །
ཞེན་ཆགས་ལས་སྐལ་དེ་ཡི་འཁྲེང་ཞེན་ཡིན། །
མདངས་ལྡན་ཡིད་ཀྱི་དགའ་ཚལ་པདྨའི་ཐང་། །
ཡིད་འོང་མེ་ཏོག་ཚོགས་ཀྱི་ལོངས་སྤྱོད་འདི། །
ཚོགས་དྲུག་ཡུལ་དུ་གད་པའི་ལྷ་ཡི་ཞལ། །
བདེ་འབྱུང་ཡིད་གར་འཕྲོག་པའི་རབ་མཛེས་མ། །
ཡིད་ལ་དུང་བ་འདྲེན་པའི་མདངས་ལྡན་ཁྱོད། །
ལས་ཀྱིས་སྨིན་པའི་སྤྱན་ཟུང་སྙིང་དུ་སྡུག །
ཚེ་ཡི་རབ་མཛེས་དྭངས་གསལ་མེ་ལོང་ངོགས། །
ཞེ་ཡི་དུངས་སེམས་ཚིག་གི་བདེན་པ་དྲངས། །
དྲན་པའི་གཙང་པོ་མཐའ་མེད་བཞུར་རྒྱུན་རིང་། །
འདང་གི་རི་མོ་འཁྱུག་པའི་སྒྱུ་འཕྲུལ་མཛེས། །
བཅོས་མིན་མདངས་ཀྱི་མཆུ་སྒྲོས་རྩེད་འཇོ་རོལ། །
བདེ་བའི་གྲོང་གི་བདུད་རྩི་སྙིང་གར་སིམ། །
བརྩེ་བའི་དབྱངས་ཀྱིས་འདང་གི་དྲན་པ་སྒུལ། །
སྙན་པའི་རྒྱུད་མངས་དྲན་པའི་གདངས་སུ་ཞུགས། །
ཡིད་མཐུན་སྙིང་གི་བརྗོད་འདོད་རིག་བྱེད་ངག །
སྙན་ངག་འཕགས་མའི་རྗེས་ཆགས་བརྩེ་བས་གཟིགས། །
ཚིག་རྒྱན་རིག་པའི་སྒྲ་དབྱངས་གྲོགས་སུ་སྦྲན། །
ངག་རིག་མེ་ཏོག་དབྱངས་ཀྱི་འཕགས་མར་མཆོད། །
༼ ཇེང་། ༽