བྱིས་པའི་དུས་ནས་དཀའ་སྡུག་འཚོ་བ་མྱོང་།། སློབ་གྲྭར་ཞུགས་ནས་ལས་དབང་ཁ་ལོ་བསྒྱུར།། གུས་རྟག་བརྩོན་པ་ཆུ་བོའི་རྒྱུན་བཞིན་བསྟེན།། ལོ་ཙཱའི་ལག་ལེན་ཁྲོད་དུ་རྩེ་གཅིག་གཞོལ།།

སྐལ་བཟང་ཆོས་འཕེལ་ནི་སྤྱི་ལོ1943ལོར་འབའ་ཐང་ནོར་བུ་ས་ཆའི་ཞིང་པའི་ཁྱིམ་ཚང་ཕལ་པ་ཞིག་ཏུ་སྐྱེས། བྱིས་པའི་དུས་ནས་འཚོ་ཚིས་ཀྱི་ཆེད་དུ་དཀའ་སྡུག་དྲག་པོ་མྱོང་ཡོད་པས་བརྐྱངས་ན་མདའ་ཉན། བཀུག་ན་གཞུ་ཉན་པའི་རང་གཤིས་གྲུབ། 1950ལོར། སློབ་གྲྭར་ཞུགས་ནས་སྐད་གཉིས་སློབ་གསོ་ཚད་ལྡན་མྱོང་བའི་སྐལ་བཟང་ཐོབ། དེའི་དུས་སློབ་གྲྭར་བོད་རིགས་ཀྱི་སློབ་མ་རེ་ལ་རྒྱ་མིང་རེ་བཏགས་པའི་སྲོལ་ཡོད་པས་དགེ་རྒན་གྱིས་སྐལ་བཟང་ཆོས་འཕེལ་ལ་རྒྱ་མིང་ཀྲང་ཆི་ལིན་ཞེས་བཏགས། སློབ་གྲྭར་ཡོད་དུས་ཐེངས་ཤིག་རྒྱ་ཡིག་སློབ་ཚན་གསུམ་དུས་ཡུན་ཐུང་ངུའི་ནང་ཆུ་རྒྱུག་པ་ལྟར་བློར་འཛིན་པས་དགེ་རྒན་གྱི་བསྟོད་ར་ཆེན་པོ་ཐོབ་དང་སྦྲགས་སློབ་རིམ་གསུམ་པ་ནས་བཞི་པར་སྤར། ལོ་ཕྱེད་སོང་རྗེས་ཡང་ལོ་རིམ་ལྔ་པར་སྤར་བ་རེད། 1957ལོར་འབའ་ཐང་ནས་དཀར་མཛེས་རྫོང་མི་རིགས་དགེ་འོས་སློབ་གྲྭར་སློབ་སྦྱོང་དུ་ཕྱིན་ཞིང་རིག་པ་དོན་གཉེར་གྱི་ཞོར་ལ་པི་ཝང་དང་གླིང་བུ། ཁ་སྦྲེང་བཅས་འབུད་དཀྲོལ་ལ་མཁས་པར་གྱུར། 1960ལོར་སློབ་མཐར་ཕྱིན་རྗེས། དཀར་མཛེས་ཚགས་པར་ཁང་གི་བོད་ཡིག་རྩོམ་སྒྲིག་ཁང་དུ་ལས་གནས་བགོས་ཏེ་ལོ་ཙཱའི་རིགས་གཞུང་སློབ་སྦྱོང་དང་ལག་ལེན་བརྒྱུད་དེ་རྒྱ་བོད་སྐད་ཡིག་གི་བྱང་ཚད་དང་ལོ་ཙཱའི་ཆུ་ཚད་དབྱར་ཆུ་རྒྱས་པ་བཞིན་ཇེ་བཟང་ཇེ་མཐོར་ཕྱིན་ཡོད།

1962ལོར། སྐལ་བཟང་ཆོས་འཕེལ་གྱིས་བསྒྱུར་བའི《ཨ་ཁུ་བསྟན་པས་ཡུགས་ས་མར་རོགས་རམ་བྱས་པ》སོགས་གཏམ་རྒྱུད་ཁག་གསུམ་ཚགས་པར་དུ་བཀོད། 1963ལོར་པེ་ཅིང་མི་རིགས་དཔེ་སྐྲུན་ཁང་དུ་ཟབ་སྦྱོང་ལ་ཕྱིན་ནས་ལོ་ཙཱ་གཙོས་པའི་རིགས་གཞུང་ཀུན་ལ་ངང་བ་པད་མཚོར་འཇུག་བཞིན་བརྩོན། ཕྱིར་ཚགས་པར་ཁང་དུ་ལོག་ནས་བོད་ཡིག་རྩོམ་སྒྲིག་ཁང་གི་འགན་འཁུར་བར་གྱུར། 1967ལོར་ཞིང་ཆེན་གྱི་འགོ་ཁྲིད་བློ་མཐུན་ཐེན་པའོ﹙སངས་རྒྱས་ཡེ་ཤེས﹚དཀར་མཛེས་ཁུལ་གྱི་དཀར་མཛེས་དང་བྲག་མགོ་རྫོང་གི་ས་འགུལ་གནོད་སྐྱོན་ཐེབས་ཡུལ་དུ་འཚམས་འདྲིར་ཕེབས་སྐབས་སྐལ་བཟང་ཆོས་འཕེལ་གྱིས་ལྷན་སྐྱོད་ལོ་ཙཱའི་ལས་འགན་ཁུར་བ་རེད།

སྐལ་བཟང་ཆོས་འཕེལ་ལོ23ལ་སོན་དུས་སྟབས་མ་ལེགས་པར་རིག་གནས་གསར་བརྗེའི་དུས་འཁྲུག་དང་ཁེལ། བགྲང་བྱ20ལྷག་གི་རིང་ལ་འཇིག་རྟེན་མི་ཡུལ་གྱི་སྐྱིད་སྡུག་གི་བྲོ་བ་ཐམས་ཅད་མ་མྱོང་བ་ཧ་ལམ་མེད་པ་རེད།

རིག་པ་དོན་གཉེར་བརྩོན་སེམས་རབ་ཏུ་ཆེ།། མཁས་མང་བསྟེན་ནས་ཤེས་བྱའི་བདུད་རྩི་བཏུང་།། དཔེ་ཁྲིད་མི་སྐྱོང་མཛད་འཕྲིན་མཁའ་བཞིན་ཁྱབ།། བརྩམས་ཆོས་རིན་ལྡན་རྗེས་རབས་སྐྱེས་སུ་ཕུལ།།

1981ལོར་ལོ38ལ་སོན་པའི་སྐལ་བཟང་ཆོས་འཕེལ་སི་ཁྲོན་ཞིང་ཆེན་བོད་ཡིག་སློབ་གྲྭར་ལས་གནས་སྤོས་ནས་སློབ་ཁྲིད་མི་སྐྱོང་གི་ལས་ལ་གཞོལ། སྐབས་དེར་སློབ་གྲྭའི་ཆ་རྐྱེན་ཧ་ཅང་སྡུག་མོད། ཁོང་གིས་ཞོགས་སྔ་ལངས་དང་ནུབ་ཕྱི་ཉལ་གྱི་སྒོ་ནས་མཁས་དབང་མང་པོའི་མདུན་ནས་བོད་ཀྱི་སྲོལ་རྒྱུན་རིག་གནས་ཀྱི་རྫ་ཆུ་བསིལ་མ་བླངས་ཏེ་རང་རྒྱུད་བརླན་གང་ཐུབ་བྱས། སྤྱི་ལོ1986ལོར་དཀར་མཛེས་ཁུལ་མི་རིགས་ལས་བྱེད་སློབ་གྲྭར་ལས་གནས་སྤོས་ཏེ། 《རྒྱ་བོད་ལོ་ཙཱའི་རིགས་གཞུང་དང་ལག་ལེན》དང་། 《བོད་རིག་པའི་རྒྱུན་ཤེས》 《བོད་རིགས་ཀྱི་ཡུལ་སྲོལ་དང་གུས་ཞབས》 《བོད་ཡིག་ཡིག་གཟུགས》སོགས་ཀྱི་སློབ་ཁྲིད་ལས་འགན་བཞེས་པ་དང་། སློབ་གཞི་གསར་པ་དང་སློབ་གྲྭའི་བོད་ཡིག་དུས་དེབ་རྩོམ་སྒྲིག་གི་ལག་བསྟར་གཙོ་སྒྲིག་པའི་འགན་ཁུར་བ་རེད། ལོ་དེར་པཎ་ཆེན་ཨེར་ཏེ་ནི་ཆོས་ཀྱི་རྒྱལ་མཚན་དཀར་མཛེས་ཁུལ་གྱི་བྱང་རྒྱུད་དུ་གཟིགས་ཞིབ་ཏུ་ཕེབས་དུས་ཁོང་གིས་ཡིག་ཐོག་ལོ་ཙཱའི་ལས་འགན་དང་དུ་བླངས་ཡོད།

1990ལོར་རྒྱ་བོད་ཤན་སྦྱར་སློབ་གཞི་པོད་བརྒྱད་དག་བཅོས་བསྐྱར་པར་དང་《རྒྱ་བོད་ཡིག་སྒྱུར་སློབ་དེབ》དང《བོད་ཀྱི་དག་ཡིག་སློབ་དེབ》རྩོམ་སྒྲིག་བྱས། 2004ལོར་རྒྱ་བོད་ཤན་སྦྱར་གྱི《བོད་ཀྱི་སྐད་ཡིག་སློབ་དེབ》དང《ལས་རིགས་སྐོར་གྱི་ཚིག་གྲུབ་སློབ་དེབ》གཙོ་སྒྲིག་བྱས། 《རྒྱལ་ཁམས་རིག་པས་བསྐོར་བའི་གསེར་གྱི་ཐང་མ》དང་《ཧི་མ་ལ་ཡའི་གཏམ་རྒྱུད》《རྒྱ་གར་གནས་ཆེན་ཁག་ལ་བགྲོད་པའི་ལམ་ཡིག》 《དེབ་ཐེར་དཀར་པོ》བཅས་ཁོངས་སུ་གཏོགས་པའི《དགེ་འདུན་ཆོས་འཕེལ་གྱི་གསུང་རྩོམ་གཅེས་བསྡུས》འགྱུར་དེབ་ལ་ཞིང་ཆེན་སྲིད་གཞུང་གི་མཚན་ཉིད་རིག་པ་དང་སྤྱི་ཚོགས་ཚན་རིག་གི་གྲུབ་འབྲས་ཕུལ་བྱུང་ཐེངས་བརྒྱད་པའི་བྱ་དགའ་ཨང་གསུམ་པ་ཐོབ། 《ཁང་གསར་ཁྱིམ་རྒྱུད་ཀྱི་ལོ་རྒྱུས་མདོར་བསྡུས》ཞིང་ཆེན་བོད་ཡིག་སློབ་གྲྭའི《རྒྱ་བོད་ཡིག་སྒྱུར་སློབ་གཞི》 《རྒྱ་བོད་ཡིག་སྒྱུར་རིགས་གཞུང་དང་ལག་ལེན་རྣམ་བཤད》《ཞིང་སྡེ་གསར་པའི་འཛུགས་སྐྲུན་སྐོར་གྱི་དཔེ་ཚོགས》《དཀར་མཛེས་ཁུལ་བོད་བརྒྱུད་ནང་བསྟན་དགོན་པའི་ངོ་སྤྲོད་མདོར་བསྡུས》དེབ་སྟོད་སྨད་བར་གསུམ།《རྒྱལ་རོང་གི་གནས་ཆེན་དམུ་རྡོ》《ཤར་རྒྱལ་བ་བསྐལ་བཟང་དགོན་གྱི་བྱུང་བ་རགས་བསྡུས》 《སྐྱིད་པོ་འབའ་ཐང་སྔར་ལས་མཛེས》 《ལ་དྭགས་ཨའོ་ཝར་ཚགས་པར》 《ལྷ་སའི་ཁ་སྐད་ཚགས་པར》སོགས་རྒྱ་ཡིག་ཏུ་བསྒྱུར། 《གྲུ་གུ་གོ་རྫོང》 《འདན་མའི་ནས་རྫོང》སོགས་བསྒྱུར་ཏེ་རྒྱལ་ཁབ་མི་རིགས་དོན་གཅོད་ཨུ་ལྷན་དང་རྒྱལ་ཁབ་རིག་གནས་པུའུ། ཀྲུང་གོ་རིག་རྩལ་ལྷན་ཚོགས། རྒྱལ་ཁབ་སྤྱི་ཚོགས་ཚན་རིག་གླིང་བཅས་ཀྱི་གཟེངས་བསྟོད་ཐོབ། དཀར་མཛེས་ཁུལ་གྱི《དམངས་གཞས》དང་། 《བྲོ་གར》 《རོལ་ཆས་རོལ་དབྱངས》 《གཞས་གཏམ་རོལ་དབྱངས》 《དམངས་ཁྲོད་གཏམ་རྒྱུད》 《དམངས་ཁྲོད་གཏམ་དཔེ》 《བོད་ཀྱི་གཏམ་དཔེ་ཕྱོགས་བསྒྲིགས》 《ཁམས་མི་ཉག་ཕྱོགས་ཀྱི་གཏམ་དཔེ་དང་དམངས་གཞས་ཕྱོགས་བསྒྲིགས》 《ཁམས་པའི་གཏམ་དཔེ་གཅེས་བསྒྲིགས》《བོད་སྐད་ཚིག་རྐང་ཉིས་སྟོང་མ་བསླབ》ཀྱི་བོད་རྒྱ་ཤན་སྦྱར་པར་གཞི་ཆེ་ཕྲ་གཉིས་བཅས་དཔར་དུ་བསྐྲུན།

བོད་རྒྱ་ཤན་སྦྱར་གྱི《འབའ་བའི་གཞས་ཚིག་གཅེས་བསྡུས》དང《འབའ་བའི་གཞས་གདངས་གཅེས་བསྡུས》པོད་གསུམ་དང་། 《དཀར་མཛེས་ཁུལ་གྱི་ཉེ་རབས་སྐྱེས་ཆེན་དམ་པའི་རྣམ་ཐར》 《དཀར་མཛེས་བོད་རིག་པ》དཔྱད་རྩོམ་ཕྱོགས་བསྒྲིགས་དེབ་གསུམ། 《མིང་ཆིང་དང་མིན་གོའི་དུས་ཀྱི་ཀྲུང་དབྱང་སྲིད་གཞུང་དང་སི་ཁྲོན་མི་རིགས་ས་ཁུལ་གྱི་ལོ་རྒྱུས་ཡིག་ཚང་ཕྱོགས་བསྒྲིགས》དེབ་གསུམ་སོགས་ལ་དག་ཞུས་བྱས།

《རྒྱ་བོད་དབྱིན་གསུམ་གསར་བྱུང་རྒྱུན་བཀོལ་མིང་མཛོད》ཀྱི་ལས་ཀར་ཞུགས། 2013ལོར་ཁམས་པའི་བརྙན་འཕྲིན་ཁང་གི《ཁམས་པའི་གླེང་སྟེགས》ལེ་ཚན་དུ 《ས་སྐྱ་ལེགས་བཤད》འཆད་ཁྲིད་ཐེངས7གནང་ཞིང་། 《བྱམས་པའི་ཁ་བརྡ》ནས་དམངས་གཞས་དང་གཏམ་དཔེ་སྐོར་བཅར་འདྲི་ལེ་ཚན་གསུམ་བཏང་། 《བོད་རིགས་ཀྱི་ཡུལ་སྲོལ་དང་གུས་ལུགས》ལྷན་ཁྲིད་ཐེངས7གནང་།

རིག་པ་གཉེར་བའི་འགྲོ་ལམ་དུ་བརྩོན་ཤུགས་ཀྱིས་མདུན་ནས་མདུན་དུ་བདར་བས་སྐལ་བཟང་ཆོས་འཕེལ་གྱིས་བྲིས་པ་དང་རྩོམ་སྒྱུར། ཞིབ་བཅོས། རྩོམ་སྒྲིག་སོགས་རིགས་ཁག་གི་དཔེ་དེབ60ལྷག་ལ་ཟིན་པ་དང་། རྒྱལ་ཁབ་དང་ཞིང་ཆེན། ཁུལ་རིམ་པའི་ཚགས་དེབ་ཏུ་རྒྱ་བོད་ཡིག་རིགས་གཉིས་ཀྱི《108ཀྱི་སྣང་ཚུལ་ལ་ཐོག་མར་དཔྱད་པ》སོགས་དཔྱད་རྩོམ20ལྷག་བཀོད་ཅིང་། དཔྱད་རྩོམ《དཀར་མཛེས་ཁུལ་གེ་སར་གྱི་ཡུལ་ལྗོངས་དང་གནས་ཤུལ་བརྗོད་པ》ལ2002ལོར་ཀྲུང་གོ་སི་ཁྲོན་དཀར་མཛེས་ཁུལ་གྱི་གེ་སར་ཕ་སར་འཛོམས་པའི་རིག་གཞུང་གླེང་སྟེགས་ཀྱི་དཔྱད་རྩོམ་བྱ་དགའ་ཨང་དང་པོ་ཐོབ། 1999ལོ་ནས2006ལོའི་བར་ཁོང་གིས《གངས་དཀར་རི་བོ》དུས་དེབ་ཀྱི་ལག་བསྟར་གཙོ་སྒྲིག་པའི་འགན་བཞེས་ནས་དུས་དེབ12བཏོན་ཡོད། 1984ལོར་ཁུལ་དམངས་ཁྲོད་རིག་རྩལ་པའི་མཐུན་ཚོགས་ཀྱི་ཀྲུའུ་ཞི་གཞོན་པའི་འགན་ཁུར། 1998ལོར་ཞུས་ཆེན་གྱི་གོ་མིང་ཐོབ་རྗེས་ཞིང་ཆེན་གྲངས་ཉུང་མི་རིགས་ཡི་གེའི་མཐོ་རིམ་གོ་མིང་དཔྱད་བསྡུར་ཨུ་ལྷན་གྱི་ཨུ་ཡོན་བྱས། 1998ལོ་ནས་སི་ཁྲོན་བོད་རིག་པ་ཞིབ་འཇུག་ཚོགས་པའི་ལས་འཛིན་དང་རྒྱུན་ལས་ལས་འཛིན་གྱི་འགན་ཁུར། 1999ལོ་ནས་བཟུང་དཀར་མཛེས་ཁུལ་རྒན་རྒོན་ཡིག་རིས་ཞིབ་འཇུག་མཐུན་ཚོགས་ཀྱི་ཚོགས་གཙོ་གཞོན་པའི་འགན་བཞེས་པ་དང་། དེའི་རྗེས་ཁུལ་ཡིག་གཟུགས་མཁན་པོའི་མཐུན་ཚོགས་ཀྱི་ཚོགས་གཙོ་གཞོན་པའི་འགན་བཞེས། ལོ་ངོ26རིང་ལ་ལོ་རེ་བཞིན་ཡིག་གཟུགས་དང་རི་མོ་འགྲེམས་སྟོན་གྱི་བྱེད་སྒོ་རྒྱུན་མ་ཆད་པ་སྤེལ། ཁོང་གི་བོད་ཡིག་དབུ་མེད་ཡིག་གཟུགས་བརྩམས་ཆོས་ད་ལྟ་ཡང་ཀོང་ཨན་གྲོང་ཁྱེར་གྱི་བློ་མཐུན་ཏེང་ཞའོ་ཕིང་གི་དྲན་གསོ་ཁང་དུ་འགེལ་ཡོད།

མི་ཚེའི་གོམ་ཁ་འབད་བརྩོན་ཕྱོགས་ལ་གཏད།། མི་ཚེའི་ལམ་དུ་འཚོལ་ཞིབ་ཞུམ་མེད་བྱས།། མི་ཚེའི་སྙིང་པོ་ལོན་པའི་མི་བོ་ཆེ།། མི་ཚེ་དོན་དང་ལྡན་པར་ཨེ་མ་རྨད།།

2004ལོར་ལས་འཁྱུར་ངལ་གསོ་བྱས་རྗེས་སློབ་གྲྭས་ཁོང་ལོ་བཅུ་བསྐྱར་དུ་གདན་དྲངས། དགུང་ལོ་བརྒྱད་ཅུར་སོན་ན་ཡང་། ཁོང་གིས་ད་དུང《དཀར་མཛེས་ཁུལ་གྱི་ས་མིང་རིག་གནས་འགྲེལ་བཤད》ལས་རྟའུ་དང་དར་མདོ། འབའ་ཐང་། དཀར་མཛེས། བརྒྱད་ཟིལ་བཅས་ཀྱི་ཆེད་དེབ་དང་། 《སྡེ་དགེ་རྒྱལ་པོའི་རྣམ་ཐར》དང《མིང་ཆིང་དང་མིན་གོའི་དུས་ཀྱི་ཀྲུང་དབྱང་སྲིད་གཞུང་དང་སི་ཁྲོན་མི་རིགས་ས་ཁུལ་གྱི་ལོ་རྒྱུས་ཡིག་ཚང་ཕྱོགས་བསྒྲིགས》བཅས་ཀྱི་བཤེར་གཅོད་ལས་འགན་བཞེས་པ་རེད།

སྔ་ཕྱིར་དཀར་མཛེས་ཁུལ་གེ་སར་རིག་གཞུང་ལྷན་ཚོགས་ཀྱི་བློ་འདྲི་བ་དང་ཁུལ་ནང་བསྟན་མཐུན་ཚོགས་བོད་རིག་གནས་ཞིབ་འཇུག་ལྟེ་གནས་ཀྱི་ཞིབ་འཇུག་པ། ཞིང་ཆེན་བོད་ཡིག་སློབ་གྲྭའི་མཐོ་རིམ་འཆད་ཁྲིད་དགེ་རྒན། ཞིང་ཆེན་སྤྱི་ཚོགས་ཚན་རིག་གླིང་ཁམས་བོད་ཞིབ་འཇུག་ལྟེ་གནས་ཀྱི་ཆེད་བསྐོས་ཞིབ་འཇུག་པ། སི་ཁྲོན་མི་རིགས་སློབ་གྲྭ་ཆེན་མོའི་མགྲོན་ཞུས་སློབ་དཔོན། ཞང་ཀང་བོད་རིག་པ་ཞིབ་འཇུག་ལྷན་ཚོགས་ཀྱི་བློ་འདྲི་བ། ཀྲུང་གོ་བོད་རིག་པ་ཞིབ་འཇུག་ལྟེ་གནས 《བཀའ་བསྟན་འགྱུར》དཔེ་བསྡུར་ཅུས་ཀྱི་བློ་འདྲི་བ་བཅས་ལ་གདན་དྲངས་པ་རེད། དེ་མིན། 1994ལོར་ཁོང་ལ་དཀར་མཛེས་ཁུལ་ཐད་གཏོགས་ལས་དོན་ཨུ་ལྷན་གྱི1990ལོ་ནས1994ལོའི་བར་གྱི་གུང་ཁྲན་ཏང་མི་ཕུལ་བྱུང་གི་མཚན་སྙན་ཐོབ་པ་དང་དཀར་མཛེས་ཁུལ་ཏང་གི་འཐུས་མི་ཚོགས་ཆེན་ཐེངས་བརྒྱད་པར་ཞུགས། 2002ལོར་ཁོང་གི་བོད་ཡིག་དབུ་མེད་ཀྱི་ཡིག་གཟུགས་བརྩམས་ཆོས་ལ་ཁུལ་རྒྱལ་ཁྲལ་གཟེངས་བུམ་ཡིག་གཟུགས་འགྲན་བསྡུར་ཐེངས་དང་པོའི་བྱ་དགའ་ཨང་དང་པོ་ཐོབ། 2004ལོར 《དཀར་མཛེས་ཉིན་རེའི་ཚགས་པར》བཀྲམ་ནས་ལོ་ལྔ་བཅུར་འཁོར་བར་ཁོང་ལ་མཛད་མཆོག་འཕྲིན་སྦྱོར་བའི་མཚན་སྙན་ཐོབ། 2010ལོར་ཁུལ་མི་རིགས་ལས་བྱེད་སློབ་གྲྭ་བཙུགས་ནས་ལོ60འཁོར་བར་སློབ་རོགས་ཕུལ་བྱུང་གི་མཚན་སྙན་ཐོབ། 2010ལོར་དཀར་མཛེས་ཁུལ་བཙུགས་ནས་ལོ60འཁོར་བར་ཁུལ་ཨུ་དྲིལ་བསྒྲགས་པུའུ་དང་ཁུལ་རིག་རྩལ་ལྷན་ཚོགས་ཀྱི་སྤྱོད་རྩལ་གཉིས་ལྡན་གྱི་རིག་རྩལ་ལས་དོན་པའི་མཚན་སྙན་ཐོབ། 2014ལོར་ཁུལ་སྲིད་གཞུང་གིས་གནང་བའི་རིག་རྩལ་དང་སྒྱུ་རྩལ་སྐབས་དང་པོའི་ཚེ་གཅིག་གྲུབ་འབྲས་བྱ་དགའ་ཐོབ། 2014ལོར་ཀྲུང་གོ་ལོ་ཙཱ་བའི་མཐུན་ཚོགས་ཀྱི་ལོ་ཙཱ་བ་བསླབ་པ་རྒན་པོའི་གཟི་བརྗིད་མཚན་སྙན་ཐོབ། 2024ལོར་ཀྲུང་གུང་ཀྲུང་དབྱང་གིས་གནང་བའི“གཟི་བརྗིད་ངང་ཏང་དུ་ཞུགས་ནས་ལོ50འཁོར་བའི”དྲན་གསོའི་རྟགས་མ་ཐོབ་པ་རེད།།

༼ སྐལ་ཐུབ་ཀྱིས་བྲིས་ཤིང་པར་བླངས།༽