ཞོགས་པའི་མཚམས་སྤྲིན་དང་མཉམ་དུ་ང་རང་བྱིན་རླབས་ཀྱི་དྲོད་ཁོལ་འབར་བའི་ལྷ་ཁང་དུ་འཚོག་སར་སོང་། ལམ་བར་གྱི་ཤིང་སྡོང་དེ་དག་གནའ་རབས་ཀྱི་རྗེས་ཤུལ་ཞིག་དང་འདྲ་བར་སྐམ་ཞིང་ཐར་ཐོར་དུ་གྱུར། དགུན་གཞུང་རིང་མོ་འདིར། ང་ཡང་ཕྱི་རོལ་གྱི་ཤིང་སྡོང་བཞིན་གྲང་ངར་གྱིས་གདུང་བས་སྙན་ངག་ཀྱང་མེད་པར་ཆགས། འདུ་ཁང་གི་གདན་ཆ་གྲུ་བཞིའི་སྟེང་ནས་ངས་རྩེ་ར་ཆུང་ཆུང་ཞིག་བསྒྲིགས་ཏེ། མཁའ་དབྱིངས་ཀྱི་སྐར་མ་འཐུ་བའི་དག་གཙང་གི་བྱིས་བློ་རུམ་པའི་མཆེད་གྲོགས་དེ་དག་ང་ཡི་རྩེ་ར་རུ་ཕེབས་བསུ་བྱས། སྐད་གསེང་སྙན་མོའི་དབྱངས་རྟ་དང་འཆར་ཡན་ལྡན་པའི་རྩེད་རིགས་སྣ་ཚོགས་ཀྱིས་བདག་གི་འཚོ་བར་དབྱར་ཁ་ཚེས། རྩེ་ར་ཆུང་ཆུང་དེ་གཏོར་བརླག་མ་ཐེབས་པར་ནམ་ཡང་མཛའ་ཞིང་བརྩེ་བའི་སྒོ་ནས་ངོམས་མེད་དུ་སྤྱད་ན་འདོད་ཨང་། འཛུམ་གྱི་ལེར་ཁེངས་པའི་མཆེད་གྲོགས་ཚོར་ངས་ཀྱང་སེམས་པ་དཀར་པོ་དེ་བསྟན་ཅིང་བརྩེ་བ་རྣལ་མ་དེའང་ཕུལ་བ་ཡིན། བརྩེ་དུང་རེ་རེའི་ཁུག་སོ་ནས་ང་ཡི་སེམས་པའི་དཀྱིལ་ལ་ཁོང་ཚོས་དྲོད་ཁོལ་མཐའ་མེད་ཅིག་གནང་མྱོང་ཡོད་ལ། ད་དུང་ཡང་དགུན་ཟླ་རིང་མོ་ཞིག་ལ་དབྱར་ཁའི་ཉི་མ་དང་འདྲ་བར་རྟག་ཏུ་འཚེར་ཡོང་བས། ངས་ཚོད་ཚོད་དུ་རང་ཉིད་ལ་ཡིད་སྨོན་རེའང་ཤོར།

ང་རང་བྱིས་དུས་སུ་ཡིད་འོང་གི་གཏམ་རྒྱུད་ཅིག་ཀྱང་ཡོད་སྲིད་དེ། ངས་ད་ལྟ་དྲན་སླ་བ་ནི། ཆུང་དུས་སུ་རྩེ་རྡོ་སྒྲིག་རོགས་ཀྱི་སྙིང་གྲོགས་དེ་དག་ཡིན་ལ། ད་ལྟ་བསམས་ན་ཁོ་ཚོ་ཡང་བདག་གི་མཆེད་པོ་ཚོ་དང་འདྲ་བར་ཕན་ཚུན་ལག་རྡང་སྦྲེལ་ནས་ལམ་ཁ་གཅིག་ནས་བགྲོད་མྱོང་། སྐབས་དེར་མདུན་ལམ་ཟེར་བ་ཞིག་འཚོལ་མ་ཤེས་ཀྱང་རང་སེམས་ཀྱི་ལྷག་བསམ་ཟོལ་མེད་དེ་པང་དུ་བཟུང་ནས་ང་དང་ཁྱོད་ཟེར་བཞིན་སློབ་གྲྭ་ཆུང་ཆུང་དེ་ནས་ཁོ་ཚོ་ངའི་ཚེ་གཅིག་གི་བློས་ཐུབ་ཏུ་གྱུར་སོང་བས། བདག་ལ་མཚོན་ན་འདི་དག་ནི་བསོད་ནམས་ཆེན་པོ་ཞིག་ཏུ་བརྩིས་ཡོད། དྲིན་ཆེ་བའི་དགེ་རྒན་གྱི་བྱམས་སྐྱོང་ཁྲོད་ནས་ནམ་རྒྱུན་ཁ་ཚ་དང་ཞོར་ཟས་ལ་དགའ་བའི་བྱིས་པ་སྣབས་ལུག་དེ་དག་ད་ལྟར་བདེ་བར་ལེགས་སམ་ཞེས་ངས་རྒྱང་རིང་ནས་འཚམ་འདྲི་ཞིག་ཀྱང་ཞུ་འདོད། ཁྱོད་རང་ཚོར་ད་ལྟ་ཕུགས་བསམ་དང་བསམ་གཞིགས་ལྷག་མ་རེའང་ཡོད་ངེས་ཏེ། ང་རང་ནི་སྔར་བཞིན་རྗེས་མེད་ཀྱི་ངང་ད་ལྟ་བགྲོད་ཀྱིན་པའི་ལམ་ཁ་འདི་ནས་བདེ་འཚམ་གྱིས་གནས་ན་སྙམ་པ་དེ་ནི་ངའི་ཕུགས་བསམ་ཞིག་ཏུ་བརྩི་ཆོག། ང་ཚོ་སླར་ཡང་ཐུགས་འཕྲད་བྱུང་བའི་སྐབས་ཤིག་ཡོད་ཚེ། ཁྱོད་ཅག་གིས་ང་ལ་བཟོ་ལྟ་བཅོས་བཅོས་མ་ཡིན་པའི་ཆུང་དུས་ཀྱི་བརྗེད་ཐབས་མེད་པའི་འཛུམ་མདངས་དེ་བསྟན་རོགས།

ཕྱིར་དྲན་ནི་འདས་དོན་ཟབ་མོ་ཞིག་དང་ཧ་ཅང་གློ་ཐག་ཉེ་བའི་སྙན་ངག་གི་མཛེས་པ་སྟོན་ཚུལ་ཞིག་ཡིན་ནའང་། དེས་སེམས་ཀྱི་ཟབ་ས་རུ་ན་ཟུག་ལྕི་མོ་རེ་ཡང་བསླངས་ཡོང་། ཅི་ཙམ་དྲན་ན་དེ་བཞིན་སྐྱོ་བ་ཡང་རྫོགས་མེད་ཅིག་འདུག་པས། ངས་ན་ཟུག་མཐའ་དག་སེམས་སུ་སྦས་འདོད་ཀྱང་ནམ་ཡང་དྲན་པའི་བློ་ངོ་རུ་རྒྱུ་ཞིང་སྙན་ངག་གི་སྙུག་རྩེ་རུ་ལུད་ཡོང་། བསམ་ཞིང་བསམས་ན་རང་ཉིད་བྱིས་དུས་ཀྱི་འཚོ་བ་ལ་འཁྲེང་ཞེན་ཆེ་ནའང་། ང་ཚོ་འགྱུར་བག་རྒོད་པའི་རླུང་བུ་བཞིན་གང་སར་རྒྱུག་འགྲོ་བས། ང་རང་ད་ལྟ་ཕོ་ལོ་ཉི་ཤུ་ཡན་གྱི་ས་མཚམས་ཤིག་ཏུ་སླེབས་ཡོད། འཇིག་རྟེན་འདི་ཧ་ཅང་ཆེ་རུང་འཁོར་བ་དེ་ལས་ཆེ་བར་འདུག་པའི་ང་ཡི་ཚོར་བའི་ཀློང་ན། ཁྱོད་རང་ཚོ་དྲན་ཐེངས་གཅིག་གིས་གཏམ་རྒྱུད་ཀྱི་འཁོར་བ་གསོན་པོ་ཞིག་ཡོད་འདུག་ཀྱང་ངས་ཡོད་ཚད་ནས་ཡོད་ཚད་འདིར་མ་བྲིས་པར་ལུས། ད་ནི་ཅི་ཙམ་བཤད་ཀྱང་ཕྱིར་དྲན་གྱི་འདང་བརྩེ་ནི་བརྗེད་ཐབས་མེད་པའི་དྲན་ཤིང་དུ་གྱུར་ཡོད་པས་ངས་ཡང་ཡང་ཁྱོད་རང་ཚོ་དྲན་པའི་རྨི་ལམ་གྱི་འདབ་ཁ་ནས་བདེ་འཚམ་ཡིན་པའི་སྨོན་འདུན་རྣམ་དག་ཅིག་ཞུའོ།།

༼ འོ་ཟི། ༽