དགུང་སྔོན་ཟླ་བའི་མཛེས་པ་དང་།།
ས་སྟེང་བཞད་པའི་མེ་ཏོག་ཚོམས།།
དལ་བུར་བརྒྱུས་པའི་ངག་རིག་དག།
ལེགས་པའི་སྐྱེས་སུ་ཕུལ་ནས་ཡོད།།
སྐད་ཅིག་མཛེས་སྡུག་མ་ཡིན་པར།།
གཏན་དུ་གཟིམ་མེད་གནས་གྱུར་ན།།
རྣལ་འབྱོར་བྱ་བཏང་བྲག་སྐྱིབས་སུ།།
བཞུགས་ཏེ་ཐར་ལམ་འཚོལ་དོན་ཅི།།
སྣ་ཚོགས་འཁོར་བའི་རི་ཀླུང་ན།།
ཁྲ་ཆུང་མིག་གི་མདུན་ངོགས་ནས།།
མཛངས་མ་མཁའ་འགྲོ་ཡིད་འོང་མ།།
འཛུམ་གྱིས་བཞད་ན་དགའ་བ་ལ།།
སྙན་ཚིག་ཀུ་མུད་འདབ་སྟོང་དབུས།།
ལེགས་འཁྲུངས་ངག་རིག་བྱང་ཆུབ་ན།།
འདི་སྣང་སྲིད་པའི་ཕ་མཐའ་ནས།།
གྲོགས་མེད་ཁེར་རྐྱང་མ་ཡིན་ནོ།།
ལྷ་ཡུལ་ཉམས་དགའི་ར་བ་ནས།།
མཛེས་སྡུག་ལང་ཚོའི་གཟི་འོད་ཀྱིས།།
ཐམས་ཅད་མགུ་བར་བྱས་པ་ཡི།།
རབ་བཟང་དམ་ཚིག་དང་ལྡན་མཁན།།
ཚོར་བའི་དྲན་ཤིང་ཡངས་པོའི་རྩེར།།
ངག་སྙན་ཁུ་བྱུག་བབས་འདྲ་བོ།།
ང་ཡི་གནམ་སའི་ལྷ་མོ་ཁྱོད།།
སྐྱེ་བ་ལས་ཀྱི་ནོམ་པ་ཡིན།།
༼ ཁམས་ཟླ་སྲས། ༽