ཡན་ལག་བརྒྱད་ལྡན་ཆུ་ཡིས་མི་དག་ཅིང་།།
ནོར་བུ་ཀེ་ཏ་ཀས་ཀྱང་མི་དྭངས་ལ།།
ཉི་ཟླའི་སྣང་བས་འཁྱུད་ཀྱང་མི་འཛུམ་པའི།།
སྒེའུ་ཁུང་ཡོལ་བའི་འདབ་མ་སུ་ཡིས་འབྱེད།།
ཀ་ཁའི་ཕང་འགྲོ་ཡིད་ཀྱི་སོར་རྩེས་སྦྲེང་།།
བསམ་གཞིག་གླུ་དབྱངས་ལེན་གྱིན་ལེན་གྱིན་དུ།།
འཇིག་རྟེན་གསར་པ་མཐོང་བའི་གཟུགས་མེད་མིག།
ཚོར་བའི་ཁ་ཚུབ་ཕྱོགས་སུ་ཀེམ་ཀེམ་གཡོ།།
ངལ་བའི་རྔུལ་ཆུས་གླལ་སྒྱིང་དགའ་ཚལ་བརླན།།
གཉིད་ཀྱི་པད་མའི་ཟིལ་མངར་ཅི་ཡང་བརྟས།།
རྫི་མའི་བུང་བ་མྱོས་པས་འགྱེལ་རྩོམ་ཡང་།།
དུས་ཀྱི་དབྱར་ཁའི་སྐྱེ་འཆི་བསམ་བཞིན་བརྟུན།།
གང་ཞིག་ལུས་ཅན་སྨྲ་བའི་འབབ་སྟེགས་ལས།།
ཁྱོད་རང་དཀར་རམ་ཡང་ན་ནག་པའི་ཚུལ།།
ཇི་ལྟར་འཆད་པའི་ཟློས་གར་འཁྲབ་མོད་ཀྱང་།།
རང་ཉིད་ངོ་བོའི་གཤིས་འདི་བསྒྱུར་ནུས་སམ།།
དྭངས་བསིལ་གྲུ་ཆར་ཤག་ཤག་འབབ་པའི་རྒྱུན།།
དཔྱིད་གསར་སྒེག་མོའི་བྱད་བཞིན་བཀྲུས་པ་ལྟར།།
རེ་ཞིག་སྣང་བ་མག་མོག་ཨ་དར་ཤ།
དཔེ་ཀློག་ཕྱགས་དར་བགྱིས་པས་གཟུགས་ཀུན་གསལ།།
༼ ཨ་བཙུན་གཡུང་དྲུང་བཀྲ་ཤིས། ༽