གཞིས་འཁོར་བའི་ནང་གི་ལྷ་མོ།།
ཐུགས་ཟླ་སྒོར་ང་ལ་ཕྱོགས་ཏེ།།
ལོ་ཟླ་བའི་དགུ་ཚིགས་བར་ནས།།
སྙིང་དམར་པོ་ངལ་བཞིན་མེད་དམ།།
ཞལ་མེ་ཏོག་རླུང་ཁར་འཛེད་རིང་།།
རྐང་བ་མོ་ལྷམ་ཆུང་གྱོན་ནས།།
མགོར་སྐར་རྒྱན་ཞྭ་མོ་བྱས་ཏེ།།
དྲིན་མ་ལོ་དཀའ་བཞིན་མེད་དམ།།
དབྱར་ཆར་ཆུའི་སྨུག་ལོང་ཁྲོད་ནས།།
དགུན་ཙག་ངར་བུ་ཡུག་ཁྲོད་ནས།།
སེམས་བྲེལ་བྲེལ་འཚུབ་འཚུབ་ངང་ནས།།
ལོ་ཟླ་བ་སྐྱེལ་བཞིན་མེད་དམ།།
ལུས་ལྷུ་ཚིགས་ཚ་ཤིང་གཟེར་ལ།།
སྐྲ་ནག་པོར་སྐར་མདའ་ལྷུང་བཞིན།།
མིག་ཁྲ་ཆུང་རྒྱང་དུ་ཅེར་ནས།།
ནམ་ཉིན་མཚན་འདུར་བཞིན་མེད་དམ།།
རི་སྡེ་བའི་མིག་ལ་བསྟུན་ཞོར།།
གཉེན་ཉེ་བས་སེམས་ཁ་བསྲུངས་ཏེ།།
མ་རང་ཉིད་གཟབ་ནན་ངང་ནས།།
ཚེ་རིང་ཐུང་འཚེར་བཞིན་མེད་དམ།།
ཟས་ཟ་བཏུང་ཞིམ་ཚད་མངར་ཚད།།
ཟ་མི་བྲ་རུམ་དུ་བཅུག་ནས།།
བུའི་ཁ་ངོ་ཡིད་ལ་བསྒོམས་ཏེ།།
དེར་ཨེ་འཕྲོད་རེ་བཞིན་མེད་དམ།།
སྦྲ་ནག་པོའི་ཆོན་ཕུར་ཟུར་ནས།།
གོས་ཕུ་ཐུང་རྒྱབ་ཏུ་མདུད་དེ།།
འབྲི་མཛོ་མོའི་ལྷས་རའི་ནང་ནས།།
དཀར་འོ་མ་གསོག་བཞིན་མེད་དམ།།
དྲིན་ཨ་མ་བརྩེ་དུང་ཅན་མ།།
སེམས་ཕྱི་ནང་བར་གྱི་དྲོད་ཐིག།
སྲོག་དམར་པོ་འབེན་ལ་བཞག་ནས།།
བུའི་ཆེད་དུ་སྐྱོ་བཞིན་མེད་དམ།།
ལག་མཛུབ་མོའི་སེན་ཀ་རྫོགས་ཤིང་།
ཞལ་པདྨར་གས་སྲུབ་ཤོར་བཞིན།།
རི་ལ་ལུང་ཐང་གསུམ་ཉུལ་ཏེ།།
སྐུ་འོ་བརྒྱལ་ཆེ་བཞིན་མེད་དམ།།
སེམས་དགའ་སྐྱོ་མོད་པའི་བུད་མེད།།
རིགས་དམན་པའི་གྲས་སུ་བགྲང་མོད།།
ཐབ་སྒྱེད་པུའི་འགྲམ་དུ་མེད་ཚེ།།
གཞིས་འཁོར་བའི་བདེ་སྐྱིད་ཡལ་འགྲོ།།
༼ འོད་འཛིན་མ། ༽