དཔྱིད་འགོའི་ཁ་ཆར་འདྲེས་མ།།
ས་གཞིའི་པང་ན་འཐོར་བཞིན།།
སྔོ་ལྗང་མྱུ་གུ་འབུས་པའི།།
དཔལ་ཡོན་རབ་ཏུ་རྒྱས་བྱུང་།།
འཇམ་མཉེན་མེ་ཏོག་འདབ་མ།།
དཀར་དམར་ཁ་དོག་ཡག་པ།།
མཁས་པའི་པིར་ལས་འཁྲུངས་ནས།།
སྣུམ་ཚོན་རི་མོ་བྲིས་འདྲ།།
ལྗོན་པའི་ཡལ་གའི་རྩེ་ནས།།
བྱིའུ་ཆུང་གསུང་སྐད་ལྷང་ལྷང་།།
མེ་ཏོག་ཟེའུ་འབྲུའི་དབུས་ལ།།
རྐང་དྲུག་རྩེད་འཇོ་རོལ་བྱུང་།།
མཛེས་སྡུག་པད་མའི་ཁྲི་ཤིང་།།
མེ་ཏོག་སྣ་ཚོགས་བཞད་ནས།།
ཟིམ་ཟིམ་ཆར་པས་བརླན་པའི།།
ཡིད་འོང་དཔྱིད་ཀྱི་དཔལ་ཡོན།།
དཔྱིད་འགོའི་ནོར་འཛིན་འཕང་བར།།
མེ་ཏོག་ཁྲ་རྒྱན་སྤྲས་བྱུང་།།
སྒེག་ལྡན་ཁམ་བུའི་ཁྲི་ཤིང་།།
དཔྱིད་ཟླའི་གཟི་མདངས་འདྲ་བ།།
ལང་ཚོའི་དཔལ་ཡོན་བཀྲ་བའི།།
མེ་ཏོག་སྐྱེད་ཚལ་འགྲིམ་དུས།།
ཁ་འབྲས་མཚར་བའི་ཆུང་འདྲིས།།
མིག་གི་ལམ་ལ་ཤར་བྱུང་།།
ཨེ་མ་དཔྱིད་འགོའི་མེ་ཏོག།
ཡིད་དབང་འཕྲོག་པའི་མཚར་སྡུག།
མཛེས་སྡུག་དཔལ་ཡོན་འདི་འདྲ།།
ལྷ་ཡུལ་ལས་ཀྱང་སྐྱིད་པ།།
དཀར་དམར་ཚོན་མདངས་ཡག་པའི།།
འབྲས་ལྡན་ཁམ་བུའི་མེ་ཏོག།
བཅུ་དྲུག་ན་ཆུང་བུ་མོའི།།
ལང་ཚོ་དེ་དང་འདྲ་བྱུང་།།
སྒེག་ལྡན་དཔྱིད་ཀྱི་དཔལ་ཡོན།།
མི་ཡུལ་ལོངས་སྤྱོད་འདྲ་བ།།
ཟིམ་ཟིམ་ཆར་པའི་ཁྲོད་ནས།།
མེ་ཏོག་བཞད་ཁ་ཕྱེས་སོང་།།
མ་བཏབ་མེ་ཏོག་མཛེས་པ།།
མ་བྲིས་རི་ཆུའི་བཟོ་བཀོད།།
མ་བཞེངས་ངོ་མཚར་ཆེ་བ།།
མ་ཡུམ་གངས་ལྗོངས་ཕྱུག་མོ།།
༼ རྡོ་རྗེ་ཐར་ལམ། ༽