ངག་རིག་འཕྲུལ་གྱི་རྒྱལ་ཐབས་འཛིན་པའི་གཞིར།།

ཕྱག་སོར་པདྨའི་ལྡེམ་ལ་འཇའ་གུར་ཕུབ།།

མི་མངོན་ལྷ་ཡི་ཚལ་དུ་གཏན་བཞུགས་པ།།

སྒྲ་དབྱངས་ངག་གི་མི་མོ་སྤྱི་བོར་བཀུར།།

དགྱེས་འཛུམ་སྤྱན་གྱི་མདངས་ལ་འོད་ཟེར་སྙིལ།།

དེ་རུ་འཁྲིད་པའི་བདག་གི་སེམས་པ་འདི།།

ཧ་ཅང་གཉོམ་པོ་ཞིག་གི་ངང་ཚུལ་གྱིས།།

ཁྱེད་ལ་གུས་ཤིང་ཞུམ་ཞུམ་དང་བཅས་ཏེ།།

སྒྲ་དབྱངས་སྙན་པའི་སྦྲང་ཆར་ཟིམ་ཟིམ་འབབ།།

དེ་ཡི་དབུས་སུ་འཇའ་ཚོན་སྣ་ལྔ་བཀྲ།།

ཁོ་བོའི་དམར་ཆུང་དྲན་པའི་ཁུགས་སོ་ན།།

གང་གི་སྤྱན་རས་དགྱེས་དགྱེས་འཛུམ་འཛུམ་དུ།།

དཀར་གསལ་ཟླ་བའི་གཞལ་མེད་དཀྱིལ་འཁོར་དུ།།

གཏན་བཞུགས་རྒྱལ་ཀུན་གསུང་གི་བདག་མོ་སྟེ།།

འགག་མེད་གསུང་གི་རང་སྒྲ་སྒྲོགས་པ་ཡི།།

མཚོ་བྱུང་དབྱངས་ཅན་མ་ཡི་ཞབས་དྲུང་དུ།།

རབ་མཛེས་ཞལ་གྱི་ལང་ཚོ་ཅི་དགར་དུ།།

འཛུམ་པའི་ངག་རིག་དབྱངས་ཀྱི་འཁྲི་ཤིང་རྩེར།།

འཆར་ཡན་རྟོག་པའི་གླུ་དབྱངས་ལེན་མཁན་དེ།།

ཁྱེད་ཀྱིས་བརྩེ་བའི་རྗེས་སུ་འཛིན་པར་ཞུ།།

མི་ཚེའི་སྣང་བའི་མགུར་ལ་གསན་མཛོད་དང་།།

འཁོར་བའི་རི་ཐང་བརྒལ་ཏེ་འཚོལ་བཞིན་ཡོད།།

དབྱར་གཞུང་མེ་ཏོག་གསེབ་དང་སྟོན་དུས་ཀྱི།།

ཁ་བའི་ཀློང་དང་དགུན་གྱི་གྲང་ངར་ཁྲོད།།

རིག་གཞུང་མེ་ཏོག་འདྲ་བོའི་སྐྱེད་ཚལ་དུ།།

གཡུ་སྦྲང་བུང་བ་ངེད་གཉིས་ཉིན་མཚན་ཀུན།།

ཕྱག་སོར་ལྡེམ་ལ་བཀུག་པའི་ཚིག་གི་ཕྲེང་།།

ཁྱེད་རང་དགྱེས་པའི་མཆོག་གི་གཙོ་བོ་སྟེ།།

ཁྱེད་ནི་མཛེས་སྡུག་ལྷ་ཡི་མོ་གཞོན་ཞིག།

མཁོས་ཆུང་བུ་ཡི་སྙིང་ནོར་དེ་ཁོ་ན།།

མ་བཅོས་ཐོལ་གྱིས་བབ་པའི་སྙན་ཚིག་འདི།།

ང་ཡི་སྐྱོ་བ་སངས་པའི་ཆང་ཕོར་གང་།།

༼ ཁམས་ཟླ་སྲས། ༽