དུས་ཀྱི་ལང་ཚོ་མིག་གི་དཔྱིད་དུ་ལྡེམ།།
རེ་བའི་ཉི་མདངས་འཚོ་བའི་རྟེན་དུ་འཚེར།།
ཐང་གི་འཇའ་འོད་འཛིན་པའི་བྱིས་བློ་ཅན།།
སྒྱུ་མའི་ཆང་གིས་བཟི་བའི་མགྲོན་པོ་ཡིན།།
ཆར་ཆུས་ས་གཞི་བརླན་པའི་ས་སྲོས་རེ།།
འབྲུག་སྒྲ་འུར་གྱིས་ལྡིར་བའི་ས་སྲོས་རེ།།
སྟོང་ཉིད་སྣང་བར་ཞེན་པའི་བྱིས་བློ་ཅན།།
སྤྲིན་འབྱུང་ཉམས་སུ་བསྟར་བའི་མགྲོན་པོ་ཡིན།།
ཕྱི་ཡི་མཛེས་དཔལ་སྙིང་གི་བུ་ལྟར་གཅེས།།
ནང་གི་བདེ་དྲོད་མ་ཚོར་ངལ་གྱིས་གཏམས།།
རྨི་ལམ་བདེན་པར་རློམ་པའི་བྱིས་བློ་ཅན།།
སྔོན་གྱི་བུ་ལོན་འདེད་པའི་མགྲོན་པོ་ཡིན།།
སྐྱིད་མ་སྡུག་གི་ཁངས་ཆར་ཡེར་བ་མེད།།
གཉིད་མ་སད་ཀྱི་རྟོག་འཆར་སད་དུས་མེད།།
ལངས་མ་འགྱེལ་གྱིས་གསོན་པའི་བྱིས་བློ་ཅན།།
འཁོར་བའི་སྙིགས་རྡུལ་འཐུ་བའི་མགྲོན་པོ་ཡིན།།
འཛུམ་སྒོ་གཏན་དུ་བརྒྱབ་པའི་མཚན་མོ་རེ།།
སྡུག་ཡུས་ཐོད་པར་དཔྱངས་བའི་མཚན་མོ་རེ།།
འདི་སྣང་ལས་ལ་སུན་པའི་བྱིས་སེམས་ཅན།།
སྙན་ངག་རོ་ཏོ་ཆགས་པའི་མགྲོན་པོ་ཡིན།།
ན་ཚོད་མེ་ཏོག་འདབ་ཁ་རྙིད་ཀྱིས་བཅུན།།
ཤེས་རབ་རལ་གྲིའི་སོ་ཁ་བཙའ་ཡིས་ཟིན།།
མིག་རྒྱང་ཐུང་བའི་རྨོངས་རྟུལ་བྱིས་བློ་ཅན།།
རང་སྣང་རླུང་ལ་བསྐུར་བའི་མགྲོན་པོ་ཡིན།།
ཚེ་ཡི་ས༵་ཁྱོན་མུན་པའི་གྲིབ་ཀྱིས་བཟུང་།།
ལོ་ཟླའི་ཆུ༵་ཐིགས་བཙགས་ཀྱང་སྙིང་པོས་སྟོང་།།
འདོད་ཡོན་མེ༵་ལྕེ་གཟུར་ཡང་བྲལ་ཐབས་དབེན།།
མདུན་ལམ་རླུང༵་ཁའི་སྡོང་ལོ་འབྲས་མེད་མཆོངས།།
༼ གངས་ཆབ་ལྷ་སྲས། ༽