དཔྱིད་ཀ་བཞད་སོང་ཁ་བ་སིབ་སིབ་བབས། །
གངས་ཆར་འདྲེས་མས་ས་ཆེན་མཛེས་པར་བྱས། །
དཔྱིད་ཀའི་དཔལ་ཡོན་སྒུག་པའི་གཞོན་ནུ་ལ། །
སྙན་ངག་དབྱངས་ཀྱི་མེ་ཏོག་གསར་པ་བཞད། །
གསར་འཁྲུངས་ལྗོན་པའི་རྩེ་ནས་མེ་ཏོག་འཛུམ། །
དཔྱིད་དཔལ་གནས་འདིར་ཕེབས་པའི་བརྡ་ཞིག་ཐོས། །
སེམས་ཀྱི་བག་ཆགས་ཟབ་སའི་དུས་ཚིགས་འདིའི། །
མཛེས་སྡུག་རོལ་མྱོང་བྱོས་དང་ན་གཞོན་པ། །
དཔྱིད་ཀྱི་རླུང་བུས་ནང་སེམས་མཚོན་པ་ཡིན། །
བདེ་སྡུག་ངག་ལ་གྱེར་བའི་མགྲིན་ཚབ་ཡིན། །
བརྩེ་བའི་མགུལ་རྒྱན་བཏགས་པའི་གཞོན་ནུ་སྟེ། །
འཇིག་རྟེན་མཛེས་པའི་སྙིང་པོ་དཔྱིད་ཀ་ཡིན། །
མཐོང་བའི་ཡིད་འཕྲོག་སྨན་ཆུང་གཞོན་ནུ་མའི། །
ལང་ཚོར་འགྲན་ཟླ་བྱེད་མཁན་དཔྱིད་ཀ་ཡིན། །
ཚངས་དབྱངས་བུ་མོ་སྙན་པའི་སྒེག་ལྡན་མའི། །
མགྲིན་པའི་དབྱངས་ལ་ཟུར་ཟ་བྱེད་མཁན་ཡིན། །
དཔྱིད་ཀའི་དུས་འདིར་གཞོན་ནུའི་ལང་ཚོ་སྨིན། །
ལན་བུ་ནག་པོ་རླུང་བུས་སྒུལ་དུས་ཡིན། །
འདོད་པའི་སྣང་བ་རྡོལ་བའི་དུས་ཤིག་ཡིན། །
འཁོར་བའི་ནང་གི་མཛེས་པའི་མཛེས་པ་ཡིན། །
རླུང་བུས་བདས་པའི་སྤྲིན་གྱི་འདུ་འགོད་གན། །
ནམ་ཟླ་གཞན་ཞིག་བསླུ་བའི་སྔོན་འགྲོ་རེད། །
མཛེས་སྡུག་སྔོ་ལྗང་བཀྲ་བའི་སྟ་གོན་རེད། །
ཡར་ལ་གཟིགས་དང་རིག་མཐུན་གཞོན་ནུ་ཚོ། །
སྨུག་རླངས་སྐྱ་བོས་མཐོན་པོའི་རི་རྩེ་གཡོགས། །
རླུང་བུ་འཇམ་པོ་འགྲམ་པའི་སྟེང་ནས་ལྡང་། །
སྣ་ཚོགས་མཛེས་སྡུག་བསུ་བའི་གྲ་སྒྲིག་གིས། །
དཔྱིད་ཀའི་དཔལ་ཡོན་མཛེས་སྡུག་འདི་ནས་འཚེར། །
མཚོ་མོའི་དར་ཁ་མཐུག་པོ་འདི་ནས་ཕྱེས། །
ས་ཆེན་འཁྱག་གིས་བསྡམས་པ་ངང་གིས་ལྷོད། །
འཇིག་རྟེན་འདི་རུ་དྲོད་ཁོལ་འཁྱིལ་བ་ཡིས། །
དཔྱིད་ཀ་སེམས་སུ་གནས་པ་དེ་གས་ཡིན། །
གསེར་མདོག་ས་གཞི་ལྗང་མདོག་འགྱུར་ལ་ཉེ། །
མཐིང་མདོག་དབྱིངས་ནས་ཁུ་འཕང་ཉུང་ཙམ་གྱིས། །
མཛེས་སྡུག་གཞན་ཞིག་བསྐྲུན་པའི་དཔལ་ཡོན་ལ། །
སྐུལ་མ་ཡང་ཡང་གནང་བའི་དུས་ཤིག་བསླེབས། །
ཆུ་བོ་ཤག་ཤག་བཞུར་སྒྲ་རྣ་བར་སྙན། །
ཕུན་ཚོགས་དཔྱིད་ཀྱི་དཔལ་ཡོན་བཞད་པ་ཡིས། །
རྟོག་བཏགས་ཡིད་ཀྱི་སྒོ་མོ་དལ་གྱིས་ཕྱེས། །
ཚོར་བའི་ཟླ་འོད་ཤར་རིའི་རྩེ་ནས་ཚེས། །
༼ རྫ་ཤུལ་བློ་བཟང་། ༽