རེ་སྒུག་མང་པོ་ཞིག་གི་ཁྲོད་ནས།
ལོ་འཁོར་ཧྲིལ་པོ་གཅིག་རྫོགས་རྗེས།
ཡང་བསྐྱར་ལོ་ཟླ་ཞིག་གི་
དབུ་བརྙེས་སོང་།
སློབ་གྲྭའི་ར་བར་སླེབས་པའི་
དུས་འདིར།
ཁྱོད་ལ་དམིགས་ཡུལ་ཅི་ཞིག་
ཡོད་ཀྱང་ཆོག་མོད།
ཁོར་ཡུག་འདིའི་སྒོ་དང་སྒེའུ་
ཁུང་རེ་རེ་ནས་འཚང་འོང་བའི་
འདུག་མི་སྲིད་པའི་དུས་ཚོད་ཀྱི་
གོམ་སྒྲས།
འཆི་བ་ནི་མ་རིག་པ་ལས་
བྱུང་ཚུལ་འཆད་ཀྱིན་འདུག།
དྲན་པས་བཟོས་པའི་ཀོ་གྲུ་རེ་རེས།
ནང་སེམས་ཀྱི་མཚོ་མོ་བསྐྱོམས་ནས།
འཁྱག་ཤུར་ཤུར་གྱི་མཚན་མོ་
འདི་དག་བརྒལ་དུས།
སྙིང་གི་དགའ་མ་ལྟ་བུའི་
ཟླ་བ་གོར་གོར་གྱིས་བཤད་རྒྱུར།
གསོན་པ་ནི་མདུན་དུ་ཆས་པའི་
ལམ་བར་ནས་རྙེད་པ་རེད་ཟེར།
རྒྱུ་མཚན་དེ་དག་གི་དབང་གིས།
སོ་སོ་ལ་དབང་བའི་ཐོས་
བསམ་གྱི་འཇིག་རྟེན་འདིར།
དུས་ཚིགས་ཀྱི་ཅོང་བརྡ་ལ་
ཡང་ཡང་མཉན་ནས།
རེ་སྙེག་གི་ལྗོན་པ་ལ་ཆར་པ་
གཏོར་བ་ནི།
དཔྱིད་དཔལ་རྒྱས་པའི་
མཛེས་སྡུག་གི་གོ་རིམ་
ཞིག་མ་ཡིན་ནམ།
༼ ལྷ་ཚང་ཚུལ་བསྟན། ༽