ཉི་མ་དབྱིངས་ནས་བོར་བའི་ས་སྲོས་ཀྱི་རྗེས་ཤུལ།།
གྲིབ་མ་ཁུག་པ་བཅོ་བརྒྱད་ར་མདའ་ལ་འབྱོར་དུས།།
ཁྱི་ལྡོམ་ངེས་མེད་ཀུ་ཅོ་ཡོ་ལང་གཅིག་བཏོན་ཏེ།།
སྨག་རུམ་མཚན་གཞུང་རིང་མོ་བསུ་མ་རང་གནང་བྱུང་།།
མཚོ་རླབས་རླུང་གིས་བདས་པའི་མཐོ་སྣང་ལ་ལྟ་ཚེ།།
ཟླ་འོད་གཉེར་རིས་འཁྱུག་འཁྱུག་ཞེ་སེམས་སུ་ལྷུངས་ནས།།
བས་མཐའི་མཚོ་ཁར་གཡེང་བའི་མིག་ཟུང་གི་བླ་འོག།
ཞི་ལྷོད་འོད་ཀྱི་ཉག་མས་འཚེར་འཚེར་དུ་མཛེས་ཡོང་།།
འདབ་ལྡན་ཚང་མར་བསྙེགས་པའི་མཐོང་སྣང་དག་མི་མོལ།།
ཞི་འཇགས་ལྷོད་ཀྱིས་འཚོ་གནས་གཞིས་ཀ་ལ་ལོག་འདོད།།
ཞེ་འཁྲེང་ན་བུན་ལང་ལོང་ཚུར་ཚུར་ལ་འཁོར་དུས།།
ལྦི་རག་ཤེལ་དམ་རེ་གཉིས་ཧྲོག་སྒྲའི་ངང་ལྷུངས་སོང་།།
ཉི་མའི་འཛུམ་ཞལ་མོག་པའི་ས་མཐའ་ཡི་སྟོན་མཇུག།
ལུས་སེམས་གྲང་བས་གཙེས་པའི་ཚོར་ཤེས་ཀྱི་རྫིང་ཁར།།
མ་བཅོས་ཚིག་རིས་ངང་མོ་རང་དགར་དུ་འཁྱོལ་དུས།།
ཚོར་བའི་རྣམ་ཤེས་སྦྲུམ་པའི་ཡིག་འབྲུ་འགའ་ལུས་འདུག།
ཁེར་མ་འཚོ་བས་གདུང་གནར་དབྱིངས་སྟོང་གི་ཟླ་བ།།
གཙང་ཆབ་ལྷམ་མེར་ལྟེམས་ངོགས་མིག་ཟུང་གིས་ཅེར་བས།།
མཚོ་རླབས་ཕྲེང་བ་རེ་རེས་གདུང་སེལ་གྱི་དོད་དུ།།
ཡོམ་ཡོམ་འཁྱུག་འཁྱུག་ལུས་ཀྱིས་གར་སྟབས་ངང་རྩེན་པ།།
གྱང་ལྡེབས་བཀལ་བའི་རིག་བྱེད་ངག་དབང་གི་ཐང་གར།།
དད་གསུམ་ཕྱག་གི་པད་མོ་སྙིང་ཁ་རུ་ཟིམ་པས།།
རེ་ཆད་ཡིད་མུག་སྨག་རུམ་སེམས་གཏིང་ནས་སེལ་སླད།།
བྱིན་རླབས་འོད་ཀྱི་འཁྱུག་གར་མིག་ཀོང་དུ་འཕྲོ་རོགས།།
མི་སེམས་ཞི་བའི་སྤྱིལ་བུར་མལ་ས་རུ་བསྟེན་ནས།།
ཚོགས་དྲུག་སྣང་བའི་འཇའ་གུར་རང་ཡལ་ངང་བུད་དུས།།
ཞི་ལྷོད་བག་ཕེབས་ངལ་སངས་སྟེགས་བུ་ནི་སོ་མ།།
ངལ་དུབ་ལུས་སེམས་གཉིས་ཀྱི་ཉེ་ས་རུ་མཆིས་འདུག།
༼ དབྱངས་ལྡེའུ། ༽