ལག་པ་འདི་ག་ལེར་ཕར་བསྲིངས་ན།
ཁྱོད་ལ་རེག་ཐུབ་མོད།
སྐད་ངག་དམའ་མོ་ཡིས་བོས་ན།
ཁྱོད་ཀྱིས་གོ་ཐུབ་པ་འདྲ།
བར་མཚམས་དེར།
གང་ནས་ལྡང་ཡོང་བ་མི་ཤེས་པའི་
རླུང་བུ་ཞིག་གིས།
ཁྱོད་ཀྱི་སྐྲ་ལོ།
སྣུམ་ཤིག་ཤིག་ངའི་མིག་མདུན་དུ་བསྐྱོད་ཅིང་།
རིང་ནས་འགུག་པའི་དྲི་ཞིམ་དེ།
ཏག་ཏག་ངའི་དྲི་འཛིན་དབང་པོར་སིམ།
དེ་དུས་ངའི་སྙིང་ཆུང་འདི་བར་མེད་དུ་གཡུག་བྱུང་།
ཡིན་ན་ཡང་།
ངོ་ཚའི་སྒྲོག་གིས་བཅིངས་པའི་
འུ་གཉིས་ཀྱི་ཞལ་སྒོ་འདི།
སྔར་བཞིན་ལྷིང་འཇགས་སུ་གནས་འདུག།
སྐབས་རེར།
དགྱེས་འཛུམ་ལྷུག་ལྷུག་གྲོལ་བའི་
ཁྱོད་ཀྱི་ཞལ་ངོ་ཕྱིར་འཁོར་ཐེངས་རེར།
དགའ་བ་དང་འཇིགས་སྣང་གི་ཚོར་འདུ་སྤེལ་མ།
ངའི་སེམས་ཀྱི་ཡོར་བར།
ཆུ་ལོག་དྲག་པོ་བཞིན་དུ་བརྒྱུགས།
དེ་དུས།
ངས་མིག་ཟུང་འདི་གང་ཞིག་བསྙེག་དགོས་
པའང་མི་དྲན།
དལ་ལྷོད་ལྷོད་ཀྱིས་བསྒྱུར་བའི་ཁྱོད་ཀྱི་གོམ་ཆུང་།
རླུང་བུ་བཞིན་ཡུན་རིང་ཞིག་ལ།
ངའི་ཡིད་ཀྱི་རྩྭ་ཐང་དུ་འཁོར་ཞིང་།
རླུང་བུ་བཞིན་སླར་ཡང་ཐག་རིང་ལ་བཞུད་སོང་།
དྲན་གདུང་གི་རྗེས་ཤུལ་སྐྱ་བོ་ཞིག་བཞག་ནས་བཞུད་སོང་།
༼ གློག་འོད། ༽