མགོ་ཐོག་གི་ནམ་མཁའ་ནས་གྱེན་དུ་འཕུར་སོང་བས།
ཁ་རུ་ལྕགས་གྲང་མི་དགོས་པའི་སངས་རྒྱས་ཀྱི་ལྷ་རྟ།
སྐྱེ་རྒ་ན་འཆིའི་སྡུག་བསྔལ་གྱི་ཐར་ལམ་རྙེད་པའི་སྐྱེས་མཆོག་ཅིག།
ཡབ་དང་ཡུམ། བུ་དང་ཆུང་མ།
བློན་དང་འབངས། ཁྱིམ་དང་སྲིད་བཅས་རིང་དུ་སྤངས་ཏེ།
མི་མེད་དབེན་པའི་ནགས་ཁྲོད་དུ་ཕྱིན།
སྐབས་དེར། སེམས་ལྡན་གང་མང་ཞིག་སྡུག་བསྔལ་གྱིས་གཟིར་ཡང་།
རྟག་པར། རྒྱལ་སྲས་གཞོན་ནུ་དོན་གྲུབ་ལ་བརྩེ་བའི་མིག་གིས་གཟིགས།
དྲན་གདུང་གི་མཆི་མ་ཕུད།
ཐ་མར་སེམས་ཁྲལ་གྱི་ཚེ་འཕོས་པའི་ལྷ་རྟ།
ཇི་སྲིད་བསྐལ་བའི་བར།
སྟོན་པའི་རྣམ་ཐར་གྱི་ལྡེབས་ངོས་ན་གསལ་ལེར་མངོན།
ཕ་ཡུལ་གྱི་རྩྭ་ཐང་གིས་བོར་བའི་རྟ་ཕོ།
རྔ་རྔོག་ཤིག་ཤིག་ཏུ་རང་གི་བདག་པོ་འཚོལ།
འཚེར་སྐད་ལྷང་ལྷང་གིས་སྤང་ལྡེམ་པར་བྱས།
འདོ་བ་གཡུ་ཆུང་དྲུག་དཀར། ཡབ་མེས་ཀྱི་བློ་རྟ།
གཡང་གི་རྩྭ་ཆུ་དང་གྱེས་པའི་རྟ་ཕོ།
རྣོ་ལྕགས་ཀྱི་ཁ་ར་དང་ཕྲད།
སྐབས་དེར།
རྟ་ཕོའི་ལས་དབང་ལ་སེམས་ཁུར་གནང་མཁན་སུ་ཞིག་ཡོད་ཨང་།
རྟ་ཕོ།
སྟག་ཤ་ར་ཞིག་གི་འགྲོགས་ཟླ་ཉག་ཅིག།
རྒྱང་སྐྱོད་ཀྱི་ལོ་ཟླ་ལ་དྭངས་གཙང་གི་མཛེས་སྡུག་བསྐྲུན་མཁན།
ཁེར་རྐྱང་གིས་གཟིར་བའི་ལོ་ཟླའི་ནང་།
རྨི་ལམ་དུ་རྟ་ཕོའི་འཚེར་སྐད་ཐོས།
ཕྱིར་ཉིན་གྱི་ཞོགས་པར།
ཞེ་འདྲིས་ཀྱི་རྟ་ཕོའི་གཏམ་རྒྱུད་ཡང་ཡང་གླེང་།
ལྷང་ལྷང་གི་འཚེར་སྐད།
གངས་རི་དང་། སྤང་གི་གཤང་གཤོང་ལ་འཁྱིལ།
རྨིག་བཞི་ལ་རླུང་གི་གཤོག་པ་ཐོགས་འདྲ།
རྔ་རྔོག་གི་རྦ་རླབས་ལྷོ་སྤྲིན་མཁའ་ལ་འཕྱོ་འདྲ།
སྲིད་པའི་དབྱངས་ཡིག་འཚོལ་བའི་རྨི་ལམ་གྱི་རྟ་ཕོ།
འཁོར་བའི་བདེ་སྡུག་མྱོང་བའི་སྟག་ཤ་རའི་ཞེ་རྟེན།
ནམ་མཁའི་པང་ན་བང་རྩལ་རླུང་ལ་བཅོལ་བའི་ཤིས་སྤྲིན་གྱི་རྟ་ཕོ།
རྩྭ་ཐང་གི་ཕ་མཐར་འགྲེང་ནས།
ངས་གཤོག་ཟུང་བརྐྱངས་པའི་གྱི་ལིང་ཁྱོད་ཡང་ཡང་དྲན།
༼ གངས་ཚ་འཇོམས། ༽