དབྱིངས་ཀྱི་ཉི་གཞོན་འཛུམ་བརྒྱ་མཁའ་ནས་བཀྲ།།
ལྷོ་ཡི་སྤྲིན་དཀར་གནམ་མཐའི་མཚམས་སུ་ཆས།།
དྲི་བྲལ་སྔོ་བསངས་བུ་མོའི་བཞིན་རས་སྒེག།
ཡིད་འོང་དཔྱིད་དུས་དྲོན་འཇམ་ག་ལེར་ཐོན།།
རྒོངས་ཀའི་ཉི་ནུབ་མཚམས་སྤྲིན་ལྭ་བ་འཕྱང་།།
ཆར་སྤྲིན་འདྲེས་ནས་ཟིམ་ཟིམ་དལ་གྱིས་འབབ།།
ལྗོན་ཤིང་གཡོ་བཞིན་ཁ་དོག་ག་ལེར་བརྗེས།།
མཉེན་པའི་ལྡེམ་ལྡེམ་ཉམས་ཀྱི་ངང་ཚུལ་སྟོན།།
ཞིང་པས་འབྲུ་དྲུག་ས་བོན་རྨོས་འདེབས་བྱས།།
དཔྱིད་དཔལ་མངོན་བཞིན་ས་བོན་བཀྲ་ལ་བརྩོན།།
མེ་ཏོག་རྩི་ཤིང་འགོ་བོ་འབུས་པའི་ངང་།།
ཕྱི་ཡུལ་ཁ་དོག་སྔོ་བའི་མདངས་སྣེ་མངོན།།
དཔྱིད་རླུང་འཇམ་པོ་གང་ཕྱོགས་སྡང་དང་ལྷན།།
ཕྱི་ནང་དྲོན་ཁུལ་དཔལ་ཡོན་ཤར་བ་ཡིས།།
བྱ་བྱེའུས་ཚང་དུ་མི་སྡོད་འཕུར་དགའ་རྩེད།།
སྙན་པའི་མགྲིན་གླུ་འདོན་བཞིན་མཆུ་དག་སྦྱོར།།
ཤང་ཤང་ཆུ་ཕྲན་སྔོན་མོ་མདའ་ནས་བཞུར།།
ཤིག་ཤིག་ནགས་ཀློང་འགོ་ལྕོག་ཡང་ཞིང་ལྡེམ།།
ཚང་ཚིང་ནགས་མའི་གསེབ་ཀྱི་བྱ་ཁྱུ་ཡིས།།
དཔྱིད་དཔལ་དགའ་བའི་ཟློས་གར་བརྩེ་བྲོ་འཁྲབ།།
སྟོད་ཕྱོགས་རྫ་དཀར་བསྟར་ཕྲེང་བརྗིད་པར་རྔམ།།
སྨུག་ལོང་རྫ་འདབས་ཚོགས་ཀྱི་སྐེ་དཀྲིས་བཅིང་།།
དཔྱིད་གསར་ཚེས་པས་རི་དྭགས་ཁྱུ་ཚོགས་ཀྱིས།།
སྤྲོ་དགའི་མགོ་རྣ་གཡུག་བཞིན་རྫ་འདབས་ཉུལ།།
འཇམ་པའི་ཆར་ཞོད་དྭངས་མ་ཡུལ་དུ་འཇོ།།
བདག་མེད་སྡོང་ལོ་རྙིང་རུལ་ས་རུ་ཟགས།།
མཛེས་པའི་ལོ་མ་གསར་སྐྱེས་ལང་ཚོ་རྒྱས།།
དཔྱིད་འགོ་ཡིད་འོང་སྐྱེད་ཚལ་རང་ཤ་བརྟས།།
ལྷུང་ལྷུང་རྫ་ཆབ་དྭངས་མ་དལ་བུར་བཞུར།།
འདབ་ཆགས་སྐད་སྙན་རྫ་རི་ཀློང་ནས་འདོན།།
དཔྱིད་དུས་སྐྱེས་དངོས་སྣ་ཚོགས་འགོ་རྩེ་འབུས།།
ཁོ་ར་ཁོར་ཡུག་མཛེས་པ་དཔྱིད་ཀའི་དུས།།
དཔྱིད་དཔལ་གསར་དུས་མཛེས་སྡུག་མངོན་བཞིན་ན།།
རང་སེམས་ཚོར་བས་ཟིན་པའི་སྣང་ཚོར་གྱིས།།
ཀ་ཁའི་དབྱངས་ལ་བརྗོད་དོན་རབ་བསྐྱོན་ནས།།
དཔྱིད་དུས་འདྲ་མིན་ལྟད་མོ་ལན་གཅིག་སྦྱོར།།
༼ སྙན་རྐང་གླིང་། ༽