རབ་གསལ་ནང་ནས་འཕྱོ་བའི།།
ཐོ་རངས་སྙན་ངག་སྤར་གང་།།
རང་ཁྱིམ་ནང་ལ་འདེབས་འོངས།།
དཔྱིད་རླུང་བྱོན་ལུགས་ལེགས་སོ།།
མ་འགྱང་སང་གི་མགྲོན་པོ།།
རླུང་གི་སྣེ་མོར་བྱོན་ཏེ།།
ང་ཡི་ཁྱིམ་དུ་བཞུགས་འགྲོ།།
འདི་ཡང་དཔྱིད་རླུང་འདྲ་བྱུང་།།
བྲིས་པའི་ཚིག་ལ་རྒྱུས་ཆེ།།
བལྟས་པའི་མིག་ལ་ཆ་ཡོད།།
མྱོང་བའི་ལུས་ལ་བདེ་མོ།།
སྙན་ངག་འདྲ་བའི་དཔྱིད་རླུང་།།
དུས་ཀྱི་དབང་གིས་མ་མཇལ།།
ད་རེས་འཁྱུག་ཙམ་འཁྱུག་ཙམ།།
ང་དང་གདོང་གཏུག་བརྒྱབ་བཞག།
འདི་ཡང་དཔྱིད་རླུང་ཁྱོད་རེད།།
བསམས་ཤིང་བསམ་པའི་གླུ་ཆུང་།།
ངག་གི་སྣོད་དུ་མ་ཤོང་།།
སེམས་ཀྱི་ཚོར་བ་སྲབ་མོ།།
དཔྱིད་རླུང་ཁྱོད་ཀྱིས་བསྒུལ་སོང་།།
སྙན་ངག་ཟེར་ན་འདི་རེད།།
དགའ་སྐྱོ་ཟེར་ན་དེ་ལགས།།
ཚོར་བ་འགྱུ་བའི་ཐབས་གྲོགས།།
དཔྱིད་རླུང་འདི་ཀ་ཡིན་སོང་།།
༼ ཆོས་འབྱོར་རྒྱ་མཚོ། ༽