ཀ་བ་བཞིན་དུ་སྐུ་ཚེ་རྟག་བརྟན་ནས།།
ག་དུས་ཡིན་ཡང་ནད་མེད་བདེ་ཐང་ངང་།།
ཁ་འཇམ་ཚིག་གིས་སྲི་ཞུ་ལེགས་སྒྲུབ་པར།།
ང་ཡི་ཨ་མ་དུས་གསུམ་བདག་མོ་ཡིན།།
ཅ་ཅོ་འདྲ་མིན་ནམ་ཡང་མི་བཤད་ཅིང་།།
ཆ་མེད་རྒྱུས་མེད་གནས་ལ་མི་གཡེང་པར།།
ཇ་ཆང་ལ་སོགས་ཁྱིམ་ལ་ལེགས་སྐྱེས་ཕུལ།།
ཉ་བེ་ཉོ་བེའི་ལས་དོན་སྒྲུབ་ཏུ་མེད།།
ཏ་ཐཱ་ག་ཏའི་ཐོས་བསམ་མང་དུ་བསག།
ཐ་གེ་ཙམ་ལ་ཆོས་སྒྲུབ་ལེགས་པར་འབད།།
ད་དུང་མ་ཎི་སྐད་དབྱངས་སྙན་མོ་སོགས།།
ན་ཆུང་དགའ་བའི་ཆོས་སྒྲ་མང་དུ་འདོན།།
པ་ཊུའི་ལེགས་བཤད་སྣ་མང་སེམས་སུ་འཆང་།།
ཕ་ཆོས་ཡང་དག་དགེ་བའི་ལས་དོན་གཉེར།།
བ་དཀར་བཞིན་དུ་ཆོས་ལ་བློ་དཀར་ནས།།
མ་དག་སྡིག་པའི་བྱ་བ་ཐལ་རྡུལ་བརླག།
ཙ་རི་བསྐོར་བའི་ཁོམ་སྐབས་དབེན་ན་ཡང་།།
ཚ་གདུག་ཀློང་ནས་རང་ཅག་དགོན་སྡེ་ལ།།
ཛ་དྲག་མ་ཡིན་བསྐོར་བ་འགྲིམ་བཞིན་དུ།།
ཝ་མོ་ལྟར་དུ་གཉོམ་པའི་ཆོས་ལ་རོལ།།
ཞ་སྨྱུག་ཡི་གེ་འབྲི་བར་མ་ཤེས་ཀྱང་།།
ཟ་གྲོགས་མཉམ་དུ་མ་ཎི་འདོན་ཆོས་སོགས།།
འ་འུ་བྲལ་ནས་གང་མང་འདོན་ཤེས་ཤིང་།།
ཡ་རབས་སྤྱོད་པའི་ལས་ལ་རྟག་པར་བརྩོན།།
ར་བ་གངས་རིས་མི་འཁྱུད་མ་བསྐོར་ཞིང་།།
ལ་ལུང་ཟད་མེད་འགྲིམ་མྱོང་མེད་ན་ཡང་།།
ཤ་རུས་ཁྲག་རྒྱུན་མ་བོར་ཆོས་སེམས་ཀྱིས།།
ས་ཕྱོགས་གང་གི་ཆོས་ལ་དད་བཞིན་ཡོད།།
ཧ་ཅང་ཅུང་ཟད་ལམ་ལ་མ་བསྟོད་ཀྱང་།།
ཨ་མའི་ཁྱོད་ལ་བྲིས་པའི་ཀ་རྩོམ་འདི།།
ཧ་གོ་ཅན་ཚོས་ཞིབ་བཀླག་བྱས་ནས་ཉོན།།
ཨ་གསར་མ་ཡིན་ཨ་མའི་བཀའ་དྲིན་འཇོལ།།
༼ སྙན་རྐང་གླིང་། ༽