འཛུམ་གྱི་མེ་ཏོག་ནམ་མཁའི་མཐོངས་སུ་བཀྲ།།
ངས་ནི་དགའ་བའི་དད་སེམས་མཆི་མར་འདྲེས།།
ཚེ་རབས་གཏན་གྱི་སྨོན་ལམ་འདི་གར་བཏབ།།
ཁྱོད་ཐུགས་བརྩེ་བའི་སྤྱན་ཟུང་སྙིང་ལ་བརྩེ།།
ཡངས་པའི་རྩྭ་ཐང་འཁྲིས་ཀྱི་མཛའ་བརྩེ་དེ།།
ངས་ནི་ལོ་དང་ཟླ་བར་བརྩེ་བས་སྲུང་།།
སེམས་ཀྱི་དམར་ས་སྙིང་གི་ཟབ་ས་རུ།།
བརྩེ་བའི་ཕྱི་མིག་ཡང་སྐོར་བསྐྱར་སྐོར་བྱས།།
དགོང་ཁའི་མཚམས་སྤྲིན་རེ་རེའི་རྫོགས་མཚམས་སུ།།
གཡོ་ཟོལ་མེད་པའི་མཛའ་བརྩེའི་རྨུ་ཐག་བསྲིངས།།
ལྷད་མེད་སེམས་པ་ཕྲ་མོའི་ལྡེབས་རིས་སུ།།
བདེ་སྡུག་རྟོག་འགྱུ་ཁྲ་མོའི་ཚོན་ཁ་བསྡེབས།།
ངས་ནི་ནམ་མཁའི་བཅོ་ལྔའི་ཟླ་བ་དང་།།
དབྱར་གསུམ་རྩྭ་ཐང་པང་གི་མེ་ཏོག་ཀྱང་།།
ཁྱེད་ཉིད་འཁྲུལ་བས་རྟོག་འགྱུའི་ལན་པ་ཡིས།།
བརྩེ་བའི་མིག་ཆུ་ཁ་ཤས་གདོང་ནས་འཕྱང་།།
གླིང་དཀར་སྟོད་ཀྱི་སེང་ལྕམ་འབྲུག་མོ་དང་།།
སུན་རྩེན་ཡུལ་གྱི་བུ་མོ་ལྕམ་སྲིང་བདུན།།
མཆོངས་རྒྱས་ཟླ་བ་སྒྲོལ་མའི་ལང་ཚོ་ཡང་།།
ཁྱོད་ཀྱི་མཛེས་སྡུག་གཞལ་དུ་མ་བཏུབ་སྙམ།།
ངས་ནི་རྟོག་བཏགས་ཡིད་ཀྱིས་ཡང་ཡང་དཔྱད།།
དད་སེམས་ཡིག་ཆུང་འབྲུ་མ་འབུམ་ཐེར་བསགས།།
ཉི་ཟླ་རིས་སུ་འཁོར་བའི་འགྲུལ་བཞུད་ཁྲོད།།
སྦས་པའི་དད་སེམས་ཤིག་གིས་ར་རོ་བསྒྱུར།།
མཛེས་སྡུག་ཡལ་འདབ་འཁྲུངས་བའི་མེ་ཏོག་ཅིག།
ཡངས་པའི་རྩྭ་ཐང་འཁྲིས་སུ་མ་བཞད་པར།།
མི་སེམས་ལྡུམ་རའི་ཚལ་ན་འཛུམ་གྱིས་འཚོ།།
དེ་ཡང་ཡིད་གཅུགས་ཟབ་པའི་རྣམ་པ་ངོམ།།
ལོ་རྒན་དྲུག་ཅུའི་ནས་ཆང་ཁམ་པ་དེ།།
བཟི་ཁའི་རོ་མཆོག་དེ་ཙམ་མི་འདུག་སྟེ།།
ཡིད་མཁའི་ངོས་ཀྱི་ཁྱེད་ཀྱི་ཞལ་རས་ལ།།
ཐ་ན་རྨི་ལམ་བཟི་བའི་རྐྱེན་དུ་འགྱུར།།
བྲིས་ན་མི་རྫོགས་བཤད་པའི་སྨྲ་ལྕེ་ཟད།།
ལྷད་མེད་བལ་དཀར་འདྲ་བའི་གཤིས་ཀ་དེ།།
རྗེ་བཙུན་སྒྲོལ་མའི་བྱིན་རླབས་ཡིན་ནམ་ཅི།།
ཐོག་མེད་གོམས་པའི་རང་བཞིན་ཨེ་ཡིན་སྙམ།།
གསེར་ལྡན་མེ་ཏོག་མཛའ་བརྩེའི་དོད་དུ་བྲིས།།
ནམ་མཁའི་སྐར་མ་ས་ཡི་རྩི་ཐོག་ཀྱང་།།
ང་ཉིད་ཁྱེད་ལ་བརྩེ་བའི་གཏའ་མར་བཞག།
ཡིད་ཆུང་མཆི་མ་བཀུ་བའི་སྒྲུང་གཏམ་བཤད།།
གྲུ་འཛིན་རི་བོའི་གཟི་དཔལ་ལྷིང་ངེར་འགྱིང་།།
ཡར་ཀླུང་གཙང་ཆུ་སྔོན་མོ་ལྷུང་ལྷུང་འབབ།།
འདི་གར་ཧ་ནེས་དྲན་པའི་བློས་བསླངས་མང་།།
མཁས་གྲུབ་ཕྱི་མིག་ཤོར་སའི་རྗེས་ཤུལ་ཟབ།།
མཛའ་བརྩེ་ཕབ་ཀྱིས་བསྙལ་བའི་བདག་གི་ཡིད།།
རྗེས་ཤུལ་མེད་པར་ཁྱེད་ཀྱི་གམ་ལ་ལོག།
ལས་འཕྲོ་སོ་སོར་ཡིན་པའི་ངང་ཆུང་གཉིས།།
འདི་གར་ལྷན་འཛོམས་མེད་པ་སུ་ཡིས་བསྐོས།།
དད་པའི་མེ་ཏོག་དྲན་པའི་ཐོང་གར་བཞད།།
མཇལ་འཛོམས་ལས་འཕྲོ་ལས་ཀྱིས་སོ་སོར་བསྐོས།།
འཁྲུལ་རྟོག་སྒྱུ་མའི་སྣང་བ་མ་ཟད་བར།།
ཁྱོད་ཉིད་བརྩེ་བའི་གཏམ་རྒྱུད་སྙིང་རེ་ཉེ།།
༼ ཚུལ་མཁས། ༽