ཉི་ཤར་དང་ས་སྲོད་ཀྱི་མཚམས་ནས།
ངས་སྙན་ངག་གི་བསྡུས་གཟུགས་ལ་བྱིལ་བྱིལ་བཏང་སྟེ།
གསར་དུ་ཤར་བའི་དཔྱིད་དཔལ་ལ་ནང་སེམས་ཡང་ཡང་་གླན།
དུས་ཚིགས་འདི་ནི།
ཨ་མའི་བྱམས་བརྩེ་དང་འདྲ་ལ་ཨ་ཕའི་སྟོབས་ཤུགས་དང་འདྲ་བས།
ཁོ་མོའི་འཇིག་རྟེན་ལ་མཛེས་སྡུག་གི་རྣམ་པ་མང་པོ་བསྐྲུན་ཡོང་།
སྐབས་འདིར་མི་རྣམས་ཀྱིས།
འདས་ཟིན་པའི་ཕམ་ཉེས་མཐའ་དག་སེམས་སུ་བསྐུངས་ནས།
སླར་ཡང་རྒྱལ་ཁ་དང་ལེགས་འགྲུབ་ལ་སྟ་གོན་བྱེད་ཀྱིན་འདུག།
དཔྱིད་ཀ་ནི།
སུ་ཞིག་གི་དགའ་སྐྱོའི་ཚོར་འདུ་ལྟར།
ཆར་པ་ཟིམ་ཟིམ་དང་། སྨུག་པ་ལང་ལོང་གི་ཁྲོད་ནས།
དུས་ཚོད་ཀྱི་བརྩེ་བས་བསྐྱངས་ཤིང་།
ལས་དབང་གིས་མགོན་སྐྱབས་གནང་བའི།
སྙིང་ཉེ་བའི་རྩྭ་ཕྲན་དག་གིས་ཀྱང་།
རང་རང་གི་འཚར་ལོངས་ལ་སེམས་ཁུར་གནང་སྟེ།
ཉི་འོད་ཀྱི་དྲོད་ལ་རེ་ཞིང་བསིལ་རླུང་གི་བཅུད་ལ་རོལ་གྱིན་འདུག
ངས་ཀྱང་ཕྱི་དྲོ་དེར།
ཚིག་ཇ་ཤེལ་ཕོར་གང་ལ།
སྙན་ངག་ཤོག་ལྷེ་གང་གི་འདུ་ཤེས་བཞག་སྟེ།
འཆར་ཡན་དང་སྒྱུ་འཕྲུལ་གྱི་ལྷ་ཚོགས་ལ།
སྙིང་གཏམ་གྱི་བསུ་མ་བྱས་ཏེ་དད་མོས་ཀྱི་མཆོད་པ་ཕུལ་ཡོད།
༼ འོད་འཛིན་མ། ༽