ཞིན་ཧྭ་གསར་འགྱུར་ཁང་པེ་ཅིང་ནས་སྤྱི་ཟླ5པའི་ཚེས15ཉིན་གློག་འཕྲིན་འབྱོར་གསལ། སྤྱི་ཟླ5པའི་ཚེས16ཉིན་དཔེ་སྐྲུན་བྱས་པའི་བདེན་འཚོལ་དུས་དེབ་འདོན་ཐེངས་བཅུ་པའི་ཐོག། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གི་རྩོམ་ཡིག་གལ་ཆེན《དངོས་ཚན་དཔལ་འབྱོར་རྒྱ་སྟོབས་ཆེ་རུ་དང་ལེགས་སུ་གཏང་དགོས》ཞེས་པ་བཀོད་ཡོད་པ་རེད། དེ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི2016ལོའི་ཟླ12པ་ནས2025ལོའི་ཟླ་བ12པའི་བར་གྱི་འབྲེལ་ཡོད་རྣམ་བཤད་གལ་ཆེན་གྱི་གནད་བསྡུས་ཤིག་རེད།

རྩོམ་ཡིག་ནང་ནན་གྱིས་བསྟན་དོན། དངོས་ཚན་དཔལ་འབྱོར་ནི་རྒྱལ་ཁབ་ཅིག་གི་དཔལ་འབྱོར་རང་ཚུགས་ཀྱི་གཞི་རྩ་དང་། རྒྱུ་ནོར་སྐྲུན་པའི་རྩ་བའི་འབྱུང་ཁུངས། རྒྱལ་ཁབ་སྟོབས་འབྱོར་མངའ་ཐང་རྒྱས་པའི་ཀ་རྟེན་གལ་ཆེན་བཅས་ཡིན། དཔལ་འབྱོར་འཕེལ་རྒྱས་དུས་གང་ཞིག་ཏུ་སླེབས་ཀྱང་དངོས་ཚན་དཔལ་འབྱོར་ནི་རང་རྒྱལ་གྱི་དཔལ་འབྱོར་འཕེལ་རྒྱས་དང་། རྒྱལ་སྤྱིའི་དཔལ་འབྱོར་འགྲན་རྩོད་ཁྲོད་ང་ཚོར་རང་འགུལ་ཐོབ་པའི་རྨང་གཞི་ཡིན། རང་རྒྱལ་གྱི་དཔལ་འབྱོར་ནི་དངོས་ཚན་དཔལ་འབྱོར་ལ་བརྟེན་ནས་བྱུང་བ་ཡིན་ལ། དངོས་ཚན་དཔལ་འབྱོར་ལ་བརྟེན་ནས་འབྱུང་འགྱུར་ཕྱོགས་སུ་སྐྱོད་པ་ཞིག་ཀྱང་ཡིན། དཔལ་འབྱོར་འཕེལ་རྒྱས་གཏོང་བའི་ཤུགས་རྒྱག་ས་དེ་དངོས་ཚན་དཔལ་འབྱོར་ཐོག་གཞག་རྒྱུ་མཐའ་འཁྱོངས་ཀྱིས་ཐོན་ཁུངས་ཀྱི་རྒྱུ་རྐྱེན་གཙོ་བོ་དངོས་ཚན་དཔལ་འབྱོར་ཕྱོགས་སུ་གཅིག་སྡུད་བྱེད་པ་དང་། སྲིད་ཇུས་དང་བྱེད་ཐབས་དངོས་ཚན་དཔལ་འབྱོར་ལ་ཕྱོགས་པ། ལས་ཀའི་སྟོབས་ཤུགས་དངོས་ཚན་དཔལ་འབྱོར་ལ་འདོན་པ་བཅས་ལ་སྐུལ་འདེད་བཏང་ནས། བཟོ་ལས་ཅན་གསར་པར་སྐུལ་འདེད་ཏན་ཏིག་བཏང་སྟེ་དངོས་ཚན་དཔལ་འབྱོར་རྒྱུན་ཆད་མེད་པར་རྒྱ་སྟོབས་ཆེ་རུ་དང་ལེགས་སུ་གཏང་དགོས།（ པར་ངོས་གཉིས་པར་གཟིགས།）