སྤྲིན་དཀར་ལང་ལོང་གཡོ་བའི་ཐུ་འོག་ནས།།

བྱ་ཁྱུ་བསྟར་ལ་རྒྱུས་ཏེ་གཤོག་འགྱུར་ངོམས།།

སྨྲེང་གཞས་མཉམ་དུ་བསྡོངས་ནས་རྒྱང་ལ་ཆས།།

རང་སེམས་སྐྱོ་བའི་མལ་ན་འགྲེ་ལོག་བརྒྱབ།།

རི་བོ་གངས་དཀར་རྩེ་ནས་འཛུམ་པའི་འོད།།

མཚན་གུང་བདག་གི་ངོས་སུ་འཕྲོས་པ་ཡིས།།

གཉོམ་གཤིས་ཅི་ཡང་དུབ་པའི་ནང་ཤེད་ནས།།

སེམས་པའི་ཚོར་འདུའི་སྨུག་ཞག་རབ་ཏུ་སྟུག།

བཅོ་ལྔའི་ཟླ་གཟུགས་གྲོང་སྡེ་ཁྱོན་ན་གསལ།།

ཤིག་ཤིག་མི་ཚོགས་འདུས་པའི་གསང་མདོ་ནས།།

སྨྲེང་བའི་ངལ་བ་འཁུར་བའི་འཁྱམ་པོ་ངའི།།

སྐྱོ་བའི་སེམས་པར་སྡུག་གི་མཚོ་ཆེན་བསྐྱོམ།།

ཟླ་འོད་གུར་ཁྱིམ་གཙང་འགྲམ་མཁའ་རུ་ཕུབ།།

དལ་བབས་ལྷུང་ལྷུང་ཐོས་འཛིན་གྲོགས་སུ་འཇོ།།

མུ་མེད་རྩྭ་ཐངམཛེས་པ་མཐོང་ན་ཡང་།།

ངའི་སེམས་སྐྱོ་བའི་རྨི་ལམ་ལན་གཅིག་འགྲིམ།།

ཁེར་རྐྱང་གདུང་བའི་གླིང་བུ་སྙན་པ་འབུད།།

ཟླ་གཟུགས་སྒེའུ་ཁུང་འགྲམ་དུ་རབ་འཚེར་ཏེ།།

བསམ་གཞིག་དྲན་པ་གཡོ་བའི་མཚན་གུང་དུ།།

སྣང་བས་རི་ཁྲོད་བསྔོགས་པར་བློ་མ་བདེ།།

མུ་མེད་ལྷིང་འཇགས་གྲོང་གི་མཚན་གཞུང་དུ།།

རྒྱུ་སྐར་མཛེས་པ་ངའི་འགྲམ་འཕོག་དང་ལྷན།།

སྨྲེང་བ་ནང་ཁོག་བཅིངས་པའི་སྒྲོམ་ཐག་དམ།།

འཁུན་སྒྲས་གྲོང་སྡེ་དཀྲོགས་ལ་རང་སེམས་དོགས།།

དཔྱིད་ཀའི་གནམ་ངོ་འགྱུར་བའི་སྐད་ཅིག་གློག།

ནམ་མཁའི་སྤྲིན་ནག་ཁྱུ་ཡིས་ཟླ་བ་བསྒྲིབས།།

རང་སེམས་སྣང་བ་མུག་པའི་བཅོ་ལྔའི་དགོང་།།

བདག་གི་སྐྱོ་བས་རི་ཚོགས་གཡོ་པར་སོམས།།

ལྷོ་མཐའི་སྤྲིན་པའི་ཟུར་ནས་ཟླ་བ་འཛུམ།།

ལས་ཀའི་དོན་གྱིས་ངའི་སེམས་སྨྲེང་བས་གཟེར།།

གདུང་བའི་ཆུ་མིག་འཛད་མེད་སེམས་སུ་བརྡོལ།།

སྙན་ངག་བྲིས་ནས་སེལ་བའི་ལམ་ཞིག་བཙལ།།

བཅོ་ལྔའི་ཟླ་བར་བལྟས་ནས་ཡུན་གྱིས་འགོར།།

བྲང་ཁོག་གཟེར་བས་མནར་ནས་སྨྲེང་ངག་ཤོར།།

ཆང་དམ་ཞིམ་ཞིག་སྙིམ་པས་ཡར་བཏེགས་ནས།།

གདུང་བ་སངས་པའི་ཆང་ཞིག་རྔུབ་ན་འདོད།།

བཅོ་ལྔའི་ཟླ་བ་རང་གཟུགས་གསལ་ན་ཡང་།།

དཀྱིལ་གྱི་ཟླ་བ་ལྷ་མོའི་བཞིན་རས་ལས།།

ཟླ་བ་སྐྱོ་བའི་སེམས་ཚོར་མཐོང་བ་ཡིས།།

ང་ཡང་ལྷག་པར་སྐྱོ་བའི་ངལ་ཞིག་བྱུང་།།

༼ སྙན་རྐང་གླིང་། ༽