རླུང་བུ་ལྡང་བས་མ་ཚད།།

ཆར་པ་ཟམ་ཟིམ་བབས་སོང་།།

ལམ་འགྲམ་ཞིག་ནས་ཐུག་པའི།།

སྨན་ཆུང་སྨིན་མ་ཡག་སོང་།།

ཞལ་ལ་འཛུམ་ཆུང་མཛའ་མོ།།

ལང་ཚོའི་མེ་ཏོག་མཛེས་མོ།།

མིག་གིས་མཐོང་ཙམ་བྱུང་བས།།

སེམས་པ་ཁྱེར་ནས་བྲོས་སོང་།།

ལུས་དྲི་ཞིམ་པའི་བུ་མོ།།

ལུས་ཕྲའི་ཉམས་འགྱུར་རིག་ན།།

ཨ་མཚར་རྩེ་འདོད་ཡོད་ཀྱང་།།

སྐད་ཆ་ངག་ནས་མ་འཁྲོལ།།

ཟུར་མིག་སྙིང་ལ་བབས་སོང་།།

སྙིང་ཆུང་མེ་ཏོག་དམར་པོ།།

འཛུམ་ཆུང་ཡིད་ལ་དྲན་ན།།

དྲན་གདུང་ཞིག་གིས་བཟི་འགྲོ།།

རི་ཁའི་སྨུག་པ་ལང་ལོང་།།

སྦྲང་ཆར་ཟིལ་མ་ཟམ་ཟིམ།།

སྐྲ་ལོ་ནག་པོ་ཤིག་ཤིག །

སེམས་ལ་སོང་བའི་བུ་མོ།།

ཉམ་ཆུང་གོམ་འགྲོས་ཞིབ་ཞིབ།།

ལང་ཚོའི་གར་སྟབས་ལྡེམ་ལྡེམ།།

བརྩེ་བའི་འཛུམ་ཆུང་དམུལ་དམུལ།།

གཤིས་བཟང་ཡིད་འཕྲོག་ལྷ་མོ།།

ཞལ་རས་དུང་ཟླ་དཀར་དཀར།།

མཁུར་བ་གཉིས་ནི་དམར་དམར།།

སོ་ཕྲེང་འོད་མདངས་ལམ་ལམ།།

ཁྲ་ཆུང་མིག་གི་རྒྱན་ཡིན།།

མ་བྲིས་སྨིན་མ་གོར་གོར།།

བཏགས་པའི་རྣ་རྒྱན་ཀྲིག་ཀྲིག །

མ་བཅོས་བཞིན་རས་གསལ་གསལ།།

བཅོས་པའི་གོས་རྒྱན་ཆེམ་ཆེམ།།

བྲང་གི་མྱོས་བུམ་འབུར་འབུར།།

ལུས་ཀྱི་དྲི་བསུང་འཐུལ་འཐུལ།།

སྐྱེ་གཟུགས་མདངས་བྱའི་རི་མོ།།

ཉམས་འགྱུར་ཡིད་ལ་ཡོང་བའི།།

གཞོན་ནུའི་ལང་ཚོ་ངོམ་སོང་།།

དར་མའི་གཤིས་ཀ་མཐོང་སོང་།།

ན་ཆུང་འདོད་ཉམས་ཅན་དེས།།

སྙིང་ལ་རྨ་ཁ་བཟོས་སོང་།།

ང་ལ་བལྟས་ནས་བགད་བྱུང་།།

སེམས་ནས་འཚུབ་ཆ་ལངས་སོང་།།

དངངས་སྐྲག་ཅིག་དང་ལྷན་དུ།།

ལུས་པོ་འདར་སིག་བརྒྱབ་བྱུང་།།

ཚུར་འཁོར་འཛུམ་གྱིས་བསུས་ཤིང་།།

དད་མོས་འདྲ་ཞིག་བྱེད་དུས།།

སྙིང་གི་འཕར་ལྡིང་ཡོམ་ཡོམ།།

མི་སྨྲ་བརྟུལ་ཞུགས་བཟུང་ནས།།

ཚུལ་འཆོས་རྫིག་པོ་ཞིག་གིས།།

ཡིན་མདོག་ཆེན་པོ་ངོམ་བཞག །

ཨ་རོགས་སྨན་ཆུང་ཡག་མོ།།

ཡང་ཡང་སྤྱན་གྱིས་མ་གཟིགས།།

ཚངས་མགུར་ཡིད་ལ་དྲན་ཡོང་།།

བརྩེ་མགུར་ཞེ་ལ་ཐོགས་ནས།།

མིང་དང་ཚིག་གིས་བསྙད་པའི།།

དབྱངས་ཀྱི་ཕོ་བྲང་བཞེང་འགྲོ།།

འཁོར་བས་བསླུས་པའི་མི་རེད།།

དགའ་སྐྱོ་གཉིས་ཀྱིས་གྲུབ་པའི།།

ཕལ་བའི་གཤིས་ཀ་འདི་ལ།།

བག་ཆགས་སད་སྟོབས་ཤིག་གིས།།

ཚོར་བྲིས་སེམས་ནས་བཞུར་ན།།

ཁྲེལ་དགོད་ཞེ་དགོད་མ་གནང་།།

བརྟག་དཔྱད་མང་ཙམ་མ་བྱེད།།

ཡིག་ཉོག་འབྲི་བ་ཙམ་ཡིན།།

༼ རྫ་ཤུལ་བློ་བཟང་། ༽