རི་རྩེ་ནས་ཐོ་རེངས་སྐར་ཆེན་གྱིས།
རྨི་ལམ་གྱི་སྒོ་ཆེན་བརྡུངས་ནས་དལ་གྱིས་བྱོན།
ཁྱོད་ཀྱིས་སྦྲ་རོག་རོག་གི་དབུས་ཀྱི་
ཐབ་ཚང་དུ་མེ་ཁ་བསྲོས།
འབྲོག་ཐང་དུ་དུད་སྤྲིན་གྱི་མཆོད་པ་བྱས།
མཚམས་སྤྲིན་དམར་ལང་ངེར་གྱི་འོག་ན།
ངུར་སྒྲ་གསལ་ལྷང་ལྷང་གི་ལྷས་ནས།
ཐ་ག་པའི་གོམ་ཆུང་བཞིན་མྱུར་སྟབས་ཀྱིས།
འབྲི་མོ་འཇོ་ཞིང་བེའུ་ཆུང་རྡང་དུ་བཏགས་ནས།
བཞོ་དབྱངས་ཀྱི་འགྱུར་ཁུག་སྙན་མོ།
སྦྲ་ནག་གི་འདབས་སུ་བཀུགས།
ནོར་ཁྱུའི་རྨིག་རྗེས་འཚོལ་བཞིན།
རི་ཆེ་མ་ཆུང་གསུམ་གོམ་གྱིས་གཞལ།
འཕར་སྤྱང་གི་འཇབ་རྒོད་དྲན་བཞིན།
རི་ཁུད་དང་རི་སྒང་ནས་སོ་སྲུང་བྱེད།
འཆར་ཀའི་ཉིན་བྱེད་དང་ལྷན་དུ་རི་ལ་ཆས་ཤིང་།
ནུབ་ཁའི་ཉི་ཟེར་དང་འགྲོགས་ནས་ཡུལ་དུ་ལོག།
ཉིན་མོའི་ཉི་ཟེར་དང་མཚན་མོའི་ཟླ་འོད་དང་ལྷན།
ལོ་ཟླའི་ཕྲེང་བ་རིམ་གྱིས་ཟད།
བཟླས་སྐྱོན་ལྟ་བུར་སོང་བའི་ལོ་དང་ཟླ་བ།
ཁྱོད་ཀྱི་མི་ཚེ་འདིའིབརྒྱུད་རིམ་ཡིན་ངེས།
༼ སྨྱུག་ཞེན། ༽