ལྕགས་ཟམ་ཁའི་མིང་འདིའི་འབྱུང་ཁུངས་སྐོར་ལ། ཉན་ཤུལ་འཇམ་དབྱངས་གྲགས་པས་སྲིད་གཞུང་ནི་ལྕགས་ཟམ་ཁར་བློ་བདེའི་ཐང་དུ་ཡོད། ལྕགས་ཟམ་འདི་གྲུབ་ཐོབ་ཐང་སྟོང་རྒྱལ་པོས་བཞེངས་པར་གྲགས། སྔར་རྒྱལ་རོང་རྒྱལ་ཁག་བཅོ་བརྒྱད་ཀྱི་ཡ་གྱལ་མགོ་མེད་དམ་ཀ་ལ་ཟེར་བའི་མིང་ཡིན། ཨར་ལ་ཞེས་གྲགས་ཆེ། ཨར་ལ་ནི་གནའ་སྔ་མོ་ཨར་ཇག་རྒོད་ཕྱིར་ཨར་ལ་ཞེས་དང་། ད་ལྟའི་སྲིད་གཞུང་ཡོད་ས་དེར་ཚོང་པ་རྣམས་སླེབས་དུས་བློ་བདེ་བས་བློ་བདེ་ཞེས་གྲགས་པར་རྒན་པོ་དག་གི་ངག་ལས་ཐོས་སོ་ཞེས་བཀོད་འདུག།

ལྕགས་ཟམ་རྫོང་ནི་དཀར་མཛེས་བོད་རིགས་རང་སྐྱོང་ཁུལ་གྱི་ཤར་ལྷོ་རྒྱུད། ཆང་ལས་རི་རྒྱུད་དང་གངས་རི་ཆེན་པོའི་རི་རྒྱུད་བར་དུ་ཆགས་ཡོད་ཅིང་། ཤར་དུ་གཡག་རྔ་ས་ཁུལ་གྱི་སྲིབ་སྨད་རྫོང་དང་ཤར་ལྷོའི་མཚམས་སུ་གཡག་རྔ་ས་ཁུལ་གྱི་འགག་སྨད་རྫོང་དང་ས་མཚམས་སྦྲེལ་ཡོད།ནུབ་བྱང་མཚམས་སུ་དར་མདོ་གྲོང་ཁྱེར་དང་རོང་བྲག་རྫོང་དང་ས་མཚམས་སྦྲེལ་ནས་ཡོད་པ་རེད། སྤྱིའི་རྒྱ་ཁྱོན་སྤྱི་ལེ་གྲུ་བཞི་མ2165.35ཡོད་ཅིང་། མངའ་ཁོངས་སུ་གྲོང་རྡལ8དང་ཡུལ་ཤོག1།སྲིད་འཛིན་གྲོང་སྡེ90ཡི་ནང་དུ་ཁྱིམ་གཞིས་ཆགས་ནས་ཡོད་པའི་རྒྱ་རིགས་དང་བོད་རིགས། དབྱིས་རིགས། ཧུའེ་རིགས། ཆའང་རིགས། སོག་པོ། འཇང་རིགས་བཅས་མི་རིགས14ཡི་མི་གྲངས་བསྡོམས་འབོར86066 (2024ལོའི་ལྕགས་ཟམ་རྫོང་མི་དམངས་སྲིད་གཞུང་གིས་སྤྱི་འགྲེམ་བྱས་པའི་དན་གྲངས་ལྟར། )ཡོད་པ་རེད།།

（ སྐལ་བཟང་རྒྱ་མཚོས་བསྡུས་ཤིང་པར་བླངས།）