ལམ་ལ་ཆས་དུས། ཁོ་མོའི་མིག་ཟུང་ལས་
རླུང་བུ་ལྡང་གིན་འདུག།
དཔྱིད་རླུང་བསིལ་བསིལ་ཁྲོད།
ང་རང་གཞི་ནས་ཕ་ཡུལ་ལ་སླེབས་བྱུང་།
ཕ་ཡུལ་ནས། ང་རང་སྙིང་ཉེ་བའི་ཡུལ་མི་མང་པོ་ཞིག་
དང་མཇལ་བྱུང་།
ཕ་ཡུལ་ནས། གོམས་འདྲིས་སུ་སོང་བའི་ལམ་ཕྲན་
དང་གཙང་པོ་དག་མཇལ་བྱུང་།
ཕ་ཡུལ། ཉི་འོད་ལམ་ལམ་ཁྲོད་རྔམ་རྔམ་གྱིས་
འགྱིང་འདུག།
ཕ་ཡུལ། ཟླ་འོད་བསིལ་བསིལ་ཁྲོད་ཁུ་སིམ་མེར་
གཟིམ་འདུག།
ཡིན་ནའང་། ངས་ཕ་ཡུལ་ནས་ཁྱེད་ཕྱོགས་སུ་
འཕྲིན་པ་མང་དག་ཅིག་རླུང་ལ་བསྐུར།
སྒེའུ་ཁུང་ཕྱི་རོལ་གྱི་ལྕང་མའི་ལྗོན་པའང་ཉི་འོད་ཀྱི་
འོག་ཏུ་འགྲེང་འདུག།
ཉི་མའི་འོད་ཟེར་ཡལ་གའི་མཛུབ་བར་ནས་
ཡུན་རིང་ལ་འབར་རྗེས།
ལོ་མ་དང་ལྕུག་ཕྲན། ལྗང་མདོག་གིས་གསོན་ཞིང་
ཚེ་སྲོག་གི་ཐོག་མ་འབུ་འགོ་བརྩམས།
ཕ་ཡུལ། སྡོང་འགོ་ན་གོར་གོར་དུ་བཅས་པའི་
བྱེའུ་ཚང་རྙིང་ཧྲིལ་ཞིག་དང་འདྲ་ཨང་།
ཕ་ཡུལ། སྡོང་རྩ་ན་དྲ་བ་དྲ་ཕྱེད་དུ་འཐེན་པའི་
སྡོམ་རྒྱ་ཞིག་རོ་ཞིག་དང་འདྲ་ཨང་།
ཕ་ཡུལ་ནས་ཁྱེད་དང་མཇལ་མི་སྲིད་པའི་
ཉིན་ཞག་དག།
སེམས་སུ་རླུང་བུ་ལྡང་ཐེངས་རེ་རེ་ཡིན།
དཔྱིད་ཀ་མང་པོ་ཞིག་འདས་རྗེས་སླར་ཡང་
དཔྱིད་ཀ་གཞན་ཞིག་ཚེས་དུས་ཤིག་ལ།
འུ་ཉིས་སླར་ཡང་ལྗོན་རྩ་དེ་རུ་མེ་ཏོག་ཆ་གཅིག་
ལྟ་བུར་བཞད་སྲིད་དམ།
ཡང་ན་དཔྱིད་ཀ་འདས་རྗེས་ཀྱི་སྟོན་དུས་ཤིག་ལ།
འུ་ཉིས་གསེར་མདོག་གི་ལོ་མ་ནང་བཞིན་བསིལ་རླུང་
གི་ཁྲོད་ནས་སྡོང་རྩ་དེ་རུ་འབབ་སྲིད་དམ།
ལམ་ལ་ཆས་དུས། དཔྱིད་རླུང་བསིལ་བསིལ་
ལྡང་གིན་འདུག།
ལམ་ལ་ཆས་དུས། དྲན་པ་ཁོ་ན་
ལྷོག་ལྷོག་འགུལ་གྱིན་འདུག།
ལམ་ལ་ཆས་དུས། ཁོ་མོའི་མིག་ཟུང་ལས་
རླུང་བུ་ལྡང་གིན་འདུག།
༼ གཡེར་མ། ༽