ཡིད་ལ་ལྡང་བའི་ཚིག་གི་དར་ཐག།
ཞེ་གཏིང་སྨིན་ནས་སྣང་བ་ཁྲིད་དེ།།
ལས་ཀྱི་ཟླ་བོས་ཉམས་འགྱུར་རེ་ལ།།
སྲིད་པའི་གཞུང་དུ་གློ་སྙིང་འཁྲེང་པ།།
ལོ་ཟླའི་སྨྲེང་བ་གང་ལ་ཐོགས་ཀྱང་།།
བསམ་པའི་རི་མོ་འབྲི་ཐབས་མ་བྱུང་།།
དལ་བ་དལ་གྱི་སྣང་བརྙན་དེ་དག།
མི་རྟག་ཀློང་ནས་མངོན་པའི་དུས་ནི།།
སྤྲོས་པའི་ཚུལ་དུ་ཡུན་རིང་མིན་ཡང་།།
བློ་ཡི་དབུས་སུ་ཆགས་པའི་ཉིན་མོ།།
ལས་ཀྱི་རླུང་བུས་བསིལ་གྲིབ་ཕོག་པ།།
མ་བཅོས་འཚོ་བ་སེམས་ལ་སྤྲོ་བས།།
ངག་རིག་ལམ་ནས་བརྗོད་དུ་མེད་དུས།།
སྒྱུ་འཕྲུལ་ཞིག་དང་འདྲ་མཚུངས་ཤིག་ལ།།
དོན་གྱི་རང་བཞིན་སོ་སོར་མངོན་ཡོད།།
སྣང་བ་ཚོགས་པའི་ཉིན་ཞག་གཉིས་སུ།།
ཚོར་བའི་རྨི་ལམ་རྨིས་ཐེངས་རེ་ལ།།
ཞེ་ལ་སྨིན་པའི་སྤྲོ་གར་རིང་མོ།།
ཇི་སྙེད་ཅིག་ལས་རིང་དུ་འདས་སོང་།།
སེམས་ཀྱི་གཞས་ཆུང་ངག་ཏུ་ཐོགས་ཏེ།།
བྲེལ་ཚུལ་བོར་བའི་འཆར་ཡན་དེ་ཡང་།།
ལང་ལོང་རྒྱུད་པའི་སྤྲིན་པ་ཇི་བཞིན།།
སྙན་པའི་ངག་དང་བར་ཐག་ཉེ་ནས།།
ཡིད་འོང་ཇི་སྙེད་རྟོག་བཏགས་བྲལ་བ།།
གློ་རྡེག་ངང་དུ་ཚོར་བའི་གཞུང་ལ།།
དྲན་དུ་མེད་ཀྱང་ཐོལ་གྱིས་མངོན་བྱུང་།།
༼ ཁམས་འོད་གསལ། ༽