བྱམས་པའི་མ་ལོའི་པང་དང་བྲལ་ནས་
གོམ་འགྲོས་ཁྱར་ཁྱོར་ལམ་བུར་གཞལ།།
མངར་བའི་ཐུར་སྦྲང་ཞིམ་བཅུད་རོལ་བཞིན་
ལྡབ་ལྡིབ་གཏམ་གྱིས་སྨྲ་སྒོ་ཕྱེ།།
དུང་སོ་མུ་ཏིག་ལང་ཚོ་སོ་མ་མཆུ་སྒྲོས་དབར་
ན་གྲལ་མཛེས་དུས།།
རེ་དོགས་འདམ་གྱིས་ཡིད་ནོར་མ་བསླད་ལོ་
བརྒྱད་སྣང་བ་འཇའ་ལས་མཛེས།།
རེ་བའི་ལང་ཚོ་སློབ་གླིང་བཞད་སོང་
བརྩེ་བའི་སློབ་གྲོགས་སེམས་སུ་འཁྲུངས།།
ཨ་ལི་ཀ་ལིའི་དབྱངས་གསལ་ཕྲེང་བས་
བློ་གསལ་མགུལ་བར་རྒྱན་སྤྲས་པས།།
གཞོན་པའི་ན་ཚོད་མཚར་སྡུག་འོད་ཀྱིས་གཟི་
བྱིན་ཉམས་སྣང་མཛེས་རྫོགས་སྐབས།།
ང་ཚོའི་སེམས་སུ་སྐད་དང་ཡི་གེར་དུང་ཞེན་
འཁྲི་ཤིང་ལང་ཚོ་བརྟས།།
མ་ཡུམ་སློབ་གྲྭའི་སྐྱེད་མོས་ཚལ་དུ་
སྔོན་བསགས་ལས་འབྲས་བཟང་པོའི་མཐུས།།
མ་འོངས་ཉི་གཞོན་བྱིས་པའི་ཁྱུ་གཅིག་
མ་བཅོས་འཛུམ་དཀར་རྒྱས་དང་ལྷན།།
ཚེ་གཅིག་སློབ་སྦྱོང་དབུ་ཁྱུད་བཏབ་པའི་
བགྲང་བྱ་མང་པོའི་སྔ་རོལ་ན།།
མཛའ་གཅུགས་རོལ་མོ་སེམས་སུ་
དཀྲོལ་བའི་རྨི་ལམ་རིང་མོའི་
གཏམ་རྒྱུད་ཡོད།།
ཡབ་ཡུམ་མིང་སྲིང་ཚེ་གཅིག་བདེ་སྡུག་
གཞོན་པ་ངེད་ཅག་བཅོལ་ཡོད་ཟེར།།
བརྩེ་བའི་དགེ་རྒན་སེམས་ཁུང་རུས་གསེང་རེ་
བའི་ཉི་གཞོན་བལྟམས་ཡོད་ཟེར།།
རིགས་ཀྱི་སྐད་ཡིག་བཻ་ཌཱུའི་བུམ་བཟང་
འཛིན་སྐྱོང་ལེགས་པར་བྱ་དགོས་ཟེར།།
ཕུགས་འདུན་གཤོག་ཟུང་བརྩོན་པས་བརྐྱངས་
ནས་རེ་བའི་ནམ་མཁའ་བརྒལཤོག་ཟེར།།
ཞག་གིས་ཟླ་བ་ཟླ་བས་ལོ་བསགས་བགྲང་བྱ་
དྲུག་གི་གཏམ་རྒྱུད་སྣེར།།
བཅོས་མིན་མཛའ་བརྩེའི་ཡིད་གཅུགས་ཐ་
གུས་སེམས་དང་བསམ་པ་ལྷན་སྦྲེལ་ཡང་།།
ཉིས་སྟོང་བཅོ་ལྔའི་དཔྱིད་ཀའི་ཉི་གཞོན་འཇིག་
རྟེན་སྣང་བར་མགྲོན་བསླེབས་དུས།།
ལོ་དྲུག་སློབ་ཆུང་འཚོ་བའི་བདེ་སྐྱིད་རྫོགས་
ཚིག་གཟན་པོ་རང་འཁྲུངས་གྱུར།།
ལྷན་འཛོམས་མཐའ་མར་གླུ་དབྱངས་
ལེན་སོང་སྐྱོ་བའི་ཚུལ་གྱིས་
གར་སྟབས་བསྒྱུར།།
དགེ་སློབ་བར་གྱི་མཛའ་གཅུགས་ཆར་སྤྲིན་
དྲག་ཏུ་གཏིབས་པའི་ཕང་བ་ནས།།
མ་བཅོས་མིག་ཆུའི་སྦྲང་ཆར་ཟིམ་མས་དམར་
མདངས་མཁུར་ཚོས་བངས་པ་ཡིས།།
མི་སེམས་ལྡུམ་རར་འདང་བརྩེའི་པད་
དཀར་ལང་ཚོའི་མཚར་སྡུག་
སྨིན་པའི་རྟགས།།
འདུ་བྲལ་ཆོས་ཉིད་ཡིད་ལ་བསྒོམས་ཏེ་གྱེས་
བརྡའི་འཛུབ་མོ་གནམ་ལ་ཀེར།།
སླར་ཡང་འཛོམས་པའི་སྨོན་ལམ་གཙང་མ་
ངག་གི་འདབ་མས་ལན་བརྒྱར་གྱེར།།
མ་ཡུམ་སློབ་ཆུང་རྒྱབ་ཏུ་བསྐྱུར་ནས་
སོ་སོའི་ཕ་ཡུལ་སྙེག་པའི་དུས།།
ཕྱིར་འོང་མེད་པའི་ནམ་ཟླ་ཞིག་ལ་
མི་འདོད་ལས་ཀྱིས་རྫོགས་ཚིག་བཏབ།།
མི་ལོ་དུ་མར་ཞལ་འཛོམས་མ་བྱུང་
ཁྱོད་ཅག་ཁམས་བདེ་ཡིན་ནམ་གྲོགས།།
དྲན་རིག་མེ་ལོང་དྭངས་མའི་ལྟོངས་ཀར་ཁྱོད་
ཅག་འཛུམ་ཞལ་རབ་ཏུ་གསལ།།
དགའ་སྡུག་འདྲེས་མའི་འཚོ་བའི་གྲོང་དུ་ཁྱོད་
ཅག་སྙིང་ཁར་ཡལ་མེད་ཉར།།
ཁྱོད་ཅག་ང་ཡི་མི་ཚེའི་གཏན་གྲོགས་ཞེ་ཕུགས་
ལས་ཀྱི་སློབ་གྲོགས་ཡིན།།
སོ་སོའི་ཕུགས་འདུན་ལེགས་གྲུབ་ཡོང་ཕྱིར་
ངས་ནི་སྨོན་ལམ་ལྷ་ལ་གསོལ།།
འདས་ཟིན་འཚོ་བ་ཡིད་ལ་ཉར་ཏེ་དྲན་
གདུང་སྙན་ཚིག་སྤྲིན་ལ་བྲིས།།
ལོ་ཟླའི་འཕྲུལ་འཁོར་མྱུར་འགྲོས་ཆེ་ཡང་ཞལ་
འཛོམས་ཉི་གཞོན་བསུ་འདོད་པས།།
ཨེ་མ་མཆོག་གསུམ་ཐུགས་རྗེས་གཟིགས་ནས་
མཇལ་མཛོམས་དུས་ཀྱི་སྐལ་བཟང་ཤོག།
༼ དབྱངས་ལྡེའུ། ༽