འཛུམ་ལ་མེ་ཏོག་བཞད་པ་འདྲ།།
ངག་ལས་ཀ་ཁའི་དབྱངས་རྟ་གྲོལ།།
ཡིད་ནི་གངས་ལྟར་ལྷད་མེད་པས།།
ཁྱོད་ཚོ་འབྱུང་འགྱུར་བདག་པོ་ཡིན།།
ཤེས་རིག་མེ་ཏོག་དགའ་ཚལ་དུ།།
ཞལ་རས་དགྱེས་པའི་བུང་བ་ཚོགས།།
ལང་ཚོའི་རླུང་བུས་གཡོ་བས་ན།།
ཁྱོད་ཚོ་རིག་པའི་གཅེས་ཕྲུག་ཡིན།།
ལང་ཚོ་འཇའ་ཚོན་མཛེས་པ་ལས།།
ཤེས་རིག་མེ་ཏོག་སྦྲང་རྩི་འཐུལ།།
བཀྲ་ཤིས་ཐེག་པའི་བརྩེ་གླུ་ལས།།
ཁྱོད་ཚོ་བློ་གསལ་གཞོན་ནུ་ཡིན།།
མ་འོངས་རྒྱང་བཞུད་ལམ་གྱི་བར།།
རང་རིགས་ཕ་ཤུལ་མ་དོར་ནས།།
ཕ་སྐད་སྲོག་གི་གངས་རི་དེ།།
ཁྱོད་ཚོར་བཅོལ་པ་བདག་པོ་མཛོད།།
དབྱངས་གསལ་མེ་ཏོག་ལྡེམ་ལྡེམ་དུ།།
སྙན་རྒྱན་ཚིག་གི་འདབ་མ་དགོད།།
ཕ་མེས་སེམས་ཀྱི་གཏེར་འཛོད་ལ།།
ཁྱོད་ཚོས་འབད་པ་དྲག་པོ་གནོངས།།
༼ སྨྱུ་གུ་ཕྲ་མོ། ༽