བྱིས་པ་ནི་རྫས་ཀྱིས་མ་ལྷད་པའི་འདབ་མ་ལྔ་ལྡན་གྱི་
མེ་ཏོག་ཆུང་ཆུང་དེ་ཡིན་ལ།
དཀར་པོ་དཀར་གཙང་གི་ཤོག་ལེབ་དེ་
དང་འདྲ་བར་མིག་ལམ་ལ་འོད་དུ་འཚེར།
ཤོག་གུར་ཡིད་འོང་གི་རི་མོ་སྣ་ཚོགས་འབྲི་ཆོག་ལ་
དགེ་རྒན་གྱི་བཀའ་སློབ་ཟབ་མོ་དག་གཅིག་ཀྱང་
ཆད་ལྷག་མེད་པར་ལྷོད་ལྷོད་ངང་བྲི་ཆོག།
བྱིས་པ་ནི་དྭངས་ཤིང་གཙང་བའི་ཆུ་ཕྲན་ཆུང་ཆུང་
དེ་དང་འདྲ་བར།
དཀར་ཞིང་གཙང་བའི་བྱམས་བརྩེ་ཞིག་སུས་ཀྱང་
སྐུལ་མ་མ་བྱས་ལ་མ་བཅོས་རང་ཆགས་སུ་
ཡོད་པ་འདི་མཐོང་ན།
ང་རང་ཡིད་འོང་གི་བྱིས་པ་དེ་ཚོ་ལ་ཡིད་
སྨོན་མི་འཆོར་དོན་མེད།
བྱིས་པ།
ཀ་ཁའི་དབྱངས་རྟ་ཞིག་ངག་ནས་སྐྱོར་བ་ནས་
བཟུང་དཀོན་མཆོག་གི་ལྷ་ལ་བློ་ཕུགས་གཏད་དེ་
ཡིད་ཁར་བཞད་པའི་རེ་འདུན་གྱི་ཆེད་དུ་
ཐེངས་མང་ཕམ་མྱོང་ཟེར།
གོམ་ཁ་མ་སྒྱུར་ལ་སྤོབས་པ་མ་ཞུམ་པའི་ཁྱོད་ཚོས།
རེ་འདུན་དེ་ནམ་ཞིག་ལ་འགྲུབ་པའི་གདེང་ཚོད་ལྷག་མ་
ཞིག་སེམས་ཀྱི་གཏིང་རིམ་ནས་བོར་བརླག་ཤོར་མ་མྱོང་ཟེར།
བྱིས་པ།
ཨ་ཕའི་མིག་ཡ་དང་ཨ་མའི་སྙིང་ཕྱེད།
ཁྱེད་ཚོ་ནམ་ཡང་རྒྱལ་བར་སྨོན།
༼ ཨ་དཀར་ཆེན། ༽