ཟིམ་ཟིམ་ཆར་གྱིས་རི་གྲོང་ཞལ་རས་འཁྲུད།།
ལྡེམ་ལྡེམ་དཀར་དམར་མེ་ཏོག་གོང་བུ་དགོད།།
མཛེས་མཛེས་དཔྱིད་ཀྱི་དཔལ་གཡང་འཛུམ་པའི་ཀློང་།།
ཆུང་ཆུང་བྱིས་པའི་དྲུག་གཅིག་དུས་ཆེན་བསུ།།
ལུས་ལ་མཛེས་པའི་རྒྱན་བཟང་སྣ་ཚོགས་སྒྲོན།།
ངག་ནས་སྙན་པའི་གླུ་དབྱངས་སྣ་ཚོགས་ལེན།།
ཡིད་ལ་སྐྱིད་པའི་བྲོ་གར་སྣ་ཚོགས་འཁྲབ།།
ཆུང་ཆུང་བྱིས་པའི་དྲུག་གཅིག་དུས་ཆེན་མཛེས།།
དཀར་གཙང་དཔེ་དེབ་སྨྱུ་གུ་གྲོགས་སུ་འཐམ།།
དབྱངས་གསལ་སོ་བཞིའི་དབྱངས་རྟ་ངག་ནས་གྱེར།།
ཤེས་རིག་བདུད་རྩི་རོལ་བའི་བྱིས་པ་དག།
དྲུག་གཅིག་དུས་ཆེན་དགའ་བདེས་ཁེངས་པར་ཤོག།
ཤེས་ལྡན་ལེགས་བཤད་སྦྲང་ཆར་ཟིམ་མའི་འོག།
ལང་ཚོའི་མེ་ཏོག་འདབ་མ་དལ་གྱིས་བཞད།།
རྣམ་དཔྱོད་རིག་པའི་གཤོག་ཟུང་སྨིན་པ་ཡི།།
ཆུང་ཆུང་སློབ་མ་ཤེས་རབ་ལྷ་ཡིས་སྩོལད།།
ཡོན་ཏན་ངོམ་པ་མེད་པར་མདུན་དུ་སྐྱོད།།
བརྩོན་འགྲུས་ལྷོད་པ་མེད་པའི་ཆུ་མོ་བཞུད།།
དཔེ་ཁུག་རྒྱབ་ལ་ཁུར་བའི་བྱིས་པ་ཚོ།།
ཁྱེད་ཚོ་ང་ཅག་རེ་བ་རྟགས་ཅན་ཡིན།།
རིན་བྲལ་སྐད་ཡིག་མི་རིགས་གཅེས་ནོར་ཆེ།།
མི་ཉམས་འཛིན་སྐྱོང་སྤེལ་གསུམ་སློབ་མར་རག།
ལྷོད་མེད་ཐོས་བརྩོན་གྲུ་བོ་ལ་ཞུགས་ཏེ།།
རྒྱལ་ཁའི་འབྲས་བུ་ལོན་ཤོག་སློབ་མའི་ཚོགས།།
ཤེས་རིག་མེ་ཏོག་འཛུམ་པའི་དགའ་ཚལ་ཀློང་།།
རྣམ་དཔྱོད་རིག་པའི་གཤོག་ཟུང་རྒྱང་དུ་རྐྱོང་།།
མ་འོངས་ལེགས་ལམ་འཚོལ་བའི་བྱིས་པ་དག།
བསམ་པའི་དོན་ཀུན་འགྲུབ་པའི་བཀྲ་ཤིས་ཤོག།
ཚད་མེད་བཞི་ཡི་གོ་ཆ་སྐུ་ལ་བགོས།།
དམིགས་མེད་ཤེས་རབ་རལ་གྲི་མཁའ་རུ་འཕྱར།།
བཅུ་དྲུག་གཟུགས་འཆང་སྨྲ་བའི་ལྷ་མཆོག་དེའི།།
ཤེས་རབ་འོད་ཀྱིས་རྟག་ཏུ་འཚོ་གྱུར་ཅིག།
༼ རྐང་ལམ་དཀར་པོ། ༽