གནའ་དུས་སུ་དར་མདོ་ནི་ཇ་ལམ་ཡིན།
དེང་དུས་སུ་དར་མདོ་ནི་ཚོང་ལམ་ཡིན།
དེ་རིང་ཉི་མ་དྲོ་ཞིང་ཚ་བ་ཡང་ཆེ།
ཁྱོད་ཀྱི་བོད་ལྭ་གྲ་དག་ཅིག་གྱོན་ནས།
གདན་ཐོག་རི་བོའི་གློག་སྐས་ན་ཡོད།
རྣ་བ་རུ་རྣ་རྒྱན་སིལ་སིལ་གཡོ།
གདོང་བ་དང་མཆུ་སྒྲོས་སུ་ཚོན་བྱུགས།
སེམས་སུ་འཁྲབ་སྟོན་ཞིག་ལ་སྟ་གོན་ཡོད།
གློ་བུར་དུ།
ངའི་དྲན་པ་ཞིག་སླར་གསོ་བྱས།
དར་མདོ་རུ་གདན་ཐོག་རི་བོ་ཡོད་ལ།
གདན་ཐོག་རི་བོ་དར་མདོ་རུ་ཡོད་པ་དྲན།
ད་ལྟ་ཁྱོད་ཀྱི་ཡིད་ལ་གནས་རི་ཞིག་འཁོར་རམ།
རྡོ་རྗེ་ཕག་མོ་ཞེས་པའི་མཁའ་འགྲོ་ཞིག་དྲན་ནམ།
དེ་རིང་ངས་ཁྱོད་ལ་ཅི་ཡང་གསལ་བཤད་མ་ཐུབ།
བདག་གིས་ཁྱོད་ལ་གཅེས་སེམས་འབུལ་འདོད།
དར་མདོའི་མཛའ་གཞས་བཞིན་འབུལ་འདོད།
བདག་གིས་ཁྱོད་ལ་ལང་ཚོ་འབུལ་འདོད།
དར་མདོའི་བོད་གྲོང་བཞིན་འབུལ་འདོད།
དར་མདོ་རུ་གདན་ཐོག་རི་བོ་ཡོད།
གདན་ཐོག་རི་བོའི་ཡང་སྟེང་དུ་ཅི་ཞིག་ཡོད།
ངས་ཁྱོད་ལ་འཕྲིན་ཞིག་བཏང་ཡོད།
གདན་ཐོག་རི་བོས་ཁྱོད་ལ་བསྒུག་འདུག།
༼ ཧུན• དུར་རོ། ༽